علميني ي دنياي وش ذنبي

Part 12

عند بيت ابو عساف
كانو قاعدين بالحوش والجو حلو وعساف وابوه يشوون الحم
ميلاف وهي تصورهم : سنعين من يومكم ماشاءالله
سُلاف ضحكت : اذكري ربتس خلينا نرتاح ماننكرف
ابو عساف : انهجي لغرفتي بحري "شوفي " بهاك الدرج الي يم راسي بوه كبريت هاتيه
سُلاف : يحسافه مامداني حتسيت "تكلمت"
ميلاف : يحسرتي عليتس يتوأمي مسيكينه
ابو عساف : انهجي بساع وانتِ انثبري بعد عن النار وهوي عليه بذا
ام عساف الي قاعده تتقهوى ونياف منجضع "منسدح" على رجلها : يحلولات لو لينا بهاه "هينا" تسان "كان" بردت تسبدي بدال الي مامنهن فود
ميلاف شهقت بصدمه : وحناا طاح كرتنا لنا ساعه انا ووخيتي نساعدتس صار مامنا فود
ام عساف : وانا صادزه مامنتس فود اغديه "يمكن" الفود الوحيد هالبساط فرشتيه
سُلاف الي جت : افااا ينبع الحنان والقهوه الي تلطون "تشربون " منه من مسويا والحلا الي بلعوه "اكلوه" عيالتس من مسويه وفطور الي الصبح من سماعدتس بوه وغير الكنس وغسيل المواعين والملابس من يسويه مو حنا الي مامنا فود
نياف : عوووذه قعدن يحسبن وش سون لتس يمه مفروض تعيدين تربيتهم ماش والوحده لو سوت شي مصقعه "بارده" باليالله تتحرك
عساف : اذا في اعاده للتربيه اول واحد انت الا خواتي عاد
نياف : كش عليك وعلى خواتك الحسنه الوحيده بعايلتكم انا ولا انتم خرطي "ماش "
ابو عساف قط نعله "اكمكم الله"على نياف : انا وامك خرطي يقليل المروه
نياف استوعب : هاه لااا يبه ماصيدي انتم حتسيي "كلامي " عن عيالك
ام عساف : وعيالوه شيصيرون لك؟
نياف بسلوب الزعل : عيال امي وابوي
ميلاف وهي تحاكا بوه : عيال امي وابوي اقوووول نياافوه
نياف : ميلااافوهه
ام عساف ضربتهم : بس بس انت وياها
سُلاف : متى يقضي الحم
ابو عساف : ريض "مطول" تعال نياف عاون اخوك تعبت من الوقفه
ميلاف فزت تساعد ابوها يمشي : بسم الله عليك يحيي
نياف قام يساعد عساف
وبعد ساعه تقريباً حطو الاكل وجلسو ياكلون وبعد الاكل شربو شاهي وقام ابو عساف وام عساف يقيلون "ينامون"
ميلاف نقزت وهي تتكي على عساف : ايي ووش وقعكم "وش اخباركم"
عساف : بخير انتِ منو ؟
ميلاف : مدري يقولون اني اصير اختكم تصدق ؟
عساف : لا عاد اختنا
ميلاف : يقولونوه الشكوى لله يعني
عساف ضحك : هبله
ميلاف : شكراً شكراً
سُلاف : نياافووه
نياف : وش نوحتس سُلافففوه
سُلاف : وش مبقق عيونك بوه "وش تشوف "
نياف : وش دخلتس
سُااف : دخلني الباب
نياف بضحكه : الحسي كفر الدباب ههههههه
سُلاف : ههاهههاايي سامج
كملو سُلاف وميلاف يناحون اخوانهم لين غلبهم النوم وقامو ينامون
،
صباح يوم جديد في فرنسا
العصر في إحدى الاماكن السياحيه
كانو لينا وفارس يتمشون وهم ماسكين يدين بعض
فارس : احس اني للحين بحلم؟
لينا ببتسامه وهي عارفه قصده بس تسوي حالها ماتعرف: عشان وش؟
فارس : عشان وش يبعدي عشان اشياء كثيرررر اولها اني اخذت احن قلب بدنيا وثاني شي عشان صارت من نصيبي اجمل امراءه وثالث سبب يخليني احس اني بحلم واهم سبب حب حياتي صارت مرتي "زوجتي"
