علميني ي دنياي وش ذنبي

Part 16

الساعه 7 بيت ابو فارس
تجهزو البنات وكشخوا وينتضرون الضيوف يجون ..
وماهي دقايق الا وصلو ام سند وخوات سعد وصحبات خوله
ريم وهي تسولف مع ميلاف : شوفي يخزونا من اليوم
ميلاف : تدرين وشهو ودي
ريم : وشو؟
ميلاف : ابيهن يفتحن فمهن بكلمه بس والله وانا بنت حسين لامسح بخشهن القاع
ريم ضحكت : ياليت تفكينا من عيونهن قطعتتا
سُلاف الي جالسه قريب منهم : الوكاد "المهم"عذال ماعليتس منهن
اما عند خوله وصحباتها
خوله : اي يع ذي ام شوشه ينقال لها ريم وغثيثثه ودلوعه بشكل يعع
صحبتها حنين : حرامم شعرها يجنن حلمي ذا كيرلي ودلعها حلو طبيعي مو متصنعه ابداً
خوله : اقوول اسكتي اذا بتمدحين
حنين ضحكت : خلاص كملي
خوله : والي جنبها الثنتين بنات عمي توأم وغثيثات الي لابسه فستان وردي بكاايه اسمها سُلاف والثانيه عووبه واسمها ميلاف والي هناك بنت عمي ومرت اخوي لينا والي معها اخت ريم هيام وعجايز قريح مرت عمي وام خوي فارس سند
حنين : يبنننت يجننن كل وحده تقول الزين عندي
خوله بقهر همست : حنييين!!!
حنين : تدرين اساميهن ريم وهيام زي اسامي بنات خالي؟
خوله بحقد وغيره : يع اسمايهم خايسه
سكتت حنين وهي عارفه ان كلامها غيره فقط
لفوا على البنات
ميلاف ضحكت : تدرون وش ودي؟
الكل : وشو
ميلاف : اشغل السماعه وارقص لكم
الكل بصوت واحد : لااا
ميلاف : وش نوحتس انتي وياها تصايحين وش حتسيت بوه انا!؟
ريم : معليكِ جيبي وانا معك
هيام : لا نبي نسولف
ريم : نرقص وبعدها نسولف
ميلاف : لولو عندك سماعه ؟
لينا : اي بغرفتي
ميلاف : انهجي جيبيّه مادل
قامت لينا جابتها وبدت فقرة الرقص
سُلاف لـ حنين : وش اسمتس؟
حنين ببتسامه : حنين وانتي؟
سُلاف : سُلاف .. قومي ارقصي معنا ؟
حنين : ابشري .. وقامت ترقص وذا الشي الي رفع ضغط خوله
،
عند الرجال
فا كان فارس يقهوي ووراه نياف يحط التمر عند الكل عشان يقدعون وكل شوي يتبادل فارس ونياف اما عساف وسند وسعد فا رضفوا فارس ونياف انهم يساعدونهم
اما الكأن الي المفروض هو مكان نياف يساعد اخوه جالس ويدخن وذا رفع ضغط فارس الي وقف قدامه وقال : قم
طارق : يحوول وش تبي !
فارس بهمس غاضب : واقسم بالله لو ماتقوم لاتصير مسخره قدام الكل قم اخلص
قام طارق وطلع برا مع فارس
فارس : سوال ورد غطاه انت رجال انت؟؟
طارق بغضب : احتررم حاللك!
