صقر الظلام

صقر الظلام ٩

صقر الظلام ٩
***********
اللهم يا رافع السماء يا مصرف البلاء  يا قابل الدعاء يا سخى العطاء  يا كاشف الغطاء اللهم كما جعلت الموده نورا تنير القلوب  .، وجعلت التوبه طريقا لمحو الذنوب، وجعلت الذكر سترا يخفى العيوب ،  وجعلت القرآن نهجآ ينير الدروب  ، اللهم أسألك لنا ولوالدينا  ولأحبتنا فى هذه الساعه إلى قيام الساعه إيمانا كاملاً ويقينا صادقا ورزقا واسعا  وقلبا خاشعا ولسانا ذاكرا  وحلالا طيبا وخيرا جامعا ودعاء مستجابا وبيتا أمنا وجسما سالما معافا من كل بلاء يارب العالمين
اللهم صل وسلم وبارك على سيدنا محمد وعلى آله وصحبه أجمعين
❤❤🧡🧡🧡💛💛💚💚💚💙💙💜💜🤎🤎🤎🤎

هبه زقت الباب بعزم ما فيها : الباب مقفول ياحاج
عبدالعزيز خبط : افتحى يابت يا منال افتحى
منال فتحت بتدعك فى عيونها بنوم : إيوا يا أبا فى إيه
عبدالعزيز زقها : قافله على روحك ليه يامدعوقه
منال : كنت بغير وقولت اريح شويه ونسيت أفتحه جرا إيه
هبه ضربت إيد على إيد : كان فى حد معاكى جوا إيوا انا سامعه بودنى إلا ها ياكلها الدود دهين كلامكم سوا
منال ضربت على صدرها : يالهوى بالى يا ولاه انتى بتتهمينى فى شرفى  يا مرات أبويا أنى أبويا مربينا وعارفين يعنى إيه شرف أغلى حاجه فى دنيتنا هو شرفنا .. ماتقول حاجه يابا
هبه زقتها : أنى متاكده بطلى تمثيل ياعقربه أنتى وداخله بتدور فى الأوضه يمين شمال فوق تحت .. فتحت الشباك وبصت فيه مفيش أى حد خارجه ووشها بيطلع نار
عبدالعزيز : كله إلا إنك تتهمى بناتى فى شرفهم أنى مربيهم وعارف أنى مربيهم على إيه وبعدين مين ياحزينه هايدخل االبيت وازاى وعليه كل الحراسه دهين
هبه : حراسة ايه دا غفرين عمى
منال سمعت الكلمتين عيطت قربت عليه وبحلفان : والله يابا ماعملت ولا بعمل حاجه شينه حد الله بينا وبين الحرام .. وبعدين مانت عارف أنى بنام وبتكلم وانا نايمه فيها إيه ياناس
إخواتها : إيوا دى فلقه  راسنا
هبه بغل بصت لجوزها : يعنى أنت مش مصدقنى ..  طب براحتك خلاص أنى مش ها أتدخل تانى بس أنى متاكده إن فى حد معاها إيوا معاها
عبدالعزيز شاور : إنجرى قدامى وبطلى رغى ... بناتى فى شرفهم مفيش زيهم إلا الشرف يا حزينه إلا الشرف
هبه طلعت بعد ما زقت كل إلا فى وشها وراحت الأوضه ورزعت الباب قفلت على نفسها .. عبدالعزيز قرب بيخبط عليها .. أفتحى
هبه : مش فاتحه روح شوف موطرح نام فيه غير هنا أنت مش مصدقنى عايز تنام جارى ليه
عبدالعزيز : عيب يا هبه أنا ما احبش الدلع المساخ قدام حد
هبه علت صوتها : يعنى تحب أدلعك وما أخدش حقى لما تكدبنى
عبدالعزيز بيحايل فيها : طب افتحى ونتكلم جوا ما تشمتيش فيا البنات ها تجرئيهم عليا مش ها أعرف أكلمهم تانى
هبه : أنت إلا جرئتهم عليا ياعبدالعزيز وشمتهم فيااا بتك كان معاها راجل أنت فاهم انا سمعتهم حطيت ودانى على الباب وسمعتهم
عبدالعزيز : أنى خارج ها الف الدار كلها وبرا الدار لو ملقتش حد ما اسمعش حسك بناتى فيها كل العبر إلا إنهم يفرطو فى شرفهم انتى فاهمه
هبه : إن شاء الله
عبدالعزيز مشى بالخطوه السريعه لبرا بيدب بالعاصيه وهو ماشى نده على الغفر وطلعو بصو حوالين البيت برا وجوا السور .. رجع تانى أكد لهبه إن مفيش حد  .. لحظات والغفر كلها قاعده واحد غريب قرب عليهم ومعاه أكل دليفرى
الغفير : مين انت وعايز إيه
الدليفرى : الله مالك يا أخويا ماتهدى على ورحك 
دار الحاج عبدالعزيز
الغفير : إيوا
الدليفرى : طيب الأكل دا فى واحده أسمها منال طالباه مننا .. خد وصل بالفلوس حق الأكل خليها تشوفه وتدفع إلا فيه وخد الاكل أهو فى ايدك
الغفير خد الأكل ودخل جوا  خبط وتوحيده فتحت : إيوا
الغفير : ست منال طالبه أكل
منال قربت جرى : إيوا هات .. ورينى كدا استنى اجبلك الفلوس
الغفير : ماشى ياست
منال دخلت الاكل وخدت الفلوس من ياسين وطلعت تانى حاسبته ..