لينا بخجل : يحيي والله انت نعمه من نعم ربي
فارس ضحك لخجلها وقال يغير السالفه عشان ماتخجل اكثر وترتبك وهو ماصدق خف ارتباكها : نروح هناك
لينا : عادي
راحو وصارو يتمشون ولينا تصور لـ خواتها
،
اما عند ميلاف وسُلاف فا كانو جالسين يشوفون تصوير لينا
ام عساف : يبعد حيي هي اشتقنا له ما حتست "قالت" متى تجي
ميلاف : ويننن تجي يمه هي بالبراد والجو السنع تجي للسموم والقيض والحر ليه لو منه ماجي اعيش بفرنسا
ام عساف : لو بتس خير قولي هالحتسي تزدام "قدام " ابوتس والله ان يلعن خيرتس
ميلاف : وانا صادزه
سُلاف : معليتس يمه بحري بهاه "شوفي هنا " لينا مصوره وجهه اشبعي منوه
ام عساف خذت الجوال وصارت تكلم لينا وتتطمن عليها
اما ميلاف سحبت سُلاف وطلعو
سُلاف : شبلاتس
ميلاف : بلاي بضحك على اخوانتس شلحل
سُلاف : والله ان يصلي بتس عساف شرق "تهديد" انثبري بهاه بكرامتتس ابرك "اجلسي هنا بكرامتك احسن"
ميلاف : ماانييي
سُلاف بقلة حيل : وش بتعملين " تسوين " طيب
ميلاف : ااايي سألتيني وش بعمل الي بعملوه مو بشين تسبير "مو شي كبير"
سُلاف : زبدة الحتسي وشهو
ميلاف : بزرف "بصرق " جوالاتهم واخليه يدورن لين ينهد حيلهم
عساف الي جا وسمع تخطيطهم : تعقبين وتخسين
ميلاف لفت برعب : يممهه وشهو
عساف : الي تخططين عليّه من هاليوم مافي
ميلاف : غميضه "خسارة " سمعتن
سُلاف ضحكت : حرام عليك منياعليه" كم لها " وهي تهوجس بهالفتسره "الفكره"
عساف : ماافيي
ميلاف : طيب دامك سمعتن بسويّه بنياف
عساف : انا شحتسي من يعيلي " كم لي "
ميلاف : ي اخي وش تبي واقفن ببلعومي " حلقي"
عساف سحبها بخفه مع رقبتها : يخوتس انتِ ماتلزين"ماتجلسن " راحه
ميلاف : تدري تدري
عساف : وش ادري بوه بعد؟؟؟
ميلاف : ان عايلتكم ذي بكبره المفروض كل يوم كل يوم تسجد شكر لربي ع نعمه عندكم مانتم مقدرينه
عساف : ووشهي النعمه الي محنا مقدرينه
ميلاف : اناا طبعاً اصلاً انا نعمتن من رب العالمين مايعطيه الا عباده الصالحين عاد انتم راجعو حساباتكم وش العمل الي سويتوه وربي انعم عليكم ب اخت مثلي
عساف : قصدك وش الشي الي اغضبنا ربي بوه وابتلانا بتس
ميلاف شهقت : اناااا بلوه ؟؟؟؟؟؟
عساف : مع الاسف
ميلاف : تؤامي سمعتي وش يحتسي عني؟؟
سُلاف : سمعت سمعت تحتاجين كليو عصفر
عساف ضحك على تعزيزهن لبعض وراح وترك وراه ميلاف الي تتحلطم
جلس عند رجلين امه يبوسهم
ام عساف حاولت تبعد رجلها بس عساف ثبتها لين باس رجلها
ام عساف : الله يرضى عليك يمه لاتحب رجلي مرتن ثانيه
عساف : افا يالغاليه رجلينتس تحتها الجنه تبين تحرمينا حبته
انسدح ع رجلها وامه تمسح على شعره ويسولفون بعد دقايق دخل ابو عساف ونياف وبعدهم ميلاف وسُلاف وتجمعو الكل وكملو سوالف وضحك وسُلاف منجضعه "منسدحه" ع رجل امها الي تدلك راسها عشانه يوجعه
،
بيت سعد
ريم كانت مشغله اغنيه بجوالها وترقص عليها