فارس : يلعن عدوك يشيخ الكل عرض انه يساعدن والي قام يساعدن وانت من اهل هالبيت جالس كنك ضيف؟؟ تعبتن معك متى تفهم بالله؟
طارق : ماتوقع اني مجبور اقوم واسوي واذا كانك تعبت مني فا يفضل تعتقني ووتركني مالك دخل بي ! وبعدين والله والي عازمهم عاد هيلق وناس اول مرا نشوفها اساساً
فارس سحبه معه بغضب بعيد وهو يقول بغضب : لا مجبور ومجبور ونص بعد وانا المسؤول عنك لين تغدي "تصير" رجال ينشد بك الضهر اما الضيوف من تبي اعزم لك استاذ طارق! ليكون تبي اعزم الصايعين امثالك وان كانك ماعرفتهم لانك خبل ماتخاوي ولا تعرف الا الداجين لو تعرف الرجال الي هنا مو ذا وضعك واسمعن زين تدخل وتاخذ الدله من نياف وتقهوي وتباشر بالضيوف وتحوفهم حوف وتصير رجال ولا ترا والله تشوف الي مايسرك وانت تدري حتى ابوي مايفكك مني وقته
تأفف طارق بغضب من تسلط اخوه "بوجهة نضره تسلط" وهو يتوجه داخل مد يده لـ نياف بدون نفس وقال : هات
لو كان فارس الي قال لـ نياف ياخذ الدله كان رفض لاكن دامه طارق عطاه
نياف جلس جنب عساف : اخ تعبت
عساف : قلت لك عطن الدله انت مهبول تحب الشقى
نياف : تخيل يخوي اجلس وانت تقهوي بدالي ماصارت ولا بتصير
عساف ابتسم : نتساعد مابوه مشكله
نياف : معلينا اخذها الدلخ ذا شف حتى قهوه مايعرف يصبّه للمعازيم
عساف : قلتهّ دلخن مايفهم بشين المهم اسمع شرايك لو رجعن حايل املك على بنت ابو هيثهم ؟
نياف لف عليه بحماس : صادز؟ اي يخوي ذي الاخبار الزينه
عساف ضحك : اعقل عطيت الرجال ضهرك
نياف استوعب : يووه نسيتوه
اما ابو عساف كان مع اخوه ابو فارس بين مجموعة شياب اشر ابو عساف لـ نياف الي جاه : سم يبه
ابو عساف : نياف يبوك رح شف عيال عمك عاونهم
نياف : ابشر
رجع لـ فارس وقال : فويرس وش اساعدك بوه؟
فارس : مامن شي تساعدن بوه بس ناد سند
لف بيناديه الا ذا سند جا يمهم
سند : وش فيكم واقفين كذا اسوي معكم شي؟
فارس : لا لا مافيه شي بس اتصل على رقم الي ارسلته لي امس وشف العشاء متى يجيبونه جوالي طفى
سند : ابشر بس باسم من؟
فارس : قل له ابو فارس
اتصل الا قال انهم قريب البيت وطلعو العيال يدخلون العشاء ويوزعون العصاير والخ..
وبعد العشاء بدا الناس تخف لين راح الجميع من الحريم ومن الرجال وطاح الكل ينام
،
نروح لـ حنين الي اتصلت على اخوها وجاء ياخذها
بالسياره
هيثم : ها انبسطتي عندهم؟
حنين : اي
هيثم : تعرفتي على صحبات جديدات!
حنين بحماس : ابشرك تعرفت على 5 صحبات واخيراً ماعاد صديقتي الوحيده خوله
هيثم : زين حلو خليك كذا اجتماعيه
حنين : ان شاءالله
دام سكوت بسيط لين وصلو البيت ونزلت حنين اما هيثم فا ضل يعدل سفطت السياره
اول مادخلت البيت لقت قدامها ابوها معصب : ليه تأخرتي؟؟ ومع منهو جيتي!
حنين : ماتأخرت بعد العشاء على طول جيت وجابني هيثم
ابو هيثم بحده :  واشوف هيثم وينه تكذبين علي انتي مع منو جايه
لفت حنين على هيثم الي جا وقالت : هاذا هو
هيثم : وش فيه
حنين : ابوي معصب عباله ماجيت معك وجايه مه احد غيرك
هيثم : يبه!
ابو هيثم انحرج : الحرص واجب
حنين وهي عارفه انه شك مو حرص قالت : فرق يبه بين الشك والحرص .. ولف بتطلع
انفتح الباب ودخل عواد وبسرعه سحب هيثم شماغه يغطي اخته وقال : اطلع عواد دقيقه!
