علميني ي دنياي وش ذنبي

part 44 "the end"

مر من الوقت ربع ساعه وطلعوا ميلاف وبنتها بعد ماتطمن الطاقم الطبي عليهم وتأكدوا انهم بخير وصحتهم كويسه
دخلوا ميلاف غرفة خاصه اما بنتها ودوها الحضانة وراح معهم سند وهو يشوفها وانواع المشاعر اجتاحته ماقدر ينطق كلمه وحده غير انه شكر لله على عطاياه كان بخاطر سند يكون اول ضنا له بنت وصار الي يتمناه تنهد براحه وهو ياخذ نفس من قو الشعور الي يحس فيه بقلبه شعور غريب عليه وحلو مثل غرابته طلع من الحضانة وهو يتوجه للمسجد يصلي ركعتين شكر لربي وبعد ماسلم من الصلاه بدوا المصلين يجون للمسجد لين أمتلأ بالناس لـ صلاة الفجر
طلع من المسجد وهو يتصل على اول شخص يبشره بولادة ميلاف شخص سند متأكد انه بيزيد فرحت سند بفرحته
ماهي ثواني الا وصله الصوت : هلا وغلا
سند ببتسامه : هلابك زود ياجنتي اخبارك
ام سند : صرت بخير بعد سماع صوتك
سند : يمه عندي لك بشاره
ام سند : عسى خير
نطق وهو متشوق لـ ردة فعلها : صرتي جده يميمتي
ام سند بفرحه وصدمه : استحلفك بالله؟!!
سند : والله يـ يمه جتني بنت مثل القمر
ام سند بكت من فرحتها وهي ماعرفت تعبر غير بالدموع ونطقت بصوتها الحنون الراجف من البكي : يااقلبييي الف الف مبرووك يـ ولدي جعلها من البارريين الصالحين . بدت تزغرت ودموعها تنهمر
سند : ياااابعد الدنيا يبمه والله ان فرحتي زادت من سمعت فرحتك بس اختاري لها اسم يالغاليه
ام سند وهي تمسح دموعها : لا والله ياولدي محد يسميها غيركم
سند : وال..
قطعت حلفه : حلفت قبلك يـ سند ماحد يسميها غيركم وانت تدري اصلاً اني مالي بـ اسماء بنات الحين ماعرفها والله والبنت يبي لها اسم حلو على زمنها
سند : ابشري على خشمي . وانا بمسك الخط شويات بس يجي احد عند ميلاف اجيبك تشوفين حفيدتك
ام سند : لا ياولدي واضح من صوتك انك تعبان مانمت انا اجي مع اهل سعد ولا اهل فارس
قبل يتكلم وصله ان احد يتصل عليه وشاف الاسم طلع فارس : يمه فارس يتصل علي اشوف وش عنده وارجع اكلمك نتفاهم على الموضوع ذا
سكر وهو يرد على فارس : ارحب ياخوي
فارس : المرحب يبقى هاا وين الاخبار وصلت حايل ولا ريحت بوحده من المدن وللحين؟
سند : لا وصلت وابشرك انك صرت عم لـ بنت سند
فارس عدل جلسته : صااادز!
سند ضحك : اي بالله اني صادز
فارس : الف الف مبرووك ياخوي
طارق وهو يسحب فارس : عسى خير؟
فارس بضحكه فرحه : سند صار ابو وصرنا عمام
طارق اخد الجوال بفرحه : مبروك ياخوي جعلها الله قرة عين لكم وبارك فيها
سند : الله يبارك فيكم   واللهم اميين
فارس حط الجوال سبيكر : جايينكم حايل اليوم بأذن الله وبجيب خالتي معنا
سند : لا لا امي انا جاي اخذها
فارس : والله اني انا الي اجيبها ولا تغثن تران حلفت
طارق : دام طلعت لهجة حايل معه لاتحاول لاجيت تلقاه ماخذ خالتي وواصل حايا قبلك
فارس كمل قبل ينطق سند بـ إي كلمه : اي والله لاسويها وبعدين تران امي ميته مير خالتي بحسبة الوالده وجوجو تحبها كلما رحنا مكان قالت ان خالتي تروح معكم ومع مطلق وهي لا . ولا تقول بترد بنت اخوك!