هيام : سوال بس يعني انتِ ماتملين من الرقص والاغاني
ريم وهي تسوي حالها تفكر : يمكن لا
هيام : يمكن يعني مو متأكده بعد
ريم ضحكت وهي تكمل رقص الا دخلت نور بالقهوه وهي تخز ريم : كل يوم كل يوم يرقص يرقص انتا مافي يجلس مؤدب شوي
ريم ضحكت : وش عندها جدتنا عصبت علي
نور : مشكل كثيييرر
جت بتروح الا سحبتها ريم
ريم : ارقصي معاي عشان لارحتي لديرتك تعرفين حتى رقص سعودي
نور : لا لا لا انا مافي حبي هاذا
ريم : اشغل لك اغانيكم
نور بتفكير : مافي مشكل "بمعنى عادي او طيب"
شغلت ريم لها اغنيه بنغلادشيه وقال : هيامي صورينا بالله وارسليها لـ ميلاف وسلاف ولينا وملاذ
هيام : طيب
بدت ترقص ريم مع نور وهي تقلد رقص نور
ريم ماقدرت ع رقصهم الي صعب بنسبا لها وصارت تلفح بشعرها وهي تضحك وهيام ميته ضحك عليها ونور تهاوش ريم عشان ترقص زين وريم تستعبط
هيام : ردت سُلاف
ريم نقزت جنبها وهي تشوف وش ردت سُلاف
بالمحادثة ...
سُلاف : هههههههههه ريم يحيي جننتيها كل شوي تهاوشتس
ريم سجلت صوت : شسوي رقصهم مو حلو ماعرفت له
سُلاف : ماعرفتي لوه وشوله ترقصين معه
هيام : جدتنا قعدت تهاوشها وقالت تراضيها برقص على اغانيهم
سُلاف ضحكت
طلعت هيام من المحادثه على رسالة ميلاف
ميلاف : الله جوكم يونس ابرك من الي عندي حتى العامله منفسه مدري وش بلاها
ريم : تتخطين حبي
ميلاف : ماضنتي من قرادة الحظ حتى سُلاف اليوم مصدعه محد يساعدن بالمصايب
ريم : يوه شلون تجلسين بالله كذا بدون مصايب ماتصير ميلاف وبدون مصايب ماتجتمع
ميلاف : اجتمعت مع الاسف
ردت ريم بضحكه وطلعت دخلت رسالة لينا
وكانت كاتبه لينا : عاشت عاشت هههههههههههههه
ردت ريم وطلعت من المحادثه ودخلت ع اسم ملاذ
ملاذ : يعيني مافي فرق بينك وبينها
ريم : وجع حيوانه هههههههههههههههه
ملاذ : وانا صادقه نفس الرقص
ريم : عاد من اليوم تهاوشني تقول ماعرف
ملاذ : مع جنبها وين زي الرقص
ريم : كفر كفو معزز قوي
هيام : طفي الاغاني اخاف يوصل الصوت للديوانيه
قفلت ريم جوالها وجلست تتقهوى مع هيام ويسولفون
،
ديوانية سعد
هالمرا ذي كانت الجمعه بديوانية سعد
وكانت الديوانيه مليانه رجال ومن ضمن الموجودين عواد وعايد
طلع عايد وعواد للحوش
عايد : ذا بيت منو؟
عواد : سعد
عايد : احلففف وش ذا البيت وش كبره يرجال ذا الحظ المتسنع وربي
عواد : ههههه ليه
عايد : بيته اكبر من حياتي يرجال الحوش لحاله ضعف ييتنا مرتين وهاذا وهو يتيم ومقاطع عمامه وماعنده خوال من وين له كل الفلوس يبني البيت
عواد وهو يقصر صوته : ذا الله يسلمك مو مثل حظي وحظك يوم توفى ابوه صار يدرس ويشتغل بنفس الوقت هو وسند ويوم توضفو ماتركو وضيفتهم الي قبل وانت عارف راتب الدكتور كم والوضيفه الثانيه راتبها بعد حول ال 4 الاف .. يصرفون منها وشوي من راتب الدكتور وصارو يجمعون سنه كامله وشرو هالبيت والحين شف حالهم بيت كشخه سيارات خدم وحشم
عايد: اييه مالومهم مايحسبون للفلوس حساب