منال دخلت وبفرحه : أخوكم جايب كباب وكفته وفراخ
ثريا : الله على الحاجات الحلوه بتاعت زمان
توحيده هجمت على الأكل لسا ها تاكل ياسين مسك ايديها : اصبرو .. شال جزء من الأكل وطلع قطاره فيها منوم وبدء ينقط عليه كتير .. حط العيش عليه وهمس .. خدى اطلعى للغفر وإديلهم الاكل ياكلوه
منال أبتسمت : ماشى هات .. فعلا عملت زى ما أخوها قالها ورجعت تانى .. عمل نفس الطبق لأبوه ولمراته وخدته خبطت عليهم .. أبا .. أبا
عبدالعزيز خرج من الاوضه : فى إيه يامدعوقه 
منال ابتسمت وبتناوله صنيه عليها الأكل : خد صالح مراتك يا إما تجيبها وناكل كلتنا مع بعض
عبدالعزيز زعق : جبتيه ازاى دا يا به
منال : مش أنى يابا فاكر لما جبتلنا قبل كدا أكل من نفس المحل  أنى خدت الرقم من على الشنطه وحفظته وبنطلب بالتليفون والغفر هما إلا بياخدو الاكل ويجيبوه لنا حتى أسالهم  ماتقلقش يابا مفيش واحده بتعب برا الدار برجليها
عبدالعزيز مد إيده : لو كدا هاتى بصلها تانى .. الفلوس
منال ابتسمت ورفعت ايديها  : رينا يكرمك دايما سايب لنا مصروف البيت يكفى ويفيض برغم اننا ما بنخرجش والغفر إلا بتجيب بس بنحوش .. غيرت الموضوع .. ماتطلعو تاكلو معانا
عبدالعزيز نطر ايده : لاء روحى كلو أنتو 
منال ببتسامه : ماشى ورجعت لهم الأوضه
كريمه بخوف : هاتعمل إيه يا حزين ها تس.مهم .. يالهوى يالهوى يالهوى
ياسين : هششش اسم أيه أنتى هبله .. دا منوم ها ينامو شويه لحد ما تجهزو حالكو والهدوم بتاعتكم عشان نمشى من هنا
منال : لازمن نخرج برا ابويا ياخد بحسنا ناكل ونتكلم لحد ما يروح فى سابع نومه
توحيده : ها تودينا لمين
ياسين بجديه : أنتو مش هاتروح لحد .. فى حد سئل فيكو وإلا عليكو
كلهم : لاء
ياسين : يبقى خلاص أنا  أجرت شقه نقعد فيها كلنا مع بعض .. ياله .. زقهم .. ياله  ها تفهمو كل حاجه بالطريق إخرجو كلو برا وشويه ومنال تخبط على أبوها تتطمن نام والا لاء وتوحيده تخرج للغفر تشوفهم
منال شدت توحيده وشالت الاكل : ماشى .. يالا يا بنات .. خرجو وقعدو فعلا بياكلو مع بعض
هبه قاعده على السرير بتتهز جامد عبدالعزيز قرب عليها : تعالى كلى لقمه معايا وبطلى قمص
هبه شاورت بصباعها : أبدا سيبنى لحالى يا راجل ملكش دعوه بيا
عبدالعزيز شال صوباع كفته وقعد جمبها قربه على بوئها : والله لتاكلى ما تكسفى إيدى .. ياله يا أم الواد
هبه بجمب عنيها بصتله .. مدت ايديها خدت الصوباع : أنا ها اخده عشان إبنى نفسه فيه
عبدالعزيز جاب الصنيه كلها : الواد وأم الواد ياكلو كل إلا نفسهم فيه ... زغدها ..  كلى كلى وبياكل .. خلصو أكل وعبدالعزيز بيشيل الصنيه وقعت من ايده .. قعد على السرير دايخ وهبه بتعدل دماغها .. قالت بتقل .. عب.. ال.. ع.زيز .. إخخخخخخخ .. لحظات وكانو نايمين فى سابع نومه والغفر كذالك
منال بتخبط : أبا .. أبا.. أبا .. ماتفتح يا ياحاج عملتلك عصير .. فتحت الباب ودخلت لقتهم الاتنين نايمين
توحيده خرجت اتاكدت هى كمان ان الغفر نامت .. بلغو ياسين فخرج من الأوضه بص لإخواته جهزو حالكم ياله ها أشوف حاجه وجاى .. دخل كل مكان فى البيت بيدور على الورق على اى حاجه تثبت إن فعلا دى مش املاك أبوه بس ملقاش حاجه  .. دخل الاوضه إلا فيها ابوه بشويش وقف قدامه باصص له  ولمراته بحزن وأسف .. خد مفاتيح الخزنه  وطلع فوق فتحها لقائها فاضيه  نزل بص لإخواته .. جاهزين
كلهم : أيوا
ياسين بسرعه  : ياله قبل ما حد يصحى فى عربيه تاكسى منتظره على أول البلد
البنات خرجت تجرى ورا بعض ووراهم ياسين ... أمنو الطريق وكملوه لحد التاكسى وحمدو ربنا إن محدش شافهم
***
مدير المخابرات قال بحده قرار خلاهم كلهم يبصو لبعض : أنت مش هاتروح فى حته يا ذكريااا .. إلا ها يسافرو بنفسهم  ومجبرين يجيبولى أخبار أدم وعصام القاده بتعهم ومش بس أخبار لازم ولادنا ترجع معاهم انتو فاهمين
القاده هزو راسهم : تمام يا فندم
مدير المخابرات خبط بقوه وعصبيه : أنا نبهت عليكم  العمليه دى مش ساهله فيها أبعاد كتير إحنا بنبحث وبندور على خبايها عايزين نجيب قرار الست دى وإلا مشغلها وبتنتمى لأى منظمه بالظبط .. لحد دلوقتى ماعرفناش حاجه عن أبعاد الموضوع وليه  بيدربوهم على  الظهور فى السوشيال ميديااا .. 