جوجو الي جت تجلس بحضن ابوها بفرحه : عمو جده معاناا!! " عمي جده تجي معنا"
سند كان بيرفض حتى مع حلف فارس لكن لما سمع صوت جوجو جابت راسه بفرحتها وفارس ماجاب طاري جوجو الا وهو يدري ان سند يغليها بالحيل وبيوافق لجلها اكيد : ابشري ياروح عمك انتي بس والله ي فارس ان اسرعت ذبحتك امي معك يعني تمشي حبه ونص تفهم
فارس ضحك : سم
التفتوا على صوت سعد من عند الباب : ي اهل البييت
فارس : اقلط اقلط
دخل سعد وهو يشوفهم حول الجوال كلهم : تكلمون سند؟
قالوا له اي وعلموه ان سند جته بنت وبدت المباركات والضحك والسوالف لين قفلوا
اما سند اتصل بعدها على ابو عساف وعلمه
،
العصر
اجتمعوا عند ميلاف بالمستشفى وطلعوا فارس وطارق وسعد بعد ماشافوا البنت وعطوها هديه وقعد يحلق عليهم سند وهم يحلفون لين رضخ سند واخذ الهدايا
سُلاف وهي تحضن ميلاف بدموع : ميمييي ببتسييي تكفينن توأمي صارت ام
ميلاف حضنتها ببتسامه : حتى وانتي مستانسة تبتسين يختي هههه
سُلاف : شسوي غصب عني
لينا : حساسه حساسه هههه
ابو عساف وهو شايل البنت ويبوسها حط بلفتها فلوس بدون محد ينتبه : ماشاءالله ووش قررتوا تسمونها
ميلاف التفتت لـ سند وهي قالت له قبل يجون هو الي يسمها وبالفعل اختار الاسم : ميلا . اختار هذا الاسم لانه يحسه اقرب اسم لـ ميلاف ويبي حتى اسم اول ضنا له يكون مربوط ب اسمها وعلى قولته عشان حتى بنته تذكره بـ امها
نياف بضحكه : واحد من الربع كان عندوه تسلب ومسميوه ميلا وبنتكم سميتوه
ومامداه خلص كلامه الا رمت عليه ميلاف قارورة المويا وجت فوق راسه
ضحكوا عليه ودخل بالضحك معهم
ابو عساف : لاحول ولا قوة الا بالله اسكت اسكت انت وضحكتك
نياف بضحك : تمون تمون بالوالد
عساف لـ نياف : ليه ببدلتك العسكريه؟
نياف : بوه سجين بالمستشفى ذا وجيت مع العسكر الا قلتوا لي ان ميلاف بهاه جيت اشوفها
عساف : اها
قام نياف وهو يعدل بدلته ويلبس الطاقيه الخاصه بالبدله تحت أنظارها المعجبه وكلها قلووب
نياف : يلا عن اذنكم
الكل : اذنك معك
،
سمحوا بخروج ميلاف وميلا
ومن دخل الجميع البيت كل شخص راح مكان ينام به وكانوا كالتالي
ام عساف بغرفتها مع ابو عساف
ام سند نامت بالمجلس لانها ماتحب الاصوات بالنوم
البنات ناموا بالمجلس الي ميلاف حاطه سرير نفاسها به
الرجال ناموا بالمشب
عساف وهو ينادي من بعيد : ي ريم
راحت ريم للباب الي هو واقف عنده وصاد : هلا
عساف التفت لها : منتي ناويه تنامين بالغرفه الظاهر !؟
ريم : ابوه ابي انام مع البنات
عساف : لا لا تعالي قسمنا
ميلاف من بعيد : عساف خلها معنا بس اليوم
عساف :  للا مرتي ابيها عندي انتن نامن بهاه من غيرها يابعدي
ضحكن البنات على وجه ريم وهي جايه تاخذ جوالها لونه احمر مع ان عساف ماقال شي يحرج لكنها خجولة واستحت اكثر من نضرات عساف لها
،
