|أسطورة نوميديا|
الفصل الأول: بين الأسطورة والواقع
[ الجزء 9 ]
في تاريخ 15 نونبر 2002 مع 22:35.
ليلة شتوية فيها الشتا خيط من السماء، الشارع خاوي من حس بنادم، المحلات مسدودة حتى الحيوانات كانو مخبيين بعاد على الشتا.
حل الشيفور الباب للراجل لي خرج من شركتو تيتمشى بالزربة، من وجهو باين معصب ، وباغي يبخ الدم، ركب بالزربة، سد الشيفور الباب ورجع ركب فبلاصتو.
الشيفور: فين بغيتي ناخدك أ سيدي؟
رمزي: دار ليلى.
الشيفور هز راسو وخدم المحرك ومشاو، دار ليلى كانت بعيدة على السونطر تاع المدينة، داكشي باش مسافة الطريق كانت طويلة ولكن كانت أطول على رمزي، فكل مرة يرجع فودنو صوتها وهي تتغوت وتهدد فيه بلي غادي تشوهو وتخسر صورتو،تيزيد يتعصب، ويحرك فرجليه لي كانت دليل على توترو وأعصابو.
وصلو لمنزل ف ضواحي المدينة، المنازل كانو قلال، ولكن المنزل المقصود كان على شكل فيلا صغيرة من طابقين،كان طافي فيه الضو، نزل رمزي بمجرد ما وقفات الطوموبيل ومشا تيجري تحت الشتا للمنزل، بلا ميتسنى الشيفور يحليه.
وقف فالباب تيخبط، وبعد خبطات قويين ، حلات ليلى وهي مخلوعة ملوية فبينوار سخون، دفعها بقوة للداخل وسد الباب،بلا ميتسمع حتا صوت من بعد.
الشيفور كان واقف حدا الطوموبيل هاز مظلة وواقف تحت الشتا تيتسناه يخرج بعدما توقع نسبيا أش غيكون طرا.
بعد دقائق خرج رمزي تيجري للطوموبيل بوجه مصدوم، وهو عامر بالدم ركب لور وهو تيشوف فالشيفور لي كان تركيزو مع الدم لي معمر الكومبلي ،دار ركب الشيفور حتا هو مخلوع بلا ميهضر توجه لفين قاليه رمزي.
بعد كتر من 36 ساعة من هاد الليلة:
اكتاشفوا الجيران القلال الجثة بالصدفة وعيطو على البوليس، لي بداو التحقيق الطويل.
بعد أيام الجيران شهدوا بلي تيشوفو رمزي الساخي مرة مرة فالدار تاع ليلى.
وطبعا البوليس عيطو ليه باش يحققوا معاه.
شدوه عندهوم أسبوع وكلها دازت تحقيق معاه ، ولكن مكانت حتا حاجة تتبث بلي هو القاتل ، واخا كان هو أكثر واحد أو الوحيد لي تيدخل دار ليلى على حسب الجيران، ولكن ليلة الجريمة مكان تواحد شافو، وحتا هو بين ليهوم بلي الوقت فاش ماتت كان هو فالشركة خدام.
بحكم رمزي كان شخص بادي فطريق السياسة، فكانو عندو بزاف تاع المعارف، أكدو على البوليس باش يتسد الملف فمرة ومباقيش يتحل ، وبما أنه مكاين حتا دليل فراه مخاصوش يتحل باقي.
وفغلا الشرطة دارت بالأوامر لي جاو من الفوق،ولشي سبب تبين بلي هو بريء ومعندو يد فالجريمة والا بالضحية وبلي ماشي هو القاتل.
وتسد الملف فمرة وتحط مع الملفات لي تسدو بأوامر كبيرة وبلي عمرهو غيتحلو.
وتقيد على أنها جريمة بلا متهم،و لا شهود،و لاأدلة والا أداة الجريمة.
YOU ARE READING
أسطورة نوميديا🗡️مكتملة🗡️
Fantasy💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