طلع عراد الي انحرج بس عباله ان البنات بغرفهم زي دايم
رقت حنين فوق لغرفتها
هيثم : ادخل عواد
عواد دخل وقال : ماتوقعت فيه احد بصاله معليش
ابو هيثم : وانا كم مرا اقول لك لاتجيي هنا البنات فيه؟؟
عواد : والله عاد مادريت ان فيه احد ولا دايم لاجيت ادخل انادي اول
هيثم : حصل خير
ابو هيثم : اي خير وهو بغى يشوف اختك مصيبه ذي!
عواد خز عمه وطلع وهو طابت نفسه من الجلسه اصلاً
هيثم لـ ابوه : يبه لاتنسى ان البيت بيته بالنهايه حنا ضيوف وغير انك مناشبه لمياء ماتتغطى وحنين اذا نزلت دايم معها شيله احتياط لو دخل تتغطى بها !
ابو هيثم مارد وراح غرفته
" عائلة ابو هيثم عم عواد
ابو هيثم : انسان حقوود مثل البعير لاحقد حاقد على اخوه فا بالمقابل اخذ بيت اخوه بعد مامات مع انه عواد يقدر يعيش به لحاله لاكن يبي يضيق على عواد عشان يغثه بدال ابوه المتوفي ..... عمره 59
ام هيثم : تصير عمة ريم وهيام وسعد ومرت عم عواد سبحان الي جمعها مع  زوجها تشبهه بالطبع بالضبط ودايم تطلع حرتها بـ حنين والدلع كله لبنتها لمياء ... عمرها 58
هيثم : طيب وحبيب وهادي بطبعه مايحب المشاكل لاكن يوقف مع الحق لو على قص رقبته .. مهندس وعمره 30 متزوج وعنده ولدين
لمياء : دلوعه ونرجسيه واكبر كذابه على وجه الارض ام 100 وجه مو وجهين .. عمرها 28
حنين : حبوبه وطيبه وقويه بشخصيتها اكثر انسانه مضلومه ببيتهم ومع ذالك ماغير بطبعها الحلو شي ... عمرها 22  اخر سنه بالجامعه "
،
وبكذا خلص اليوم بهدوء
-تسريع بالاحداث مر يومين وكان في هاليومين عزيمة سند وبعدها سعد-
،
يوم المسابقه بيت ابو فارس
ميلاف بتوتر : يلا يلا راح الوووقت
لينا : تو الناس لاتتورين وتوتريّن معتس
سُلاف : لا صدق راح الوقت امشوا
خوله ببتسامه مستفزه : عاد تدرين وش يضحك لو على حماسك ذا خسرتي هههههه شكلك بيكون تحفه وعاد التصوير والاعلام بكل مكان
ميلاف : ماهي بنت حسين الي تخسر يبعدي وبعدين لنفترض اني خسرت مسابقه فوز وخساره مو قاعدتن لا هدف اسعى لوه ولا شين مغير اتزرا "اطقطق " على الناس وانا خرطي ولا؟
خوله : بدون هدف ولا هدف اموت ولا اوصل له! هههه تضحكين
ميلاف : وليه نسميّه هدف اذا هو سهل ؟ تدرين وش الي يضحك صدز! اني احتسي مع وحدتن مثل الجدار تقلعي بس
ام عساف جت : يلا ابوكم واخوانكم بنتضرون
طلعوا الكل وفضى البيت
وكان فارس معه ابوه وعمه وزوجة عمه
نياف وطارق من قرادة الحظ مع بعض بجبار من ابو كل واحد فيهم
عساف معه خواته وبنت عمه خوله
وتوجهو لـ مكان المسابقه بحماس وتوتر وخوف للبعض
،
بيت سعد