ذكريا بجديه شديده : يافندم موضوع السوشيال ميديا شائك وكبير وحضرتك عارف إنه مش تحت الحكم الأمر.يكى  فقط فى ابعاد .. أيوا فى أبعاد ووأبعاد كبيره جداااا   .. الإمكانيات إلا أكتسحت الفيس واليوتيوب والتيك توك وبعض البرامج بفلوس مهوله فى وقت قصير وراه غرض كبير يافندم ودا إلا لازم نعرفه لما أدم وعصام يرجعو بالسلامه
مدير المخابرات : تمام .. بص للقاده .. معاكو بالظبط ٢٤ ساعه تجهزو نفسكم  وتستعدو للسفر فى أى وقت
باب المكتب خبط بص ناحيته .. أدخل
ضابط صغير فى السن دخل ادى التحيه : تمام يا فندم .. فى فاكس مستعجل لحضرتك
مدير المخابرات مد إيده : هات
الضابط قرب ناوله الفاكس وخرج .. ريح ضهره وفتح الورقه بيقرأها .. شبه أبتسامه ظهرت على ملاحه 
كلهم  : يارب يكون خير يا فندم
مدير المخابرات قام وقف : خير إن شاء الله أتفضلو الاجتماع خلص
الكل قام وخارج بص لذكريا .. استنى يا ذكريا
ذكريا قعد  بصله .. الفاكس دا من أدم وعصام
ذكريا بحماس شديد : خير يا فندم
مدير المخابرات : الفاكس بيقول إن الأمور كلها على مايرام والأخبار المفرحه ها توصل لأهالينا فى القريب العاجل  بشغلنا إلا هيرفعنا فوق
ذكريا بتفكير : ليه مفيش أى كلام عن معاد  رجوعهم مصر
مدير المخابرات : فى اخر الفاكس وإلى لقاء أخر اسأل الله ان يكون قريب
ذكريا هز راسه : كدا لسا مفهاش رجوع دلوقت .. معلش يافندم ليه ما بلغتش القاده
رئيس المخابرات : عشان يهتمو شويه ما يقعدوش يستنو الرد منهم لازم يتابعو بإهتمام بالغ الأهميه يا ذكريا
ذكريا : بصراحه يا فندم محدش مقصر الكل شغال وحضرتك عارف
رئيس المخابرات : عارف وعايز همه أكبر وأعلى من كدا  .. بص قدامه إحنا محاطين بكمية مؤامرات لا حصر لها يا ذكريااا مابقناش  ملاحقين  منين والا منين والا منين
****
رامز قاعد فى مكان قريب من شقته قصاده لميس : وبعدين معاكى أنتى مش ها تتغيرى أبداااا
لميس حطا رجل على رجل وبتهزها جامد : مراتك ست مستفزه ورخمه
رامز قرب عليها : هى إلا رخمه بردو أنا مش عارف أنتى حطا عبير فى دماغك  ليه ماتهدى يا لميس وسيبى كل واحد يعيش حياته على كيفه
لميس نطرت ايديها : عيش يا اخويا وبطل وجع دماغ .. المهم عملت إيه لقيت تاليا
رامز هز راسه بنفى : لاء طلع كلامك صح فعلا مع جوزها برا مصر
لميس بصتله من فوق لتحت : بس إيه دا كله لا بقيت محتاج لرامى ولا ليا ولا حد بيشوف وشك
رامز بإرتباك : ها أفضل أستلف منكم يعنى طول العمر
لميس ضحكت : إمال ها تستلف من مين لقيت حد تستلف منه مراتك فاتحها على البحرى لبس وخروج وأكل من برا ولاقيه واحد يصرف ويقولها خدى
رامز : ملكيش دعوه مراتى أنا وهى احرار
لميس ديقت عيونها : دلوقتى احرار ولما كنت تشتكى منها وتاليا قاعده عندك .. بتهز كتفها .. انا زهقت يا لميس كل ماتشوف تاليا بتشترى حاجه لازم تجيب زيها يا لميس وتاليا ما بتبطلش شرا يا لميس هى سبب خراب البيت يا لميس
رامز : هشش .. إخرسى شويه فرجتى عليا الناس  .. كلمتى جوز تاليا زى ما قولتى
لميس بتفكير : لاء يا غبى لإنه  قالى أنا معايا رقمك ها اتصل عليكى عشان الرقم ها يتغير .. قولتله مش معاك الرقم إلا بتستخدمه هناك .. قالى للاسف ها أغيره عشان فى ناس مش عايزها تعرفه وما اتصلش ولا كلمنى من ساعتها
رامز : وإيميله على الفيس بوك
لميس ضربت على اورتها : أخ ازاى نسيت الموضوع دا  .. بقولك ايه انا واثقه إنه ها يكلمنى عشان تاليا .. بس انت مفيش أى أخبار خالص
رامز : ولا أخبار ولا  أهرام زى ما روحت زى ماجيت يا لميس
لميس مدت شفايفها لقدام : رامز بصراحه كدا الواد دا لازم يبعد عنها أنت ما شفتش حاجه مهما احكى واقولك عمرك ماهاتفهمنى ابدا أبدا