سعد كان مار ومانتبهو له وسمع كلامهم وقال بينه وبين نفسه ( قل اعوذ برب الفلق ذيلا حاطين عينهم على حلالنا بعد؟؟) وقال : عسى ماشر محتاجين شي؟
عواد ضحك برعب : لا سلامتك بس كنا ندورك نساعدك لو تبي شي
سعد وهو يبي يغثهم اكثر : لا يبعدي لو في شي كثير كان طلبت مقهويين بس مافي شغل كثير
عايد بهمس لـ عواد : قايل لك مايحسب حساب الفلرس
سعد : تقول شي؟
عايد : لا اقول يلا اجل ندخل دام مافي شي نساعدك به
سعد : اها
دخلو ودخل سعد وراهم
وبعد مده راحو الجميع واختصر المكان على سند وسعد وكانو منسدحين بتعب
سعد : اسمع صاحبك ذا والي معه
سند : وش بهم
سعد : تخيل طلعت من الديوانيه بجيب فناجيل نقصت الموجوده ورجعت المهم وانا راجع الا القاهم يسولفون واسمي واسمك بالسالفه جاني فضول اسمع وش يقولون
سند : ووش كانو يقولون
سعد : ابد طال عمرك عواد جعله مايعود علينا مرا ثانيه والي معه عايد ذا يسولفون عننا وعن بيوتنا وسياراتنا ورواتبنا وشغلنا الي قبل الطب ويتحسدونا يارجال ورب الكعبه انه ماشاءالله ماقالوها
سند ضحك : ههههههههههههههههههه ترا عليهم عين وحده بوحده
سعد : والله اني لشعل القران اليوم يرجال ذيلا يتحسدونا عيني عينك احسهم شوي ويقولون يهب
سند : هههه تكفى هههههههههههههههه
اتصل الجوال ورد سعد وكان المتصل فارس ورجع يقول له سعد السالفه وفارس يضحك على تقليد سعد لكلامهم
وبعد ماخلصو من سالفة عواد وعايد قال سند : ومتى راجع
فارس : بعد اسبوع ونص
سعد : عاد شلون فرنسا حلوه زي كلام الناس عنها
فارس : حلوه بس يرجال والله والله مافي مثل ديرتنا "يعني مملكتنا" كافي ابسط شي تنام وبالك مرتاح امن وامان
سند : خطر هناك؟
فارس : لا مو خطر خطر بس مو مثل هينا ابد ولا في مجال مقارنه فرنسا حلوه تروح لها اسبوعين بالكثير اذا طولت لاكن شهر يطولها والله
سعد بضحك : لايكون ماهي عاجبتك فرنسا عشان هالسفره مو عزابي هههه
فارس ضحك : لاااا مو عن كذا هههههههههههههههههههههه
كملو سوالف الين ماملو ىشبعو من بعض وقفلو
باليل قبل تمشي ام سند نع سند قال سعد
سعد : خاله شغلي قران بيتكم اليوم ويفضل ثلاث ايام متتاليه بعد
سند ضحك : يخبل
ام سند : ليه هههه
سعد : في عيون ناس على ولدك وحلاله والعين حق
ام سند بخوف على ولدها : ابشر يمه وانت شغل عندكم لايجيك شي بعد
سعد ابتسم : ابشري
،
(مرت الايام والوقت مر لحد ماجا يوم عرفه )
المغرب في حايل
قبل الصلاه بدقايق طلع ابو عساف ونياف وعساف للمسجد يصلون المغرب
ميلاف وهي تبخر البيت : سُلافف عملتي"سويتي" قهوه
سُلاف : ايي ايي باقي شوين وتخلص
ميلاف : لاخلصت حطيّه عند امي بهالحوش بجنب الفطور
سُلاف : زين .. اخذت صحن الي فيه القهوه والتمر والزبده وودته عند امها بالحوش وشافت ام عساف قاعده تدعي
باست راسها : تقبل الله
ام عساف : منا ومنتس
سُلاف وهي تجلس جنب امها : حصلت دعوه ولا لا؟
ام عساف : اذا مادعيت لعييلي "عيالي" وبنياتي "بناتي" بدعي لمنهو
