|أسطورة نوميديا|
الفصل الرابع : خيوط الحقيقة
[ الجزء 33 ]
المركز تقلب بالخبر ، نساو رمزي وقضيتي، ومركزين غير ملي يتنشر خبر بلي ماسين بوليسي وسرق خنجر غالي .
الرئيس تيمشي ويجي فبيروه مفقوص: تواصل مع مركز الاتصالات، ويلا وصل اتصال على الموقع تاعو يتواصلو معانا، وشي وحدين يمشيو للدارو يشوفو واش فيها، وتواصلو مع الجريدة باش تمسح الخبر، وقلبو على لي سرب الفيديو وجيبوه.
خرجو باش كل واحد يشوف خدمتو.
الرئيس لي كان ناوي يلقى حل للقضية ويعتق ماسين، دبا ولا واحل كتر حيت غرق مزيان، وولات قضية رأي عام.
دخل على رمزي لي كان جالس فبيت مظلم فيها طببة الوسط مديورين ليه المينوط معاها.
الرئيس: نتا لي فضحتيه حيت خدا الخنجر.
رمزي: خدا؟ مالو مخليه ليه باه، الخنجر ملكي وملك الدولة.
الرئيس: علاش مبلغتيش بيه؟
رمزي: علاش انبلغ بيه، وياخد عقاب خفيف ويخرج عليا أنا؟
الرئيس: إذن الخنجر فعلا أداة الجريمة وتتعتارف بلي نتا القاتل.
رمزي: مكنعتارف بوالو، أنا بريء وعيط على المحامين تاعي.
الرئيس: القضية عندك معلكة ملي غتجيب كتر من محامي واحد.
رمزي: ماشي من حقي؟
الرئيس: لا من حقك، نشوفو واش لي تابتة عليه شي جريمة واش يقدر يهرب منها إلا كانو عندو كتر من محامي.
رمزي : دبا نشوف .
خرج الرئيس ورجع لبيروه تيفكر.
فمركز الاتصال جا اتصال من بنت.
****: ألو مرحبا، أشنو المشكل؟
البنت: شفت الخبر فالتيليفون تاع داك لي سرق الخنجر، هو دبا واقف قريب ليا .
****: ممكن الموقع بالضبط.
البنت : فيلاج ***** هو دبا دخل لواحد الدار ، الرقم 66، حدا السوق الكبير
****: متأكدة من وجهو، ممكن يكون شبه؟
البنت : لا هو متأكدة.
**** : وصفيه لينا اش لابس .
البنت: سورفيط رمادية وكاسكيط كحلة هاز كارطابل كحل وصاك تاع اليد.
*****: واخا ممكن تقولينا الاسم والنسب ورقم البطاقة الوطنية.
تسمع الصوت مضشش وتقطع الاتصال.
مركز الاتصال تواصل مع الشرطة بالمعلومات لي جمع وبلي ممتأكدش منها.
دخل فؤاد على رئيس هاز الوراق فيديه: جا اتصال بلي شافوه فهاد الموقع وها المواصفات.
الرئيس قرا داكشي وتفكر أنور تبعاود ليه على نهار خدا الخنجر ، قاليه بلي خداه فكارطابل كحل.
شاف ففؤاد: هو ، علم الجوندارم لي تما يشدوه وحنا غنمشيو لتماك دبا.
فؤاد : ورمزي؟
الرئيس خرج: مغاديش يهرب بحال ماسين إلا عرف بلي عرفناه هو السارق
فؤاد تبعو وتبعوه جوج خرين وشدو الطريق للفيلاج.
YOU ARE READING
أسطورة نوميديا🗡️مكتملة🗡️
Fantasy💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