رامز بجديه  : هانستفيد ايه لما نخرب لها حياتها انتى قولتى عمك بيقول ياسين مخه زهد يعنى بالعربى اتجنن لا ينفع يتجوز ولا ينفع يعمل لنا أى حاجه خلاص سيبيها فى حالها هانعوز منها إيه
لميس رفعت جاحب جامد جدا : إيه الحنيه دى يا حنين .. رامز خد بالك قلبك الروهيف على تاليا  دا مش ها يخلينى أثق فيك
رامز بصلها بديقه : لو انتى مكانها كنت ها أعمل عليكى كدا أنتى اختى وهى أختى
لميس بغل : أوعى تفكر تقارنا ببعض  أنا يا حبيبى ماكلتش حقكم ولا أستخسرت ارد حقكم من عمك .. أنا ماكنتش مسيطره على بابا بالدلع والمياصه .. أنا ما زهقتش عيشة امى وكل دقيقه يحصل مشاكل بسببى عشان بابا مهتم بتاليا وسايبنا ورامينا بالزباله  وكتير قوى يا حضرة الاخ المحترم
رامز : أنا لو عارف إنك بتحبى ولادك ويفرقو عندك كنت سألتك إحساسك إيه ناحية اصغر واحد فيهم وخصوصا لو جيالك على كبر يا لميس أكيد هاتهتمى بيه الغيره بس إلا عاميه قلبك خفى شويه إحنا إخواتك وإحنا إلا باقين لبعض تاليا ياما شالتنا وما بتعزش علينا حاجه قوليلى إيه المشكله بينك وبينها ونحلها عشان خاطر ابوكى وأمك يرتاحو فى تربتهم
لميس لفت وشها ولسا بتقوم رامز مسك ايديها قعدها زقت ايده : سيب إيدى انت عايز إيه دلوقت
رامز : عايز اعرف لو ناويه تحلى الخلاف إلا بينك وبين أختك وإلا لاء
لميس كببت فى وشه ؛ لاء لاء لاء .. وعشان تبقى فاهم رجوع جزء كبير من حقنا مرهون على ست زفته بردو 
رامز هز راسه بإستفسار : ازاى يعنى
لميس : بصراحه انا اتفقت اسلم تاليا لعمك ها يدينا تلت الثروه كامله وفى المقابل ياخد تنازل مننا كلنا واقرار بإننا خدنا حقنا كامل
رامز ضحك بسخريه : تلت
لميس اتعدلت : أنت بتستئل بالتلت .. عارف يعنى إيه تلت ثروة أبوك انت مجنون يا رامز عصفور فى اليد ولا عشره على الشجره
رامز قام وقف وبزهق وتحذير : لعلمك مهما عملتى انا مش ها ابيع اختى فاهمه ..  أختى أغلى من كنوز الدنيا بحالها ولو عايزا تقفى قصاد تاليا اقفى قصادى انا كمان اختك من يوم مو.ت ابوكى ما شفتش مننا ريق حلو كلنا جينا عليها  وقرفنها أخر قرف اتقى الله وإرجعى لعقلك بقى سابها ومشى قامت تجرى وراه بعد ما رمت الفلوس على الترابيزه  شدته : انت كمان هاتضيع علينا ملاين بغبائك هاتعمل فينا إلا هى عملته فوق أنت .. تاليا عايشه عيشه أحلى واحسن مليون مره من إلا كانت عايشها مع بابا .. مع بابا كانت ملكه ومع جوزها ملكه .. إيييييه فيها إيه عشان يعملو معاها كدا ليه دايما بتفضلوها علينا وعلى مصلحتنا  .. أنا بكره  اليوم إلا شفتها فيه وبكره اسمها وسيرتها مش ها أرتاح طول ماهى وسطنا انت فاهم وإلا لاء .. وقسما عظما لو ما عقلت لأحبسك وعشان تبقى فاهم إحنا لمينا كل الشيكات  إلا عليك للناس برا عشان لو عملت حركة النداله دى هانحبسك .. كررتها بحمقه ..   هانحبسك انت فاهم
رامز بغل مبقاش شايف قدامه ضر.بها بالقلم وشدها جامد من شعرها إلا بقت ماشيه بيه وقلعت حجابها .. صرخت بصوت عالى الناس فى المكان اتلمو على رامز شدوه بالعافيه منها اتنطتت ووشها إحمر : مش ها اسيبك يا رامز 
رامز بعصبيه الرجاله ماسكاه : والله لاوريكى يا لميس انتى واخوكى مش ها اسيبك ها اجيب بوذكم الارض يا جاحدين .. واحده باعت ولادها وجوزها هاتبقى على أخوها .. زق الناس إلا حواليه .. أوعو كدا .. مشى من المكان وهى مشيت هى كمان روحت  اتصلت على رامى حكتله وهو زعق لها جااامد قالها قولتلك ملكيش دعوه بالموضوع دا انا عارف ها اجيبه فى صفنا ازاى وانتى خربتيها وإستعجلتى لما قولتيله على الشيكات .. قفل معاها حطت التليفون جمبها  نفخت بصوت عالى  ومسكت شعرها .. اااه ياغبى يا متخلف أنا واقعه فى شلة متخلفين ياربى إيه الناس دى بيفهمو ازاى دول  ..