قسم عساف وتحديدًا غرفة النوم
ريم جلست عند التسريحه وهي تبي ترفع شعرها كله لجل مايضايقها بالنوم
عساف دخل الغرفه ومن شافها بتربط شعرها سحب الربطه وهو يحرك شعرها بعشوائية : تدرين اني احب شعرتس الكيرلي
ريم : كنت بخليه ستريت اليوم كمان بس رحنا عند ميمي بالمستشفى وقلت محد بيشوفه بكرا اسويه ستريت افضل
عساف : لا ياحيي مابوه ستريت على قولتس احبوه انا تسذا منهو أولى انا ولا الحريم الي يشوفونتس؟
ريم : انت بس برضوا مايصير اطلع لهم وشعري مو مرتب احبه يكون ستريت ارتب
عساف سحب الربطة الي كانت بترجع تربط شعرها بها : ياملي انتي وش نوحتس غاديتن تناحين ماعليتس من الناس انا اشوف شعرتس مرتب تسذا ووش زينوه والله اني صادز انوه تسذا ابرك من الشعر الناعم مليون مره                                   
ضحكت بخفيف : خلاص خلاص بتركه كيرلي . جلست على الاريكه الي هو قاعد عندها وفركة يديها بتردد
عساف وهو لمحها بتقول شي وسكتت بعدين : بوه حتسي تبين تقولينوه قولي الي عندتس
ريم بخجل : انا حامل . غطت وجهها الي تلون بالاحمر من ضحكت عساف المصدومه وهو يمسك يدها : صدز ولا تتسذبين!
ريم هزت راسها بمعنى صدق ... 
،
صباح ثاني يوم
انتشر خبر حمل ريم
سعد اتجه لـ اخته وهو يحضنها بشده : اختي وبنتي وصديقتي كبرت وبتصير ام صدق؟
ريم كانت متقطعه من الخجل وهي تهز راسها بـ اي
سعد باس راسها بفرحه : الف الف مبرووك ياعيون اخوك انتي
ريم : الله يبارك فيك سعودييي
وبعد مده ودعها سعد وودع هيام وهو يركب سيارته متجه للرياض وكذالك فارس
،
اما سند الي دخل عند ميلاف وهو يسمع كلامها مع ام عساف
ميلاف : مابيي يمه مابيي اكل
ام عساف بصدمه : مهبولتن انتي جايبتن وغد تراتس لزوم تاكلين
ميلاف بتحطم : يمهه صايرتنن دبه وش كبريي مثلل خولوه مابيي مابيي بسوي رجيمم
ام عساف بقل صبر : اقولل عادد هذا الاكل قدامتس ان رحت وجيت ماشفتتس بالعتوه ي ميلاف مايصير لتس طيب لعنبو عدوتس خواتتس قبلتس ماجنني مثلتس وش نوحتس انتي!!!
طلعت ام عساف وشافت سند وهي تبتسم له : جننتن البنت ذي هههه
سند : ههه حيلك بها ياعمه خليها تاكل وتصير كبر الباب
ام عساف بضحكه : ابشر . وراحت
ميلاف : اي ايي تعاونوا علي
سند : وش عندها الحلوه زعلانه
ميلاف : حاطتن لي امي اكل كلوه دويات يسمن بقل سنع مابيه
سند ضحك : قل سنع اجل ؟ واكل المطاعم وشو بقاموسك؟
ميلاف بكذب وضحكه : يزيد فيتامينات الجسم ويقوي العضلات ويقوي التركيز ويشبع البطن
سند بتمثيل للصدمه : كل ذا به وتونا ندري
ميلاف : شفت شفتت اقول لكم ماتدرونن
سند ضحك وهو يحط الاكل عندها : كولي بس يلا لاعلم امك
تنهدت بحزن وهي تاكل
اما سند اخذ ميلا الي توها صاحيه وهو يبوسها بقوه : هلا هلا بحبيبة ابوها توها ننور الدنيا والله
ميلاف : دلعها دلعها بعد!!