هيام : سعد نايم شكلنا ماراح نحظر
ريم : لا لا بروح اصحيه
توجهت لـ غرفة سعد وقالت وهي تهز سعد بشويش : سعدد.. سعد قوم .. سعد يلا بنروح للمسابقه قم
سعد ابعد يدها بقوه ولف على الجهه الثانيه يكمل نومه
ريم : سعدد قم تكفى راح الوقت يلللا
سعد بنرفزه وعصبيه : ريممم اطلعيي عني وسكري الباب وراك
ريم : قوم وعدنا البنت نحظر المسابقه يلاا قومم
سعد بعصبيه وبها صراخ : اووووه اطلعي قعدت قعدت
ريم ماستغربت صراخه عشانه تو قاعد وتعرف اخوها حنون لاكن اذا قعد من النوم تكون جنونه قايمه معه : طيبب مو ترجع تنام .. وطلعت
هيام : ها بشري قعد؟
ريم : ايي ماتسمعين صراخه
هيام : عادي ريوم لاتاخذين بخاطرك تعرفين طبعه نومه ثقيل ومايحب احد يقعده
ريم بصدق : عادي معليك تعودت
لبسوا عباياتهم ينتضرون سعد يجي ماهي نص ساعه الا طلع بعد ماتروش على السريع وصلى الظهر
سعد : خلصتوا؟
البنات : اي
سعد : يلا اجل امشو
هيام : نووور
نور جت ومعها صحن فيه ساندويتش وفوق الساندويتش ببسي.. اخذته هيام وطلعوا
سعد مسك ريم قبل تطلع : بنتي زعلانه علي؟
ريم : لا شدعوه تعودت على هواشك
سعد بندم وضيق : ريوم يعيوني والله ماقصدت بس فلتت اعصابي تعرفين طبعي اذا قعدت مو شبعان نوم
ريم ابتسمت ووضح انها بتسمت من تحت النقاب وقالت : معليك مازعلت والله
سعد ابتسم : اجل يلا امشي اركبي لانتاخر .. ركبت ريم وقبل يركب السياره سعد شاف سند طالع من بيتهم وهو يساعد امه تمشي
سند من سيارته : زين لحقنا عليك نحرك مع بعض
سعد من سيارته بعد : تم يلا
قفل سعد الشباك وقالت هيام : سعد ذا ساندويتش لك كل قبل نوصل
سعد : يعطيك العافيه يعيوني
هيام : امين
،
عند سند بعد ماركب سيارته وحرك متوجه لـ المسابقه
ام سند : شرايك يمه لو خطبت لك بنت ابو عساف الي اليوم مشاركه بالمسابقه
سند بسرعه : لا يمه الله يرضى عليك لا
ام سند بستغراب : ليه؟ بنت ولا كل البنات جمال واخلاق وادب واحترام !
سند : ونعم فيها يمه ماني بقايل شي بس قفلي هالسيره انا الزواج كله مو ببالي مو شي بالبنت نفسها
ام سند احترمة رغبته وقفلة السالفه وبعد هالنقاش صار هدوء تام
سند تذكر لما سمع صوتها بـ حايل ولما شافها بالغلط اعترف انها فعلاً جميله الا فاتنه لاكن مستحيل زواجه منها مو عيب فيها لاكن اهلها من قبيله معروفه ماراح يزوجون بنتهم من شخص متبنى وغير معروف اهله الحقيقيين ولا قبيلته؟ صح انه رجال طيب واخلاقه سابقته لاكن العادات والتقاليد تمنع حتى لو هو يتبع اسم ابوه عقاب بس الحقيقه هو مو ولده .. عقاب متبنيه وام سند مرضعته بس الناس تبي نسبه الحقيقي ...