**
عمرو قاعد مع أبوه وامه مبوذ وساكت بص قدامه : شكرا يا ماما وتسلم إيدك مقدما
مسدت عليه بحنيه : ياحبيبى بألف هنا أنت لو ها تيجى كل يوم تاكل وتشرب عندنا مش ها أمانع وأكيد ها افرح بس مراتك وابنك هاتفضل سايبهم كدا مش هاترجعهم
عمرو بزعل : انا لا سايبها ولا مشتها كنت فاكر إن عقلها أكبر من كدا بكتير وهاتحترم العيشه بينا ..  مش مضطر أتحمل سخافة وقلة ذوق أختها لازم كل واحد يعرف حدوده فين
قعدت جمبه على السفره تدردش معاه وهو بياكل : حبيبى كل عيله فيها حد رخم ومطلع عين أهله لو حاسبنا كل واحد على إخواته وعلى أفعالهم كلنا هانقطع علاقتنا ببعض وبعدين ياعمرو الكلمه بتاعتك تقيله يعنى إيه أختها ماتدخلش عندك .. يعنى اهلها كلهم مايدخلوش عندك ..  ممكن توصيها وتقولها تحذر اختها تتعامل معاها لما تتراخم إنما تقطعها من أهلها لاء محدش هايقبل على نفسه كدا
عمرو أتنهد قطع لقمه وبيغمس حطها فى بوئه وسكت
هزت راسها : هاااا ماردتش يعنى
عمرو نطر ايده : ياما حذرتها ومفيش أى فايده البنت ياماما بتتعمد تقلل منى ومن أدم دى مجنونه والا بتستهبل فى كلتا الحالتين أنا مش ها أتحمل سخافة حد ما بيحترمش نفسه بتحمل كتير بس لما بجيب أخرى شكرا بالسلامه
مسكت إيده : ممكن تسيبلى الموضوع دا وبلاش مشاكل من دلوقت
عمرو هز راسه : براحتك يا ماما
طبطبت عليه : يحضرلك كل خير يا حبيبى
**
عبدالعزيز لما قام الصبح راسه تقيله ماسكها وطالع برا : ثريا بت يا ثريا .. منال .. كريمه .. توحيده .. أمانى .. على صوته جامد .. أنتو يابقر نايمين على ودانكم .. زق باب الأوضه  برجله  اتفاجئ إن مفيش فيها أى حد والدولاب مفتوح وفاضى .. خرج جرى بمنتهى الجنون ينادى ويدور عليهم لا حس ولا خبر .. طلع  للغفر برا وضرب كل واحد بالرجل وقعه : لساتكم نايم فين البنات .. فين البنات
الغفر قامت من الارض بخضه بيحاولو يستوعبو فى إيه قربو منه بإرهاق وصداع  : فى إيه يا حاج
عبدالعزيز زعق : فين بناتى
الفغر شاورو : جوا يا حاج محدش طلع منهم
عبدالعزيز دور الضرب فيهم : مفيش حد .. جهزو العربيه .. دخل غير ومازالت هبه نايمه مش حاسه بحاجه خالص طلع ركب العربيه أفتكر المفاتيح .. رجع تانى يبص عليهم ملاقاش حاجه طلع جرى على فوق فتح الاوضه إلا فيها الخزنه اتفاجئ إن الخزنه مفتوحه والمفاتيج فيها من برا .. همس .. بتعملو إلا عمله اأخوكم الحرا.مى .. يا ويلكم منى لو وقعتو فى إيديا يا ويلكم .. شد المفتاح خده ونزل عدى على كل طليقه له وبقى يدور فى البيت عندهم بنفسه .. عدى على بناته إلا متجوزين واحده واحده وبقى يدور بنفسه بردو .. حس إن برج من نافوخه ها يطير هايروحو فين وإلا عند مين مايعرفوش حد ولا يعرفو أى مكان وصل البيت قعد على الكنبه والغفر قالبين العزبه عليهم ملهمش أى أثر بالمره .. هبه قامت من النوم بتقل وصداع رهيب بتتواب اتفاجئت بيه قاعد بيخبط بإيده الاتنين على راسه وبيقول بصوت مسموع باكى .. يا فضيحتك ياعبدالعزيز البنات هاتركبك العار والفضيحه  طول العمر هاتمشى موطى راسك ياحزين الواد سرقك والبنات هربت
