|أسطورة نوميديا|
الفصل الأول: بين الأسطورة والواقع
[ الجزء 4 ]
قطع عليه البوس ومد تيليفون لفؤاد.
ركبو طوموبيلاتهوم وتوجهو مع البوليس لخرين للمكان لي قال عليه داك الولد.
كانت غابة بعيدة على المدينة، فيها مخزن مهجور، وهو لي كان المقصود.
وصلو ونزلو محاصرين البلاصة من بعيد تيقلبو وسط الظلام لي قريب ينزل على أي حاجة تتبين وجودهوم.
فؤاد: نتا غتبقى هنا وحنا أنقربو وتسمع الرصاصة جي .
ماسين: علاش متبقاش نتا هنا ونمشي أنا معاهوم.
فؤاد: ماسين.
ماسين: مغنبقاش .
تمشى قدامو غادي للمكان، وقفو فؤاد تيهضر معاه بهمس تيحاول يقنعو بالخطة.
حتى سمعو صوت المدابزة والغوات وهوما يمشيو كاملين تيجريو.
دارو على الديبو تيتسناو الإشارة باش يدخلو، حتى خرج واحد تيغوت مخلوع.
شدو فؤاد شانق عليه: أشنو واقع؟
الولد: واحد البنت حالفة تصفيها لكولشي.
ماسين غير سمع بنت وهو يدخل.
كانو الطوموبيلات لي كانو تيتسناو وحتى الأعضاء لي بغاو، ولكن المفاجأة كانت بنت، بنت طويلة ورقيقة، تتحرك برشاقة ،هازة غصن فيديها ولي قرب حداها تتجمعو بيه وتتهضر بكلمات ماشي مفهومة، لابسة لباس جلدي طويل فالأسود ، سلهام مغطي راسها ونقاب خفيف مغطي وجها.
ماسين هز سلاحو وضرب الرصاصة فالسماء.
شافو فيه كاملين.
ها لي ناعس فالأرض تيتألم ، وها لي كان هربان منها خايف من العصا.
ماسين قرب عندها حتى وقف قدامها وشار بصبعو ليها: نتي لي ضربتي هادو ونعستيهوم هنا.
البنت شافت فيه ولاحت الغصن من يدها وشدات صبعو ولواتو ليه حتا غوت ونطقات بلكنة غريبة ولكن مفهومة : نتا بلا شك ماعارفش آخر واحد شار بصبعو ليا فين كاين دابا، أصلا شكون نتا لي تدخل وتشير بصبعك ليا واش معارفش شكون أنا؟
ماسين جر صبعو وهو تيشوف فيها وتيحاول يحركو باش يطمأن عليه: شكون بسلامة، واش عارفة بلي نتي دبا ضربتي بوليسي وهو تيدير خدمتو وبلي هاد التهمة تقدر تغرقك فالحبس.
البنت شافت فيه مطولا تتحاول تستوعب أش قال وبغير اهتمام لكلامو جاوبات ،طلعاتو وهبطاتو : سمع ، تنآمرك تاخدني عند السلطان تاعك نهضر معاه، معرفتش أصلا أش جمعني مع خادم بحالك فحوار فارغ بحال هادا.
ماسين ضحك وهو يدور تيشوف ففؤاد لي نضم ليهوم: قالتليك ديها بغات تهضر مع السلطان تاع القبيلة.
فؤاد شاف فيها بغير اهتمام لكلامها لي سمعو: اش كنتي تديري هنا؟
البنت: بأشمن وجه تتجرأ تطرح أسئلة بحال هادي عليا، واش..
قاطعها فؤاد لي تيشوف فالبوليس لي هزو الأعضاء تاع العصابة للسطافيط: هزو معاكوم هاد ختنا حتا هي نشوفو أشنو قصتها.
ماسين شافيها باستهزاء وهو تيحرك فصبعو: واللهيلا قالتليك بغات تهضر مع السلطان، ياكما قالوليك أنا هو سنبل آغا.
جاو البوليس تيجرو فيها وهي تتنتر حتا لاحوها فالسطافيط وسدو.
YOU ARE READING
أسطورة نوميديا🗡️مكتملة🗡️
Fantasy💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
