|أسطورة نوميديا|
الفصل الأول: بين الأسطورة والواقع
[ الجزء:2]
كان مربع يديه فوق المكتب خاشي راسو فيهوم، وغارق فسابع نومة حتى تخبط دوسيي على البيرو وهو ينوض مخلوع، حل عينيه بصعوبة تيستوعب الوجه لي قدامو، وجه معصب، فكو مزير بالأعصاب.
رجل خمسيني الشيب بدا تينتشر فراسو، وجهو حمر وحجبانو مقرونين وصوتو باح بالأعصاب: البارح أنا أش قلت، غادي تمشي مع الفريق مغادي دير يدك فحتى حاجة ، وغادي تبع الأوامر تاع قائد الفريق، ياك هادشي لي خرج من فمي، ولكن نتا أش درتي؟
حك عينيه وهو تيحاول يتفكر أش طرا ويفرق الواقع مع أحلامو لي تخلطو فدماغو ومبقى قادر يميز والو، دار يدو ورا راسو وشاف فالرئيس تاعو: أنا متأكد مدرتش شي حاجة فيها خسائر بزاف.
الرئيس خبط يديه على المكتب الشيء لي خلا ماسين يوقف من كرسيه ويشوف فيه بتركيز: مافيهاش خسائر بزاف! ماااافيهاش خسائر بزاف! واش نتا عارف بلي العملية فشلات بسبابك، أنا عييت منك ومن خدمتك الناقصة، لي حطيتي فيها يديك تتعواج.
ماسين بمزح: ماتزيدش فيه البوس ، أنا غير درت لمسة تاعي، واش تيتسحابليك البوليس هو هاد الهدوء لي عايشين فيه، تمشي وتلقى العصابة جالسة وتهزها فهدوء وتجيبها، راه ضروري من الأكشن والجرا والسلاح و..
الرئيس غوت بجهد خلا ماسين يسد عينيه: آخر فرصة أنعطيك، ملي نقول آخر فرصة أنا تنقصدها ، فؤاد مشا يحرس المخزن لي فالخرجة تاع المدينة ، فيه تبادل مهم بين العصابات لي كنا حاضيين شهرين هادي ، بغيتهوم يتشدو كاملين ملي يدخلو كاملين فالديبو ، مبغيت حتا واحد يهرب، آخر فرصة ليك، حيت أنا طلعات ليا خدمتك فراسي ، وليت واحل معاك كتر من المجرمين.
ماسين صغر عينيه: هادا نقدر نسميه اهتمام، ولا حب؟ نتا مهتم بيا ياك؟ ولكن نتا عارف أنا راجل و حتا نتا غالبا، المعادلة مستحيلة ماشي غير صعيبة، زيد عليها نتا إنسان مزوج وبولادك وأنا باقي شاب صغير ، راه مس..
الرئيس شد راسو وجلس فالكرسي وغوت: يااااا ربيييي صبرني، إلى خسرات المهمة هاد المرة عاوتاني غادي نوريك شكون لي راجل.
ماسين هز جاكيتو لبسها تيضحك ودار يديه فالجيب تيتمشى بفخر، بحالا ماشي هو نفس الشخص لي كان سبب في فشل أكتر من أربع عمليات كبار فشهر واحد، المركز كامل عارف إلا هو ، مصر يبين بلي الخوف والهدوء تاعهوم لي خسرها ماشي الارتجال تاعو.
توجه لسيارتو بمشيتو الشهيرة ، كل رجل غادا فمسار بحالا ماشي خواتات، وتيضرب بكتافو العراض ممسوقش للأعين والأفواه لي فينما يدوز من حداها تردد الله يستر، ومبتاسم ديك الابتسامة لي تتستافزهوم، هدفو فالحياة يطرطق ليهوم المرارة وربي كبير.
ركب فسيارتو لي كانت فالباركينغ وطلق الموسيقى مجهدة لي خلات أي بوليسي ولا شخص جاي للمركز يدور يشوف فيه، وهو طبعا مكان مسوق لحد ، خرج ومشا للموقع لي فيه العملية.
بعدما وصل خرج وركب مع فؤاد لي كان من نفس الدفعة تاعو، قراو بجوج ودوزو السطاج بجوج وخدمو بجوج،ولكن كان بينهوم فرق ،الفرق كان واضح ،واحد إنسان خدام من قلبو وباغي يخلي أي خدمة تكون مثالية ومتقونة بلا أي غلط ، ولاخر مكاينش لاش نهضرو عليه .
ماسين: واش البوليس محاصرين البلاصة؟
فؤاد: اه كيتسناو غير يوصل الوقت المناسب باش ندخلو، داكشي باش عافاك مبغيتكش تهور ودير شي حاجة تخرج علينا كاملينا بيها.
ماسين حرك راسو بلا: كون هاني أ صاحبي .
فؤاد: نفس الجملة قلتيها البارح وقلتيها سيمانة الفايتة ولي قبل منها ولي قبل حتا هي ، ولكن أشنو درتي؟
ماسين: قود/تها ،هادشي لي بغيتي تقول؟ الأكشن ضروري فكولشي ،الماكلة تتحتاج الأكشن ، الرياضة تتحتاج أكشن، شتي حتا الجنس تيحتا...
قاطعو فؤاد وهو تيسد ليه فمو: صافي سكت ،مبغيت نسمع والو،جلس وسكت وخلينا خدامين هانيين.
ماسين دار حركة لفمو بمعنى غادي نبقى ساكت.
STAI LEGGENDO
أسطورة نوميديا🗡️مكتملة🗡️
Fantasy💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