قطع تفكيره وصولهم لمكان المسابقه ،
نزلو وجلسو بمكان الجمهور بجانب عائلة ابو عساف وابو فارس
،
نياف وطارق "المصيبه بتصير لا محاله دامهم اجتمعوا"
طارق بضحكه مستفزه : هه مسوين غيورين على خواتكم وانتم مخلينهن بالنسابقات نع الرجال ونعم والله الغيره ههههه
نياف وقف السياره بسرعه بنص الطريق : شف ماداموه ماوصلن للحين كمركلمه وحطن بصماخك "راسك" ذا تلايص لاسمع لك نفس ولا والله اجرم بك
طارق بضحكه : لييه افا ي الضابط نياف تسوي شي مو قانوني لا لا مايصير
نياف ضحك بقوه : شف من يحتسي اقولل ترا انا لو ابي اوديك ورا الشمس وديتك بمجرد ما احط عسكري واحد بس يراقبك علشان تسذا انا اقول خلن معك بشخصيتن العاديه لاطلع عليك شخصية الضابط وتعرف تحتسي وقتّه
طارق خاف من انه يتفذ تهديده بس قال يحفظ كبريائه علشان مايقول خاف : اسكت بس يهدد بعد
نياف ضحك بستخفاف
،
عند ميلاف كانت لابسه لبس فروسيه لاكن كان عباره عن " البالطو لين ركبتها بالون الاسود وبنطال وااسع بالون الاسود بعد ومتحجبه ولابسه نقابها مع ادخال طرف بسيط بالطرحه علشان مايتحرك ويطلع وجهها "
ميلاف لـ سهم : سهم حنا قدها صح خلنا نكسر عين خوله ونوريها حنا منو ونرفع راس ابوي واخواني
سهم صهل بصوت عالي بـ استجابه لكلامها .. انتطت الخيل بتوتر وتوجهت للمضمار بشموخ عكس التوتر الي داخلها وبدت تقول الاذكار وتدعي
ارتكزت بجلستها اول مابداء العد التنازلي
بدا السباق وكان رقم 6 ورقم 8 ورقم 10 سابقينها
ميلاف بصراخ : يلااا سهمم يلااا ابوي يبحر بي "يشوفني" خلن ارفع راسوه يلااا
وفعلاً اسرع سهم بسرعه وتعداهم باقي قدامها رقم 8 بس
رقم 8 بصوت عالي تسمعه : مابقى الا بنت تفوز علي هه
ميلاف تنرفزت وقالت : تفوز وتكسر راسك بعد
اسرعت بـ سهم وهي تقول له : سهممم يلااا شد حيلك سهم بس شويي قربناا
وبلمح البصر تعدت ميلاف رقم 8 وفازت
،
عند المشجعين
البنات
سُلاف ويدها على قلبها : بنات احسّه بتهفي "تطيح" من السرعه
لينا : تفاولي خير
سُلاف : متوترهه
ريم : هدو بنات شوفو ان شاءالله مو صاير الا كل خير وهاذا هي تعدتهم باقي ثنينه بس
هيام بحماس  : تعدتت باقي واحد بسس
دقيقه وصرخو البنات كلهم بفرحه وهن يحضنن بعض : فااااااااززززتتتتت
ام عساف ارتخت اعصابها الي انشدت طول المسابقه وقالت بفرحه : يالله لك الحمد يالله لك الحمد والشكر
ام سند : مبرووك فوز ميلاف يـ ام عساف 
ام عساف حضنتها : الله يبارك فيك
،
عند الرجال
ابو عساف كان شعوره غريب ماييقدر يحدده شعور فخر وشعور خوف فخر في بنته وخوف عليها طول المسابقه وسبحته في يده يستغفر ويدعي لها
ابو فارس : والله مهزله بنتك تسابق بين الرجال
ابو عساف بعصبيه : يابو فارس لاتخليه تخرب بيني وبينك خلاص فكن
ابو فارس سكت ورجع ابو عساف يستغفر ويدعي لـ بنته
عساف كان يتفرج بتوتر وحماس
سعد وطارق كانو يوشوفون المسابقه ببتسامه هدوء بس النوايا تختلف سعد متحمس للمسابقه لانه له فتره ماحضر مسابقه اما طارق فكان نضرات خبث لاغير
اما نياف فا اول ماتعدت اخته المتسابقين وصار قدامها رقم 8 فقط صرخ بحماس : حيييههه اخت نيااف
عساف دقه بمزح : اختي ترا يالطيب
نياف : واختي ههه
سند فا كان متحمس وبنفس الوقت يفكر ويقول يحظه لو كانت من نصيبه بس عارف هالشي مستحيلل
اول ماتعدت ميلاف رقم 8 وفازت صرخ الجميع بحماس والي صرخ بفخر طبعاً معدا "طارق" الي التزم الصمت بقهر
