|أسطورة نوميديا|
الفصل السادس : هل هذه النهاية؟
[ الجزء 51 ]
القاضي: السكاااااات هادي محكمة ماشي سوق.
البوليس جرو رمزي وهو تيغوت والمحاميين تيحاولو يهدنوه،المدعي العام شاف فمنى لي ابتاسمات ليه.
كانت هادي خطتهوم، إلى استافزوه وصدموه بالمخبي غادي يتعصب ويعتارف بلا ميحس.
رجع الهدوء للقاعة.
القاضي: قلتي حضرتي للجريمة، كيفاش مشدكش.
منى: كنت فالفوق وتنطل على لي دار وانا ساكتة باش مايشوفنيش،فاش نزلت لقيتو خرج عند الشيفور، وماما ميتة، تخلعت وخرجت تنجري برا، حتى وصلت واحد الفيرمة ونعست فيها، لقاتني واحد المرا ففيرمتها، ومبلغاتش بيا باش منضيعش فالخيرية، خباتني عندها ، قريت فالدار وكبرت فالدار، مكانت حتى معلومة عند العالم عليا ،حتا تحلات القضية وجبت ليها الخبار وجيت باش نعطي أقوالي.
القاضي: كيفاش عرفتي القضية؟
منى: من التلفازة، سمعت سميتو وتفكرتو.
رمزي تيحاول يهضر والمحاميين حابسينو باش ميجريوش عليه من القاعة.
المدعي العام مد ليه الوراقي: عندي الشهود على هادشي كامل، القصة هاكا طرات، هو براسو اعتارف بيها، هو القا_تل لي كان هارب من العدالة 20 عام.
القاضي تشاور مع القضاة لي حداه وشافو الوثائق.
منى رجعات جلسات حدا الجمهور.
المدعي العام دخل الشهود كاملين لي جاب لي شاهدين على أجزاء القصة كاملة.
المدعي العام من ورا ما خرج آخر شاهد شاف فالقاضي: القضية تاع الق_تل، باش يتستر عليها رمزي، دار جرائم أخرى، الرشوة، القتل، والتزوير.
المحامي: اعتراض، ماشي من حقك تزيد تغرق الموكل تاعي بجرائم أخرى معندو بيها دخل.
المدعي العام: رمزي زور الوثائق ف 2002 باش تسد القضية، ورشى بوليس بالفلوس باش يزورو الوراق، وف 2018 رشى بوليسي باش يسد القضية، و ف 2018 قتل السائق تاعو ودفنو فالغابة بعدما مشا بلغ بالقضية وحلها.
القاضي: الدلائل؟
المدعي العام: القضية تاع السائق ، ها التصاور تاعو، كانو بصمات تاع رجالو فالتراب وفالجثة، وعندي شاهد شاف رمزي فالغابة مع رجالو فنفس البلاصة وخاف يبلغ، وفاش بحثنا اعتارف بلي شاف وعطا مواعد قريبة بزاف لنتائج التشريح،وعندي بوليس اعتارفو بالرشوة لي خداو من رمزي باش يسدو الملف.
القاضي: تقظر دخلهوم.
دخل الراجل لي شاهد على الجريمة تاع السائق،ودخلو البوليس لي خداو الرشوة ومنبعد عيطو لماسين.
المدعي العام: غادي نادي على آخر شاهد ، لي سد القضية ف 2018 بالرشوة، وحل القضية ف 2022 بعدما جابلينا أداة الجريمة لي كانت مفتاح للجريمة.
تحل الباب ودخل ماسين بحوايج الحبس جارينو البوليس.
ماسين دخل تيتمشى مشيتو بتقة والكاميرات تيصوروه وهو تيشوف فرمزي ويبتاسم، جلسوه فبلاصتو.
القاضي: عرف براسك.
ماسين: سميتي ماسين ..
عرف براسو تعريف كامل وشاف فرمزي وفالمدعي العام تيتسنى يسولو.
القاضي: شحال عرض عليك رمزي ؟
ماسين: عرض عليا الفلوس، قاليا بالحرف، خود الفلوس باش داوي ماماك، عرفتو ديك الساعة بلي بحث عليا، وبلي القضية إلى منسداتش مغتبقاش متعلقة بالرشوة ولكن أتعلق بحياة الواليدة، عطاني الفلوس بالضبط تاع العملية، أنا سديت القضية ودرت العملية للواليدة ولكن ماتت، بمعنى أنا مستافدت والو فالأصل، داكشي باش عاودت حليتها.
القاضي: باش عرفتي أداة الجريمة هي الخنجر.
ماسين هز راسو للفوق وهو عارف منى وراه وتتشوفو: كيفاش حليتها؟ بسيطة ، ديما المشتبه كان رمزي، بحثت ورا رمزي، بالصدفة عرفت الخنجر المشهور دخل للمتحف ف 2002 وبلي المقاييس تاع أداة الجريمة لي فالقضية هي نفسها تاع الخنجر، وصافي ، قررت نسرقو ونظير فيه الأبحاث، حيت إلى عرف لي كنت ناوي عليه كان غيقتلني بحال السائق.
القاضي: خسرتي خدمتك مقابل القضية، هاظي كولها تضحية منك؟
ماسين: خسرت خدمتي على قبل خدمتي، ودخلت واحد بحال رمزي للحبس، حيت هاديك بلاصتو.
رمزي نقز فوق الطبلة: كداااب ، نتا كداااب، نتا أصلا حمق، متكبر ، نتا لي قلتيليا قتلها نتاا ( بدا رمزي تيبكي) ماشي أنا، لاا لاا، أنا مكنتش قاصد.
عاودو البوليس جروه، المحاميين شافو فبعضهوم وفرمزي لي بظا تيبكي ويحرك راسو بلا بحالا دخل فصدمة
المدعي العام عطا إشارة لماسين بلي صافي سالا لي خاص يقول، خداوه البوليس، وداز قدام منى لي تتشوف فيه مبتاسمة، شاف فيها ودور عينو لقدامو .
القضاة دخلو باش يتشاورو بيناتهوم باش يخرجو بالقرار النهائي
أنت تقرأ
أسطورة نوميديا🗡️مكتملة🗡️
الخيال (فانتازيا)💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