هبه ضربت على صدرها وبشهقه : يا مصي.بتى يا مصي.بتى  .. بناتك هربو ياعبد العزيز ... أنى قولتلك سامعه بنتك بتكلم راجل جوا الاوضه .. اااه تلاقيهم كانو بيتفقو مع واحد يهربهم زى اخوهم الصا.يع .. أنت لازم تجيبهم وتاويهم بالحياااا قبل الذل والعار ما يركبك طول العمر دى عمرها ماحوصلت فى العزبه بتاعتنا ولا سمعنا إن واحده خرجت عن طوع اهلها يادى النيله عليك وعلى خلفتك المغلقه راجل عره
عبدالعزيز أتعدل وبصوته كله رعبها : ولا كلمه زياده يا .... على الله أسمعك تقولى حرف بينك وبين نفسك على بناتى فاهمه
هبه قربت عليه : لا مش فاهمه .. بتبلى عليهم أنى
عبدالعزيز مسكها من دراعها وجز على سنانه : لو فاكره إنى راجل طرى وإلا لقمه طريه تعرفى تمضغيها تحت سنانك تبقى هبله يابنت قاسم .. قسما عظما اوريكى النجوم بعز الضهر .. انتى تدلعى عليا ماشى .. تطلعى عنيهم ماشى ... تطلبى طلبات بزياده ماشى .. إنما تدوسى على عرضى وشرفى أدوس عليكى وعلى إلا جابوكى فاهمه زقها نطرها على الكنبه
هبه مسكت درعها وعيطت : أنى زعلانه عليك وعلى إلا عملوه فيك
عبدالعزيز : ملكيش دعوه وعلى الله اسمع كلمه هنا وإلا هنااا اتاويكى أنتى وخصوصا لأهلك يا حزينه .. طلعت كلمة فاهمه بصوت هز البيت هز من قوتها
هبه اتنفضت : فاهمه ..
عبد العزيز شد العصايه وخرج  على برا أستنى الغفر ولما رجعو واكدو إن مفيش اى أثر جن جنونه اكتر وأكتر
واحد من الغفر : انت لازم تركب كامرا يا حاج دا الكل مركبها كان زمانك عرفت راحو فين والا مشيو ازاى
عبدالعزيز زقهم : غورو من وشى دلوقت ...  لو الخبر اتنطر كدا والا كدا ها أقطع خبركم وخبر إلا حدفكم عليااا .. هما عند أختهم الكبيره عشان بتجهز ثريا وتوحيده للجواز فاهمين
الغفر هزو راسهم : فاهمين يا حاج
ياسين خد إخواته ومشى سافر شرم بيهم من اللحظه إلا نزلو من الباص فيها وهو مش عارف يسيطر عليهم بيتفرجو على دنيا جديده عمرهم ما حلمو يشوفوها ولا يلمحو زيها حتى ..  وقف تاكسى بيركبهم
صاحب التاكسى : ازاى دول كلهم ها يركبو مع بعض ورا انت عايز مكروباص
ياسين : ياعم دول مسلوعين ها يساعو بعض ماتخافش ركبهم وها أديك إلا انت عايزه
السواق : ياعم كتير .. بص خد واحده جمبك قدام
ياسين بعصبيه : ها اخدها على حجرى عيب ياراجل عليك كدا ركبهم وشوف
السواق شاور : اتفضلو اما نشوف أخرتها
البنات دخلو فعلا جمب بعض وسواق التاكسى قعد يضحك والبنات تبص لبعض ويحطو ايديهم على بوئهم ويضحكو
ياسين بصله : شفت أنى عارف إخواتى .. ياله هم بينا
سواق التاكسى ركب وصلهم للشقه إلا ياسين أجرها وبلغ تاليا بقدوم إخواته البنات والكل راح لهم رحبو بيهم وضيفوهم .. حكى لهم على كل إلا عمله وأكد لتاليا إن الورق لايمكن يكون فى البيت دور فى كل حته مر أسبوع تقريبا  وتاليا بتمر عليهم كل يوم
منال قاعده قدام تاليا باصه لها بحزن شديد هى وإخواتها : يعنى أنتى اتجوزتى غير اخويا وكمان حامل
تاليا ابتسمت : كل شئ قسمه ونصيب يا منال
منال نطرت ايديها : ياحصرة قلبك يا أخويا اتاريك يا حزين أتمئت ومستسلم لنومتك مهما أكلمك تعيط وانت ساكت ..