سُلاف : يبعديي ي يمه
لفو على ميلاف الي جت : عاد اكيد انا ماحصلت دعوه كلوه لسُلافوه وانا لا
ام عساف ضحكت وقالت بضحكه : دعيت لتس يبنت ابوتس
خلصت كلامها على دخول ابو عساف وعياله : وينها بنت ابوها
ميلاف قامت وهي تحضن ابوها مع الجنب وتمشي معه : هاذا هي يملي بس بحر لهم "شوفهم او ناضر لهم" يحتسون مع بعض ويدعون لبعض وساحبين علي
ابو عساف جلس عند القهوه والفطور وجلس ميلاف جنبه وقال بضحكه : ماعليتس منهم انا ادعي لتس واحتسي معتس
ميلاف : يييااابعد الدنياااا والله
سُلاف وهي تحظن يد امها وبضحكه : انا عاد بنت امي مالي فيكم دام نبع الحنان عندي
ابو عساف ضحك : خليّه تنفعتس وانا ابوتس ولاصار وقت الكرف تعالي استنجدي
سُلاف لفت على امها : بوه كرف؟
ام عساف ضحكت : لا لا دامتس بصفي مابوه كرف
سُلاف رجعت تناضر ابوها : ها تقول مابوه كرف يعني مافي منكم مصلحه
نياف : هااا هااا شف يبه اعترفت انها للمصلحه بس تعرفك
سُلاف جتها لحضة ادراك: لاااا لااااااا امزح معك يبه تسذاب ذاا لاتصدقوه
ابو عساف ضحك : مصدقتس مصدقتس
نياف لف على عساف : بحر بهم ماتلاحظ انوه مسحوبن علينا وهم حتى على الفطور تسذا
عساف وهو يشوف ميلاف تقول لابوها دعوات يدعيهم لها وسُلاف تسولف مع امها : الواضح تسذا
عساف طلع جواله وهو يصورهم وهم مو منتبهين له وقال : شوفي يوخيتي من نهجتي مع رجلتس وذا حالهم حتى على الفطور وحنا مسحوبن علين
نياف : لف لف التسمرا "الكمرا" علي
لفها عساف وقال نياف وهو يحظن يد عساف : شوفي انا مالي الا ذا
عساف : شتبي انت زح عني ضايقتن
نياف : فاقد حنان هههههههه
عساف دفه وهو يرسل الفيد لـ لينا ونزل جواله عل كلام ابوه
ابو عساف : نزلو الجوال انت وياه وافطرو مثل الناس
عساف : ابشر
وكملو فطور
،
الرياض
بيت سند
رجع من المسجد وشاف امه تشرب مويا : مابعد افطرتي يالغاليه
ام سند لفت عليه : لا يمه انتضرك
سند باس راسها : ياعلنيي فداا للي ينتضروني
ام سند ابتمست : حللت صيامك؟
سند : اي شربت مي بالمسجد
ام سند : اجل تعال سم بالله وافطر
جلس سند وابتدو يفطرون
سند : ايييه يالغاليه عاد دعيتي لي وانتِ صايمه
ام سند : اكيد دعيت لك انت كل ماملك بهالدنيا اذا مادعي لك ادعي لمن
سند : الله يخليك لي يعيوني انتِ
ام سند : سويت لك المعمول الي يحبه قلبك للعيد بكرا
سند : يالله معمول ومن يدك وش احلا من كذا تتذكرين يمه قبل ايام ماكنت بالمتوسط كل عيد اضل عندك لين ماتأكد انك سويتيه وماسحبتي علي
ام سند ضحكت : ايي اذكر واذكر بعد واحد كان يدسه تحت سريره باليل عشان مايلخصونه الحريم ههههههههه
سند ضحك : شسوي احبه هههههههههههه
،
بيت سعد
ريم نزلت صينيه : ذوقو ذا انا سويته
نور سمعتها بالمطبخ : انتِ نفر كذاااااب انتا كبير مايصير يكذب
ريم : يووه ي نور خربتي كذبتي ههههههه
نور : مشكل مشكل انتا كذب هاذا مايصير سوي مشكل بعدين
سعد : وش عندها جدتنا مشتطه
نور : وشو هاذا مشتتته "مشتطه"
