|أسطورة نوميديا|
الفصل الأول: بين الأسطورة والواقع
[ الجزء 10 ]
في تاريخ 16 يوليوز 2018.تحل الملف عاوتاني :
الشيفور لي كان خدام عند رمزي، بعدما سكت 16 عام، قرر يعتارف ويعاود لي عارف.
جا للمركز لي خدام فيه ماسين، ولي كان مكلف بالقضية قبل، وقال بلي عندو اعترافات فديك الجريمة.
كان لي مكلف هو الرئيس تاع ماسين.
الرئيس: أشمن اعترافات أسيدي بغيتي تقول!
الشيفور: الجريمة طرات 16 عام دبا، أنا كنت خايف وسكت ، ولكن مبقيتش قاد نهز هاد الإثم معايا.
الرئيس: واش عرفتي شحال من جريمة تطرا فالعام، وجريمة داز عليها 16 عام ، باش بغينا نعرفوها.
الشيفور قرب وقال: الجريمة لي عيطتو فيها على رمزي الساخي، المرا لي كانت تقتلات فدارها فالنواحي تاع المدينة، وملقيتو حتا دليل.
الرئيس سمع رمزي وهو يسكت تيفكر: اه عرفتها ،وشكون نتا لي جاي تحلها؟
الشيفور: أنا الشيفور تاعو، أنا لي ديتو لتماك فديك ليلة.
الرئيس حل البيسي تيكتب الأقوال: وباش عرفتيه قتلها، وماشي غير جا يشوفها.
الشيفور: حيت أنا هزيتو من الشركة نقي وفاش ديتو عندها وخرج كان عامر دم.
الرئيس: شفتي الضحية ولا شفتي الجريمة؟ ولا أداة الجريمة؟
الشيفور: لا، لي عارف هو دخل ماهاز والو معاه وخرج بيديه خاويين عاوتاني (سكت تيفكر) لا مانو خاويين، ومشفتش الضحية
الرئيس: وعلاش قتل الضحية ، أشنو علاقتو بيها؟
الشيفور: معرفتش، كنت تنشوفها تتجي مرة فشحال للشركة، تتغاوت معاه وتتمشي وحتا هو فاش تيمشي عندها تيتغاوتو وصاف، معرفتش أش بيناتهوم ، ولكن معرفة تاع سنين، وداك النعدهار ديتو كنت متوقع يتغاوتو وصافي ولكن متسمع حتا صوت
الرئيس: خاصك تعرف بلي بأقوالك منقدروش نردوه هو المجرم حيت مكايناش أداة الجريمة والا حتى شاهد آخر، ميمكنش نديو على هضرتك بوحدها ، حيت أصلا 16 عام لي دازت على هادشي.
الشيفور: أنا متأكد هو لي قتلها، بزاف تاع الموظفين حضرو لغواتهوم وبلي كانو عندهوم مشاكل، هو الوحيد لي يقدر يقتلها.
الرئيس شاف فواحد الولد بوليسي : أجي قيد معلومات تاع السيد (رجع شاف فالشيفور) غادي نعيطوليك منبعد، إلى تفكرتي شي حاجة جي وخبرنا بيها، وحنا أنشوفو خدمتنافهاد الحريرة.
الشيفور: واخا ا سيدي .
مشا الرئيس دار اجتماع مع المحققين لي فالمركز وبلي الملف أيتحل عاوتاني ، بعد هاد المدة حيت بان الجديد فيه ، ركزو على النقط لي خاصينهوم ، والرئيس كلف ، ماسين، بهاد المهمة.
ماسين كان يلاه عام باش تخرج وبدا الخدمة، باقي تيتكلف بالمهمات الصغار، ولكن طموحو للأكبر خلا الرئيس يكلفو بهاد المهمة.
بدا التحقيق وتلقاو شهود جداد لي قالو بلي بصح ليلى ورمزي كانو تيتغاوتو غوات كبير فالشركة.
وهاكا تحطات التهمة عاوتاني على رمزي.
ماسين بدا التقلاب والبحث من وراه ، ولكن مكان حتى دليل كيبين بلي قتلها، لا بصمات فالدار ، ماشي غير هادشي مكان حتى دليل لا ضدو والا ضد أي واحد آخر.
عند رمزي لي كان غادي جاي للمركز، تيحققو معاه كل نهار،ولكن هو مكانش قابل هادشي ، انتخابات تاعو قربو ، وصورتو مبغاهاش ضيع ، كلف رجالو يقلبو على المحقق لي تيحفر وراه، ويجيبو ليه خبارو.
وداكشي لي كان، نهار وكان الدوسي تاع ماسين بين يدو.
YOU ARE READING
أسطورة نوميديا🗡️مكتملة🗡️
Fantasy💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