ثريا هبت فيها : وانتى جايلنا ليه لما أتجوزتى وحامل .. بتعلقيه فيكى أكتر والا بتحصريه عليكى
كريمه بصت لها : عيب يا بت يا ثريا دى مهما كان تاليا وبنت عمنا وكل شى قسمه ونصيب صحيح
توحيده بحده : لاء مش عيب .. بقاله كام سنه بيحبك ونايم قايم يحلم بيكى
أمانى بحده  : كسرتى قلبه وخليتى أبوه يعايره بيكى طول الوقت ومن بجاحتك جايه تعملى حبيبه 
تاليا قامت واتحمقت عليهم بعياط : بتكلمونى كدا ليه وازاى تتكلم بالاسلوب دا معايا .. محسسانى إنى وعدت ياسين بحاجه وخليت بيه أنتو عارفين إن ياسين لا ليا ولا أنا له قصدكم إيه من الهجوم عليا دلوقت هو رضى وانتو عاملين محكمه بتحاكمو فيها بنت عمكم
منال بهجوم  كبير : إيوا نحاكمك .. نحاكمك عشان إحنا إلا معاشرين أخويا وعارفين أد إيه بيأسى بسببك .. دمرتيه ودمرتى حياته وانتى السبب فى العار.كه إلا بينه وبين أبويا ووجود الحربايه هبه وسطنا دلوقت
تاليا قربت منها وشاورت على نفسها : ها اقولك تانى يمكن تفهنى انا عمرى ما وعدت اخوكى بحاجه فاهمه انا واخوكى مختلفين ماننفعش لبعض وانتى اكتر واحده فاهمه الكلام دا  من زمان
توحيده شدتها : أسكتى يا منال سيبك منها دى مناخيرها فى العالى طول عمرها باصلنا من فوق
أمانى : إيوا بس الحمد لله الحق رجع لاصحابه وأبويا رجعلو حقه إلا ابوكى كان ناهبه
تاليا تنحت  : ابويا ناهب  أبوكى
ثريا بتاكيد : إيوا هاتكدبى وتقولى سرقكم زى ما قولتى قبل كدا
تاليا زعقت فى وشهم : أيوا سرقنا وانا عمرى ما بصيت عليكم من فوق دا خيلكم المريض إيه الجبروت إلا الكل بيعاملنى بيه دا حسبى الله ونعمه الوكيل ربنا ياخد حقى منكم كلكم .. وخارجه تجرى بتفتح الباب خبطت فى ياسين زقته ونزلت وهو وقف متسمر مكانه بينادى عليها ما بتردش عليه .. دخل حط الشنط من ايده وبينادى على إخواته شاور : مالها تاليا نازله تعيط وواخده فى وشها ليه دا بقالها اسبوع قايده صوابعها العشره شمع عشانكم
منال لوت شفتها ولفت وشها
ثريا زعقت : إحنا بستفناها على إلا عملته فيك
ياسين ضم حواجبه بعدم فهم  : عملت إيه
منال بحمقه : اتجوزت وحامل وهى عارفه انك عايزها وخطبتها ليه مالك وإلا فيك إيه عشان تسيبك وتتجوز غيرك
ياسين بيقولها بعصبيه  : وأنتو مالكو انا اشتكيت لكم
أمانى : من غير ما تشتكى إحنا إخواتك وحاسين بيك نيمتك بين الحيا والموت خلت ابوك عايز ينتقم منك كنا عايشين بأمان وشردتنا
ياسين زعق : على الله اسمع منكم كلمه كدا والا كدا على بنت عمكم .. سبب نومتى ابوكم وسبب عذ.ابى أبوكم سبب كرهها ليا أبوكم كل حاجه كانت غلط فى غلط وأكيد لما نصححها مش هاناخد كل شئ عايزينه .. أنا خسرت تاليا من أخلاقى وسمجتى إلا ماكنتش حاسس بيها .. من ورثها هى وإخواتها إلا ابوكم لهفه
ثريا : ابوك ما لهفش حاجه دا حقه وهو رجعه سمعته بيقول كدا
ياسين نطر إيده  : إسمعى براحتك .. ضرب على صدره .. أنى شاهد إن دا كله ملك لعمك هشام  .. أنى جايبكم هنا ارحمكم من نا.ره تقومو تزعلو البنيه إلا ساعدتنى ولحقتنى من المو.ت وخلتنى انسان جديد .. قالها بحزن رهيب.. اه زعلان ومتحصر على إنى خسرتها وأتكتب عليا اشوفها فى حضن غيرى بس هى بنت عمى وحبيبتى وأختى الغاليه ... شاور على نفسه .. زى ما حكمت على روحى اتقبلها أخت وغاليه لازم تكون اختكم الغاليه انتو كمان وإلا هاتخسرو أخوكم للأبد وها أبعتكم لأبوكم يعيشكم على كيفه أنا  خارج كل الصارعات ها اعيش حياتى فى هدوء وأتجوز واخلف واربى عيالى بس مش على إلا أنا اتربيت عليه فاهمين .. سابهم ونزل والخمسه بصو لبعض بإستغراب شديد
منال شاورت على مكان ما مشى : يالهوى بالى يا ولاه مين ده يابنات اخوكم .. دا لسانه اتعوج ومخه أتعوج وحياته أتقلبت شقليب
ثريا ضحكت : يا حلاوه يا ولاه إحنا ها نبقى كدا  
أمانى بتهز ايديها : أخوكم نضف من كله
كلهم : ههههههه
حكمت : هانعمل إيه مع تاليا
كريمه : لازمن نصالحها اخوكم بيقول بقت اختى خلاص وكمان ساعدته .. اقولكم الصراحه تاليا صعبت عليا لما هبيتم  فيها زى الكلاب السعرانه كدا