سعد : ابد سلامتك جيبي قشطة تمر من المطبخ
راحت نور تجيبها وعطته ورجعت للمطبخ تفطر
هيام : ههههههه معصبه على ريم غثتها بالمطبخ من غير فايده
ريم : هههه شخوصي هي
سعد : حرام عليك لاتغثينها تراها عجوز
ريم : ابشر بس احب امزح معها
،
بعد كم ساعه بالسوق
سعد : شف ذا الشماغ حلو
سند : لا لونه مو حلو اختار افتح
سعد. : والله البلشه شف لي انت ماني خبره بالشمغ ماحبها
طلع له سند شماغ : خذ هاذا
فارس : انا بشتري عطر امشو
راحو واختار فارس عطر وبعدها طلعو من السوق ركبو السياره
فارس الي يسوق وجنبه سند وورا سعد
فارس : وين الوجهه
سعد : اقرب فرع قهوه احس بصداع
فارس : لااا تكفى الا انت لاتصدع لاصدعت بعصت "خربت" الجو بنفسيتك
سعد : اجل جب لي قهوه لاخرب جوك
مرو ستاربكس واخذو لهم قهوه وقال سند : الساعه كم
فارس : مابقى شي على الصلاه
سند : اجل في مسجد هنا مع الفه ذي وقف عنده نصلي وبعدها للبيت تعبنا فرفره من ساعه وحنا بالسوق تكسرت
،
بيت ابو فارس
غرفة لينا كانت قاعده تتأكد من اغراضها للعيد وتجهزهم لفت على احد دخل الغرفه بدفاشه الا طلعت خوله
خوله بصراخ : اقوول
لينا وهي ماتطالعها اصلاً : الي اعرفوه ان الشخص لما يدخل غرفة احد يطق الباب على الاقل !؟
خوله : بتعلميني الاحترام ذا الناقص والله علمي حالتس اول؟؟ معلينا جيت اقول لك اغراضك واغراض رجالك خدامتنا مو مسؤله عنهم انتِ الي تسوينهم واي بعد بكرا لاتعزمين احد لبيتنا مانستقبل معارفك واشكالك
لينا نزلت الي بيدها وتوجهت لها : والله يحيي الخدامه ان طلبتها مالتس شغل والي اعرفوه ان فارس هو الي جابها بهاه والا انا غلطانه يعني ماهي لتس لحالتس تسوي اغراضتس بس وثاني شي اذا بعزم انا اعزم ببيت عمي وببيت رجالي لاحتسو هم وقالو لاتعزيمين ذيك الساع ماعزم فاهمه والحين تقلعي برا الغرفه يلا
خوله : نعممم نعمممم تطرديني بعد والله صدق الي قال شين وقواة عين اسمعيني زييين وحطي كلامي حلق بذنك انا الي اقوله يمشي يمشي من ورا خشمك فااهمه
لينا : وش تبين تنابحين عندي انتِ تبين الهواش غصب؟؟ واعلى مابخيلتس اركبيه يلاا براا
طلعت خوله بغضب وهي تسوي حالها تبكي وبالها انتقام من لينا
،
حايل وتحديداً بالمسجد
خلصو صلاه واول ماطلعو من المسجد استوقفهم صوت ابو هاشم "واحد من جماعتهم "
ابو عساف وهو يسلم عليه : هلا والله
ابو هاشم : هلابك يبو عساف
ابو عساف : وش وقعك ان شاءالله بخير
ابو هاشم : بخير بخير . سلم على نياف وعساف ووجه نضره لـ ابو عساف وهو يقول : فطنت "انتبهت" لكم بعيد قلت اجي اسلم اشوف وش وقعكم"اخباركم " وعندي كلمة راس معك يحسين
عساف ونياف : اجل حنا نستاذن بننهج للبيت
راحو وقال ابو عساف : امر ؟
ابو هاشم : الي بقوله لك يخص عساف
ابو عساف استغرب : احتس "قل"
......
خلص البارت حبايبي ،،
نزلت اكم البارت قبل الموعد بيوم 💗💗💗
وش تتوقعون الي بيقوله ابو هاشم؟؟ وهل الشي ذا بيأذي عساف او خير له!؟ وايش خطت خوله وبيصدقونها او لا 🏃🏻‍♀️