|أسطورة نوميديا|
الفصل الأول: بين الأسطورة والواقع
[ الجزء 5 ]
ركب سيارتو تيضحك على هاد الحمقة لي سلخات ليهوم العصابة وزايداها بالأوامر وهضرة ممفهوماش، تبع السطافيط للمركز لي خدام فيه ودخل سابقهوم.
نزلو البوليس البنت من السطافيط وهي باقا تتغوت ومنوضة روينة غير بوحدها، دخلوها للمركز عند ماسين لي تيقلب على الرئيس باش يعاود ليه على لي طرا.
البنت شافتو وهي تبدا : نتا غادي تندم ملي تعرف شكون أنا، شكون الكبير تاعك أ الخادم الحقير (قالت آخر كلمة باشمئزاز وبصوت مجهد خلا كولشي يشوفيهوم)
ماسين حل فمو تيستوعب آش قالت، وصوت الضحك بهمس واصل لودنيه.
جرها للغرفة تاع التحقيق ودخل معاها، جابوليه بيسي تاعو باش يكتب المحضر وبدا.
ماسين: سميتك، سميت مك، وسميت باك، و شحال فعمرك، ورقم البطاقة الوطنية، وعنوانك؟
البنت بقات تتشوف مفاهمة والو.
ماسين رجع لور تيشوف فيها: أنتسناو بزاف؟ أش كنتي تديري فالديبو ؟
البنت عاوتاني مطلعة error 404.
ماسين: واخا، حيدي داكشي من على وجهك بعدا وحيدي داك القب وقولي سميتك.
البنت حيدات القب و بان شعرها البني لي كان مجموع خفيف ورا عنقها وحيدات النقاب لي كان زيف كحل خفيف محزماه ورا راسها، وبانو ملامح وجها، عينين كبار أقل حاجة ممكن تقال عليهوم أن الشر خارج منهوم، والشوفة لي كانت تتشوف في ماسين خلاتو يفكر مرة خرا واش من الصح يبقى هو ووحدة بحالها فغرفة بوحدهوم؟
ماسين: سميتك؟
البنت: لالاك نوميديا.
ماسين: نو أش؟؟
البنت خنزرات فيه وعاودات: نوميديا.
ماسين عاود الأسئلة الخرين: سميت مك وسميت باك و شحال فعمرك ورقم البطاقة الوطنية وعنوانك.
نوميديا: أشنو كتقصد بهاد الترهات لي تتعرض عليا.
ماسين سد البيسي ووقف: تراهات! وقفي الشريفة وقفي.
نوميديا شافت فيه بتحدي ورجل فوق رجل وتكلمات بثقة: كيفاش خادم بحالك يتجرأ يأمر سيدتو.
ماسين خبط يديه مع الطبلة: هاهيا تاني تتقول خادم ولا الخرا، أشريفة أ بويا عمر ، واش نهار تسوطيتي كنتي تتفرجي فحريم السلطان وجايا تلعبي ليا هيام خانوم ، أنوضي تجمعي قدامي.
جرها من دراعها تتنتر ، ومشا بيها لجهة تاع المعلومات، طلب منهوم يشوفو بصماتها ويجبدو شكون هي .
حطات صباعها بزز تحت تأثير البوليسي لي كان تما لي ما خلات فيه غير لي نسات كل ثانية تغوت وتهضر وتعلق على التعامل لي تيعاملوها.
ماسين مكانش مهتم بالمرة باغي غير يعرف شكون هادي لي خرجات فطريقهوم هاد ليلة، ضاربة عصابة على قدها، ومباغا تعطي حتا معلومة عليها وزايداها بهضرتها الغير مفهومة.
قاطع تفكيرو الراجل لي خدام تما وهو تيقلب فالبيسي لي قدامو مصدوم: ماسين هاد ختنا مطلعاش ف سيستيم، عاودت جوج مرات ولكن والو بصماتها ممسجلينش.
ماسين شاف فيها وشاف فسيستيم لي ممطلع والو.
نوميديا كانت جالسة فالكرسي ودايرة رجل فوق رجل تتشوف فيه شوفة خطيرة.
ماسين: أنا أنشوف أش بلانها.
جرها ودخلها للمكتب تاع الرئيس.
دخل لقى الرئيس وفؤاد جالسين مع بعضهوم، شافهوم وهو يوريها ليهوم.
فؤاد شافها وشير للرئيس ليها : هادي هي البنت لي سلخاتهوم ولكن مبغات تقول والو ومكتفهمش، الحاجة لي تتقول هي بغيت نهضر مع السلطان تاعكوم
الرئيس طلعها وهبطها وشاف حوايجها لي فهم منهوم بلي لباس قديم خاص بعصر قديم.
الرئيس: غتكون شي حمقة دخلات لتماك واش متتشوفوش حالتها كيف مبهدلة بحالا خارجة من شي عصر قديم.
ماسين تدخل: المفاجأة هي أنه فاش قلب عليها محمد لقاها مداخلاش ف...
هاد المرة قاطعو الرئيس بخبطة فوق المكتب : نتا هنا، أنا أش قلت قبل متخرج من هنا.
ماسين بتفكير : غادي نشوفو شكون لي راجل!!
YOU ARE READING
أسطورة نوميديا🗡️مكتملة🗡️
Fantasy💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