سند ضحك بصوت عالي على رفعة حاجب ميلاف وهي تتكلم : تغارين
صدت : لا
ابتسم وهو عارف انها غارة .. رفع ميلا وهو يبوس غمازتها الي بنفس مكان غمازة ميلاف وبعدها ودع ميلاف ووصاها على نفسها وعلى ميلا وانها اذا بغت شي تتصل عليه وبعد كذا طلع هو وامه متجهين للرياض وهو الي الود وده يقعد توه ماشبع من بنته لكن يستحي يقعد ببيت ابو عساف اكثر ويعرف ان ابو عساف مستحيلل يخليه يروح فندق وبيحلف عليه يقعد ببيته
وسند مايحب يقعد عند احد فتره طويله وغير ان امه يدري انها ماترتاح عند الناس
،
بعد صلاة المغرب
كانوا قاعدين حول سرير ميلاف يتقهوون ومبسوطين وابو عساف كانت بحضنه ميلا يلعبها وهو مستانس بالحيل بثالث احفاده وغير انها بنت اغلى بناته واقربهم له والفرحه زادت بعد مابشرهم عساف الصبح ان ريم حامل وكانوا يدارونها بالحيل لجل ماتتعب وام عساف من عرفت كانت ماتخليها تقوم اصلاً كل شي يجي لـ ريم وهي قاعده
ام عساف ببتسامه وحسن نيه : وعقبال ان شاء الله يجينا حفيد من نياف
نياف انتبه على ملامح هيام الي تبدلت ونطق عشان مايشكك احد بشي : ان شاءالله مير انا ودي اهجد انا واموه قبل يجي خوفي يوم يجي حنا مستخفين ويستخف معنا زود
ضحكوا الكل من نياف وحركات يده وهو يشرح لهم ان الابوه بديره وهو بديره  وهيام بديره
ام عساف : يلا قوموا خلونا نترك ميلاف تنام شوي دام بنتها نايمه
طلع الكل ونياف وهيام ركبوا سيارتهم وراحوا ومن بعدهم طلعوا عساف وريم للمستشفى يتطمنون على البيبي
،
نزلوا من السياره ودخلوا للمستشفى
التفت لها وبهمس حاد غيور : شعرتس طالع غطيه
سحبت الطرحه تغطي فيها شعرها وهي تدخله داخل العبايه عشان مايطلع : طيب ليه معصب مانتبهت
عساف : ماني معصب مير انتبهي مرا ثانيه مو تمشين وخلق الله تناضر بتس وبشعرتس!
ريم ضحكت بمزح وستهزاء : ايي من الحريرر الي يتطاير مع الهواء ترا شعري كيرلي
عساف : وش زينوه خلي عناس بس
مسك يدها يدخلون عند الدكتوره وبعد عدة اسأله بدت تسوي لـ ريم سونار
الدكتوره ببتسامه وهي تأشر على السونار: ذا الجنين
كانوا يناضرون مكان ما الدكتوره أشرت وانواع المشاعر الجميلة اجتاحتهم مشاعر غريبه وحلوه بشكل اتعب قلبهم من جماله
الدكتوره : واضح ذا اول بيبي صح؟
ريم : ايوه
الدكتوره : ماشاءالله الله يتممه على خير
قامت ريم وهي تجلس عند مكتب الدكتوره وعساف قدامها
الدكتوره : انتِ بـ الشهر الاول ي ريم وراح نصرف لك فيتامين لازم تستمرين عليه لين الموعد الجاي لك ان شاء الله
ريم : تمام دكتوره يعطيكِ العافيه
الدكتوره : الله يعافيك
طلعوا من عندها
ريم : انا بروح للسياره استناك
عساف وبيده وصفة الفيتامين : انتبهي من السيارات ي ريم
هزت راسها بـ طيب
،
عند نياف وهيام وهم اليوم ثاني موعد لهم بالمستشفى ذا
راجعوا عند دكتوره قبل ببداية زواجهم وقالت لهم ان هيام عندها مشاكل بالحمل وصعوبات كبيره وانه احتمال عقم او اذا حملت يصيب الجنين شي خطير
وقتها هيام انهارتت بكي ونياف طمنها وقال لها ان الطب تطور وفيه علاج اكيد وراحوا بعدها للدكتوره ذي وقالت لهم "لا لا مافيه عقم وولا حاجه هي عندها صعوبات وممكن الحمل يأثر على صحتها كثير وممكن يتأخر مايكون فيه كنل خلال السنين ذي لكن بأذن الله فيه علاج"