،
بعد ماكرمو ميلاف توجهت لـ اهلها وهي مو قادره تعبر عن فرحها
ابو عساف حضن بنته : مبروووك الفوز يعيون ابوتس رفعتي روسنا والله
ميلاف بضحكة فرح : الله يبارك فيك يامليي
ابتعدت عن ابوها وهي تحضن عساف الي بارك لها بفرح ومن بعده نياف الي كان يبارك لها ويحارشها ثنين في واحد
توجهت ميلاف لـ امها الي بكت من زود الفرح وهي تحضن ميلاف
ميلاف : يمه يحيي ليه الدموع ذي
ام عساف : فرحانتن لتس يـ امي
ميلاف : افرحي بدون هالدموع تكفين لاتبكيّن
ام عساف مسحت دموعها وهي تقول : مبروك
ميلاف : الله يبارك فيتس
ابتعدت ميلاف عن امها وهي تسلم على الباقي الي يباركون لها وطبعاً اول ماوصلت لـ خوله بدال ماتسلم عليها قالت ميلاف : ها فزت علشان تعرفين شلون تتحدين بنت حسين
خوله بستهزاء : ومن تكون بنت حسين ذي؟
ميلاف : تاج راستس
ركبوا الجميع السيارات وبدوا مسيره بالاغاني وتطويط السيارات "البوري" من الفرحه بفوز ميلاف
اما بطلتنا فا كان شعورها غريب كان حلم بنسبه لها تفوز بالمسابقات واول مسابقه دخلتها فارت فيها شعور الفرح طغى عليها لدرجت تحس الدنيا كلها ماتوسعها
سُلاف حطت يدها على كتف اختها : وش نوحتس كنتس مبسطه؟ "ساكته "
ميلاف ضحكت بفرحه : مابوه شين بس جتن لحضة ادراك اني فزت بهالمسابقه
سُلاف ضحكت : عقبال كل المسابقات يااارب
ميلاف : امين
قطع كلامهم وصولهم لـ بيت ابو فارس واول مادخل الجميع قال ابو عساف : وبمناسبة فوز بنيتي باتسر عازمكم على العشاء واعزموا الي تبون واهم شي اعزموا سند وسعد
نياف صفق بحماس : اييي بوه مفطح يعني؟
عساف ضربه على ضهره بخفه : الي يسمعك يقول ماعمرك ذقت هالمفطح وانت لك اسبوع تبلعوه "تاكله"
نياف ضحك : انا رجال اهم ماعلي بطني
ميلاف : عز الله هههه
عساف لـ ابوه : يبه شرايك لو تخلي العشاء بيننا بس عايلتن
ابو عساف : الشور شور اختك العشاء بكبروه لها
توجهت الانظار لـ ميلاف الي قالت : اي يبه بس عندي فكرتن زينه
ابو عساف ببتسامه : وش هالفكره يعين ابوتس؟
ميلاف : يكون العشاء بالشاليه نحجز شاليه باتسر ونتعشى بوه
ابو عساف : بهالبرد !
ميلاف : تون دخلن الشتاء مهو ببرد
ابو عساف : تامرين امر خلاص احجزوا وعطين حساب الشاليه احول لوه واعزموا سند وسعد ترا من اليوم ورايح اي شي يصير لو انوه عايلتن بس تعزمونهم تراهم بحبسة عيالي
الكل : ابشر
ميلاف توجهت لـ ابوها بفرحه وهي تحضنه
ابو فارس : يلا وقفتنا بالحوش تعبتن خلونا ندخل
لفوا على الباب الي انفتح وكان طارق وريحة الدخان تسبقه
طنشوا ودخلو وقعدوا الرجال يتقهوون بالديوانيه والحريم داخل البيت والعاملات يسوون العشاء
،
بيت سعد
دخلوا وقالت ريم : ماشاءالله عليها ميلاف خياله
هيام : اي ماشاءالله فازت عليهم بغمضة عين
ريم وهي تجلس : ودي بصراحه اهديها بمناسبة الفوز
هيام : وش تهدينها؟
ريم : مادري بس مسابقه كبيره مرا واول مسابقه لها فا لازم هديه حلوه
هيام : انا ببالي هديه بس احسها مو حلوه تطلع
ريم : وشو الهديه؟
هيام : واضح انها تحب سهم " الخيل" مرا فا فكرت ارسمه لها
ريم : الله حلووو والله تطلع هديه حلوه وغريبه عن المعتاد بس يمديك تخلصين الرسمه اليوم؟ لانو انوقع بكرا يروحون لـ حايل
هيام : اي اقدر اسهر عليها واخلصها
ريم : اجل ارسلي لها ترسل لك الصوره وابدي فيها الحين
دخل سعد : للحين بعباياتكن هههه
ريم : نفكر بهديه لـ ميلاف
سعد بصدمه : تبون السوق الحين!
