|أسطورة نوميديا|
الفصل الرابع : خيوط الحقيقة
[ الجزء 34 ]
ماسين من ورا ما كلم الرئيس وبلغو بكولشي ، لبس حوايجو وهز كارطابلو فيه الخنجر ، والذهب لي عطااتو نوميديا.
وهز معاه حتى ساك آخر باش يدير فيه الذهب لي قالتليه نوميديا مخبي ، وحتا الفلوس ملي يتصرفو.
خرج فرحان تيغني وشد الطريق لداك الفيلاج لي عمرو مشاليه.
فيلاج بعيد على المدينة بكيلوميترات قلال، فيه منازل منتاشرة ، منها المقاربة ومنها المباعدة، وكاين لي داير بحال فيرمات صغار بالكسيبة تاعها ، وفالوسط سوق تيجمع أهل الفيلاج مرة فالأسبوع.
وصل ماسين تيدور فالفيلاج ويدور عينو فالخضورة، وصفاء الجو، سول على عنوان الدار ونعتوه ليه.
كانت فيراما صغيرة بعيدة شوية على الديور ومشى قاصدها.
ماسين تفكر مهامو وبلي نوميديا طلباتو يدفن الخنجر فالغابة لي حدا الفيلاج ويمشي للدار يجيب الذهب لي خاصو ويدوز عند الراجل يصرفو ليه: دبا خاصك تدفن الخنجر، ولا تصرف الذهب ولا تجيبووولا أش؟ اااه يا ماسين ولاو عندك شلا مهام مبقيتيش تتسالي تفكر حتى فأشنو تسبق.
حل الباب الكبير ودخل وق باب الدار لي كان خشبي وقديم ووقف تيتسنى.
خرجات مرا عجوز لابسة بيجامة مزوقة طويلة وزيف بيض مثلث فوق راسها ، وجها لطيف وشافت ماسين وابتاسمات ليه.
المرا: السلام ا ولدي.
ماسين بتاسم ليها: السلام عليكم، سيفطاتني نوميديا.
المرا ضحكات ودارت ليه الطريق: دخل تفضل.
ماسين ابتاسم حيت كاين شي واحد فالأرض غادي يقوليه نوميديا ويتيقو.
ماسين: تتعرفي نوميديا.
المرا ابتاسمات ليه ودخلاتو جلساتو فالصالون ، وعطاتو ورقة مطوية وناضت للكوزينة.
ماسين شافيها حتا مشات وحل الورقة، أول حاجة شاف طراس تاع قبلة بالعكر فالتحت.
ماسين بدا تيقرا:" ماسين يا ماسين، تتقرى الرسالة تاعي، إذن أكيد عرفتي دبا بلي طحتي فالفخ، وتيقتي السيدة تاعك نوميديا ، وكنتي فعلا خادم ليها، أنا متأكدة دبا بلي البوليس جايين باش ياخدوك حيت نتا متهم بسرقة ملك من أملاك الدولة، الخنجر، وهاكا الهدف تاعي تحقق.
رمزي دخل للحبس باش يتجازى على لي دار وحتا نتا غاظي تشد باش تجازى.
غادي تسول أشنو درتي وأشدخلك فرمزي وأش دخلني أنا فيكوم؟
رمزي كان خاص يدخل للحبس ف 2002 وخرج راسو وكنت باغا باش ندخلو ف 2018 ، ولكن بسبابك، اه بسبابك تسدات القضية، سكت بالفلوس وهرب من القضاء، داكشي باش وليتو بجوج أهدافي، وطحتو بجوج فالشبكة.
نصيحة مني متحاولش دكرني والا دكر أسطورة نوميديا، حيت غادي غير يشبعو فيك ضحك، ويردوك حمق ، باراكة غير بغباءك ضيعتي حياتك متزيدش تكمل لي خاصك وتولي أضحوكة تاع صحابك.
متخافش أنحدد شي نهار ونجي خصيصا باش نشوفك ونزورك فالحبس ،.ونخليك تفكر هادشي.
بخصوص الذهب، متعدبش راسك وتمشي تصرفو ولا تقول لشي واحد يصرفو، هاداك غير جالوق، قاليك بوليسي و عندو خبرة وهو كل مرة ياخد كموسة فرحان بحالا خدا ذهب حقيقي
سلم بزاف على "رمزي الساخي"
تشاو"
تدق الباب بالجهد وجرات المرا تحل ، ماسين طوا الورقة ولاحها ورا السداري وشد راسو تيضحك ويضرب جبهتو فكل مرة يتفكر شي موقف داز بيناتهوم بين بلي هي ماشي بنت عصر آخر وبلي هي عايشة معاه فنفس العصر، وكيفاش كان غبي لأنه يتيق خرافة معندها علاقة بالواقع.
YOU ARE READING
أسطورة نوميديا🗡️مكتملة🗡️
Fantasy💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