كان الموضوع سر بينهم محد يدري به واذا احد سألهم يقولون انهم مو مستعدين للمسؤوليه الحين وان تأخير الحمل برغبتهم هم .. دخلوا عند الدكتوره
الدكتوره : ماشاءالله فيه تحسن وان شاءالله بيكون المرات الجايه فيه تطور كبير وملحوظ لكن الازم عليك ي هيام تستمرين على الي المنشطات الي عطيتك اياهن قبل كذا
رجفت يدين هيام وهي كان عندها امل كبير انها الان تكون حامل لكن طلع مافيه حتى تطور كبير او ملحوظ حتى بس الدكتوره تواسيها بالكلام
شد نياف على مسكته ليدها يقوي عزمتها وهو يشكر الدكتوره وياخذ الوصفه منها طلعوا ومسح نياف دمعتها الي خانتها : وشهي لوه الدموع يـ هيامي سمعتي الدكتوره قالت فيه امل كبير  . جلسها على كرسي قريب : انا بروح اجيب العلاج واجيتس
اخذ العلاج ولما التفت صدم شخص قدامه بالغلط وعلى مارفع راسه الا ان ذا الشخص عساف انصدم نياف وهم ماتوقع يشوفه هنا أبدًا بذات ان المستشفى ذا بعيد عن بيتهم كثير
عساف : وش جايبك بهاه؟
ماله حيل يتكلم ابد وباله مع هيام الي تركها وهو عارف بكمية حزنها : بعدين ي اخوي اقول لك مستعجل الحين . ربت على كتف عساف وهو يمشي عنه تحت استغراب عساف
،
عند عساف وريم
كانوا راجعين للبيت وكان ملتزم الصمت ويسمع كلام ريم الي غصب عنه يسكت يتأملها وهي تتكلم
سكتت فجأه وهي تتأمل بالطريق
عساف بستغراب : وش نوحتس سكتي؟
ريم : مدري احس ازعجتك بكلامي
عساف ببتسامه : تدرين وش يقول محمد عبده؟
ريم : وش يقول؟
عساف : بس هاه تراه إهداء مني لتس
تنحنح وهو يغني البارت الي يقصده بصوته الرجولي الخشن :
" مدري فطرة ولا مع دم الوريد .. ذوقها الي فاح من لينه عبق
  ان حكت ودك سواليفها تزيد .. بنتٍ أعذب وأهدى من لون الشفق"
ريم ببتسامة خجل : عسااافيي
ضحك وهو يمسك يدها : تدرين اني ماكنت احب الدلع وماكنت ابي اتزوج دلوعه ابد وتزوجتتس وصرت اعشقق دلعتس واهيم بوه؟ وتدرين اني ماكنت احب احد يدلع اسمي والحين صارت تضيع علومي لادلعتيه؟ وتدرين بعد اني ماكنت احب احد يسولف فوق راسي ويطول الحين ماودي تسكتين ابد بس ابي اسمع سوالفتس ؟ وماكنت اتأمل شي لـ فتره طويله بدون ملل غير القمر والحين صار عندي شبيه القمر وجنبي اتأملوه
ريم : عسافييي ضاعت علومي على قولتك ماعرفف اعبرر او ارد
ابتسم وهو مبسوط انها ماتعرف تعبر اصلاً
،
الساعه 1 بالليل نام الحميع ماعدا عساف ونياف الي طلعوا يتمشون بالسياره بدون وجهه
عساف : وش الموضوع يـ نياف وش عندك بالمستشفى
نياف شتت انظاره بعيد وهو مايعرف يكذب على عساف ابداً وقال له السالفه كلها من وإلى
عساف ضاقت به من ضيقة اخوه وضاقت به من كلام الدكتوره الاولى المتشائم جداً
ماعرف وش يقول غير انه قال : هونها وتهون ياخوي وان شاءالله بوه علاج وزي ماحتست الدكتوره الثانيه بوه تطور ملحوظ بالحيل وان شاءالله بيكون العلاج سريع
نياف : ان شاءالله وماعليك انت لاتشيل همي انا راضي بالي ربي كاتبه
عساف: والنعم بالله
،
مكان نزوره لـ اول مرا ديره بعييد اتم البعد عن حايل والرياض
كانت قاعده تغسل الحوش ولبسها مبهذل من كثر الشغل الي انهكها نحفت بشكل كبييير جداً غير شكلها ميه وثمانين درجه
دخل وهو مستند على عصاته ونطق بحده : خبله انتي خبله؟؟ تغسلييين الحوشه بهالوقت ما قلللت لك لاااعاد اشوفك تغسلين الحوشه الا الصبح
نطقت بتبرير : بس كنت م..
