|أسطورة نوميديا|
الفصل الخامس : خرافة على أرض الواقع.
[ الجزء 41 ]
من الفوق كانت منى تتشوف كولشي لي طرا، دايرة يدها على فمها وتتبكي بشوية باش ميسمعهاش.
شافتو مزيان وعرفات اسمو وكنيتو ، والمشهد كامل تنقش فعقلها .
نزلات بالشوية تطل، حلات الباب وراه وطلات عليه حتا مشا، ورجعات تتحرك فماماها ولكن مكانتش تتجاوب ، كانت ميتة ، جلسات حداها مصدومة تتنخصص.
وخرجات من الدار تتبكي وسط الشتا، متتعرف حتا واحد ومعارفاش أش خاصها دير.
شدات طريق وحدة وبقات غادا معاها تتبكي ، وسط ليل والشتا والبرد، بقات غادا مسافة طويلة حتا خرجات ففيلاج صغير، دورات عينيها فيه وهي تتنخصص وتترعد بالبرد، دخلات للفيرما صغيرة وتلاحت فوق التبن لي كان مدرگ من الشتا، وهي تلاح نعسات.
الصباح فاقت على لمسات فوق كتفها.
حلات عينيها وبانت ليها مرا فأواخر الثلاثينات تتشوفيها بابتسامة.
المرا: أش كاديري ابنيتي هنا، فين ساكنة، واش نتي من هاد الدوار.
منى دورات عينيها فين كاينة وهي تشوف فالمرا وبدات تتبكي.
عنقاتها المرا وهزاتها باش دخلها للدار.
دخلاتها وغسلاتليها يديها ورجليها ووجهها وبدات تتهضر معاها.
المرا: أنا مينة، عيطيليا خالتي مينة.
منى: خالتي مينة.
مينة مبتاسمة : هاكاك، يلاه دبا قوليليا كيفاش حتا جيتي لهنا؟
منى: ماما ماتت، رمزي قتل ماما، وهرب ، وماما ماتت.
مينة دارت يدها على فمها: شكون رمزي؟ وفين ساكنة باش نرجعك عندها .
منى بدات تتبكي: رمزي هو بابا، وقتل ماما.
مينة عنقاتها: واخا عاقلة على الطريق؟
منى هزات راسها ب لا.
مينة بقات جالسة وهي تنوض لبيت لداخل.
بعد مدة خرجات مع ولد ف عمر 18 ولا 19 عام يلاه فايق دايخ.
مينة: هاهيا، مها ماتت ومعاقلاش على الطريق، خاصنا نردوها.
الولد شاف فالمرا وفالبنت لي وجها عامر دموع: واش هادي مشة باش ترديها، راها بنادم, كيغادي ري ترديها وهي معاقلاش.
مينة: جات بليل ، مغاتكونش دارهوم بعيدة.
قنعات المرا لولد باش يقلبو على الطريق لي جات منها البنت.
حمزة: واخا اخالتي لبسي ،أنا غنخرج نوجد الطوموبيل.
بعد مدة ركبو فطوموبيلتهوم لي تيستعملها حمزة ومينة باش يهزو فيها التبن ولا داكشي لي كايجيبو من الأراضي تاع مينة .
منى كل مرة تنعتليهوم على جهة وهوما تابعينها على الله يلقاو الدار، ولكن والو، كان كولشي قيفار ونفس الشجر ، تاحاجة ممخلياها تعرف الطريق بالضبط .
حمزة وقف الطوموبيل: لي بغيت نعرف هو واش جيتي بوحدك فهاد الطريق بليل.
منى هزات راسها بأه.
حمزة شاف فخالتو: هانتي من صباح نخيطو، والو، البنت معاقلاش على الطريق، يلاه نديوها للجوندارم هوما يعرفو منين جات.
مينة هزات صبعها بلا: البنت مها ماتت ، معندها تواحد من عائلتها ، غاظي يسيفطوها للخيرية تكرفص.
حمزة: إوا اش غاديري ليها؟
مينة: أنربيها ، أنا.
حمزة دور راسو: أ خالتي الله يهديك كيغاديري تربيها بلا وراق بلا والو.
مينة: ربي سيفطها عندي، ربي عارف كيفاش أيتقادو وراقها ، أنا لقيتها عندي غتبقى عندي، كون مبغاش ربي نربيها، كون خلاها فدارهوم حتا يجيو البوليس، ولكن ربي حماها الطريق كاملة حتا وصلات عندي .
आप पढ़ रहे हैं
أسطورة نوميديا🗡️مكتملة🗡️
काल्पनिक💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