ريم وهيام ضحكوا وقالوا : لاا
ريم : يعيوني انصدم هههه نطلبها من اكاونت المكان ويجيبونها لعندنا وهيام قررت ترسم سهم لميلاف
سعد ابتسم : يحظهم دام اختي الي ترسم لهم افضل رسامه
هيام ابتسمت بخجل : عاد ان شاءالله تطلع حلوه
سعد : مافيها كلام اكيد بتطلع حلوه .. بعدين اخوكن جوعااان
ريم : افا الحين يجهز الاكل
هيام : يخسى الجوع
وراحن ينزلن عباياتهم وبعدها يساعدن نور بالطبخ
اما سعد انسدح بمكان جلستهم اليوميه ينتظر يخلص الاكل
بعد 6 دقايق بالتمام طلعت نور وهي تسحب ريم الي تضحك وتجلسها : هاذي موشكل كثير خلي يجلس هنا مافي قوم بعدين كلو اكل خرباااان
ريم جلست وهي ميته ضحك على هواش نور لها بالمطبخ
سعد ضحك : وش مسويه ريوم مخليه جدتنا تعصب؟
ريم : ماسويت شي بس الجده اليوم مالها خلقي هههه
،
ييت ابو هيثم
حنين كانت نايمه فجأه فزت على الباب الي انفتح فقوه لدرجة انه رضخ : بسم الله وشو وش صاير؟
ام هيثم : قوميي بس نايمه ساعديني تعبت من هاليوم واقفه لحالي!
حنين بستغراب : ليه وين العاملات ولمياء؟
ام هيثم : قولي ماني بقايمه بعد؟
حنين : ماقلت ييمه بس اسأل
ام هيثم : يلا قومي اشوف
قامت بكسل دخلة الحمام "يكرم القارئ " تتروش ولما طلعت صلت ووتوجهت لـ امها وقالت : ماجاء هيثم !
ام هيثم : لا
حنين : طيب شسوي معك
ام هيثم : سوي حلا بتجي مرت اخوك اليوم
حنين : طيب . وبدت تسوي حلا والعامله تسوي القهوه وامها تبخر البيت واول ماخلصت توجهت غرفتها تلبس وتحط ميكب خفيف
الا على وصول اخوها وزوجته وعياله سلمت عليهم وجلست تلعب عيال هيثم
ام هيثم بعصبيه : تعالي قهوي معي مو تلعبين مع الورعان
هيثم لـ زوجته : قومي قهوي
حنين : لا اجلسي انا اقهوي
عادل ولد هيثم الاكبر : عمه العبي معاي
هيثم : حنيني ام عادل ماهي ضيفه معليك هي تقهوي
ام هيثم : هيثم!
هيثم : خلاص يجماعه شفيكم؟
قامت ام عادل تقهوي عمها وعمتها وزوجها وتوزع الحلا وحنين تلعب عيال اخوها
وبعد نص ساعه تقريباً نزلت لمياء الي توها تقعد من النوم سلمت وقعدت وقامت ام هيثم تقهويها لاكن قال هيثم : يمه اجلسي تقدر تقهوي حالها
ام هيثم : عادي انا بقهويها توها قاعده
كان الحدث ذا قدام حنين الي لاحظت الفرق في تعامل امها معها ومع اختها
.
.
وبكذا نوقف البارت .
ماتلقون كاتبه مثلي تعبانه وكاتبه لكم 3020 كلمه 🤣🏃🏻‍♀️
عطوني رايكم بـ عائلة ابو هيثم 🌚