ماكملت جملتها من صرخ : ولا كلمه مابي تبرير زايد وان عدتيها مرا ثانيه لاااتلوميين الا نفسكك فاااهمه!؟؟
هزت راسها بـ طيب
وكمل كلامه : جيبي لي اكل يلا
راحت وجابت له العشاء وهي تنزله بيدين راجفه ونطقت برجاء : ابي اروح انام عادي
رفع انظاره لها : تنامين؟ ايي قومي اذلفي لغرفتي غيري لبسك انا جاي
نطقت بكسرة خاطر وقرف من الحال ذا : لا مابي..
ضحك بستهزاء : لايكون عبالك انك زي باقي البنات لاتنسين انك متعوده على كذا من زمان وواصلتني علومك حتى واخوانك تستروا عليها ههه اقول بس سوي الي اقوله وبعدين تذلفين للملحق تنامين به
راحت وهي دموعها تنهمر بشده عرفت قيمة اهلها الي هي كسرت ظهرهم تدري انها تستاهل كل شي يصير لها الحين سوت الي طلبه منها ولبست البس الي حاطه هو على السرير وهي منقرفه من البس الي كان مو ساتر ابداً ابداً
جلست على الكنبه بدموع من الشعور البشع الي اجتاحها
دخل الغرفه وهو يقفل الباب ويتجه لها سحبها تاقف قدامه وهو يناظرها من فوق لـ تحت بنظرة احرقتها تركها واقفه قدامه وهو يتجه للكنب يقعد عليه ويبعد عصاته عنه ويرجع يدينه للخف تسنده وهو لايزال يناظرها فقط وهي واقفه دون حركه بعد ساعه على الحال ذا نطق بقرف وهو يرمي لبسها القديم عليها : غيري الي عليك واذلفي
صدت عنه وهي تدخل الحمام تغير وتترك البس وتروح من طلعت من الغرفه بدت تركض للملحق الي بالحوش وهي ترمي نفسها على الفراش الي بالارض وهي تحمد ربها وقفت على كذا المرا ذي . بكت بشده لين ماغلبها النوم ونامت
بعد صلاة الفجر بنص ساعه فزت من نومها على النعل "يكرم القارئ" الي صقعتها رفعت انظارها على الشخص الضخم الي واقف عند الباب ويصرخ : قوووميي قاامتت قيامتك ياملااا الصمخ زهبي الفطور بسررعههه
فزت بسرعه : طيب
صرخ بصوت اعلى : الناس تقووول سم وابشر وحاضر وانتي طيب!!!
خوله : سم وابشر وحاضر
رمى عليها نظرة وهو يطلع وقامت بسرعه تتوضا وتصلي الفجر وتحط له الفطور
صرخ بحده : وش ذااا الفطوور ماقول لك انااا نوعييي كل يوم شي جديددد! مابي انواع الاكل تتكر علي مرتين وذااا اخر تحذيررر لك اذلفي لابارك الله فيك
راحت وهي تقوي نفسها ماتضعف وبدت ترتب البيت
،