منال : خلاص ماتكبروش الموضوع كلمتين قولناهم ساعة زعل وهى هاتقدر وبعدين المفروض ياسين كان قالنا ما سبناش على عمانا كداهوووو  وهى لازمن تقظر إنه أخونا الوحيد أنتو مش شايفين حاله دا أتبدل بس أتبدل عجز وقلة حيله اتبدل استسلام
**
تاليا نزلت تجرى بتعيط بطريقه تقطع القلب .. ماسكه بطنها ركبت عربيتها وطارت من قدام شقة ياسين وصلت لشقة ساميه إلا مقيمه فيها مؤقتا ركنت العربيه وفضلت قاعده جواها بتعيط .. مستغربه سبب هجوم الكل عليها حتى بنات عمها ما اتوقعتش أبدا رد فعلهم .. كل ما تمسح عيونها دموعها تنزل تجرى من تانى صوت شنهفتها ظهرت جااامد .. حطت ايديها على بطنها وقالت بصوت مسموع : شاهد على إلا بيحصل فى أمك كلهم ظلمونى حتى ابوك انا مش ها اسامح حد ..  لو جربو يوم واحد من إحساسى بالظلم والقهر لايمكن يعملو فيا كدا .. لو جربو وحسو بقلبى وهو بيتشق نصين بينزف الم حزن ماكنش حد ظلمنى .. وأول إلا ظلمنى جدك هشام ..  حبه وإهتمامه كان أكبر ظلم زرع فيهم كلهم الحقد والغيره من تاليا ياريته ماحبنى عشان بدفع تمن حبه لدلوقت عيطت قوى وركنت ضهرها خبت وشها وهى بتلوم على الكل حتى نفسها  .. بصت على الفون لقت ياسين بيتصل عليها .. رابع اتصال .. يخلص يتصل تانى .. ردت وصوت عياطها ظاهر
ياسين بخنقه : إخص عليكى حد يزعل من الهبل دول ويعيط كمان دول مجانين
تاليا بصوت متغير : ياسين معلش ها أكلمك وقت تانى
ياسين : لا تانى ولا تالت يا بنت عمى حقك علياااا والله ماتنامى زعلانه دانى بستفتهم وعرفتهم إنك خلاص بقيتى زيك زيهم بالنسبالى  .. تاليا  أمانه عليكى ماتاخدى على خاطرك انا ما صدقت الدنيا اتغيرت معاياااا
تاليا بعياط رهيب كل ما تطلع الكلمه تتخنق من عياطها كلامها بقى طالع بالعافيه  : أنا واخده على خاطرى من الدنيا يياسين .. الكل فاهمنى غلط والكل بيعاملنى بأنانيه
ياسين : يااااه يابنت عمى اول مره اشوفك بالضعف ده دانتى جبل ماحدش بيعرف يهده
تاليا : تعبت .. كتر الدق على دماغى تعبنى
ياسين لحقها فى الكلمه : وأنا فين إلا يفكر يدق على دماغك ها أديلك دماغى هديه وخليهم يدقو عليها بدالك كفايه يا غاليه أنتى شايله جواكى حته منك ليجرالك حاجه تاليا بقت أتنين فى واحد
تاليا سكتت ما بتردش
ياسين : تاليا ياختى طمنينى عليكى وقوليلى إنك بقيتى كويسه عشان أنام مرتاح
تاليا اتنهدت برغم دموعها إلا نازله فى صمت : الحمد لله كويسه .. عيطت تانى .. انت بقيت تهون عليا كتير  سامحنى لو ظلمتك .. سامحنى لو دا ذنبك إلا فى راقبتى
ياسين أبتسم : مسامحك وعلى قولك يمكن كنا شر كبير لبعض وربنا بعده عننا .. الحمد لله على كل حال والحمد لله إن ربنا نجاكى ونجانى روحى أرتاحى وانا الصبح ها اجبلك إخواتك ونصفى كل إلا بينا أنا مش جاى أعيش وسطكم انا واخواتى فى معار.ك .. أنا وعدتك أتغير وهاتغير وهما كمان ها يتغيرو معلش أتحمليهم على ما مخهم المصدى ينضف من صداه
تاليا : عشان خاطرك وخاطر جمايلك أنا ها اتحمل أى حاجه لحد ماتبقو فى امان بجد
ياسين بهدوء : كتر خيرك تصبحى على كل خير وطيب يابنت الأصول
تاليا بهدوء : وأنت بخير  قفلت وطلعت غيرت نامت بتعب وإرهاق .. بتمر الايام وبطن تاليا بدئت تظهر  اختفت معالم الانوثه الرقيقه  من ملامحها البريئه وظهرت عليها معالم الأمومه وتعب وارهاق الحمل
مرررر شهرين بالتمام  .. شهرين اتغير فيها حاجات كتير وأولهم شكل العلاقه بين تاليا وبين ولاد عمها بقت احسن واهدى .. ساميه لقت شغلانه جديده تشغلها بما انها مابتروحش المدرسه بتعلم إخوات ياسين .. الكلام .. المشى .. اللبس .. وحصه محو الأميه المعتبره و تاليا بتشاركها بعد مدرستها لو قدرت
رامز بعد عن إخواته ورامى قال للميس تسيبه براحته لحد ظهور تاليا وساعتها ها يفكرو يعملو معاه ايه وهو إلا ها يتصرف هى ما تتدخلش 
جوز لميس سحب ورق اولاده من المدرسه وأختفى لما عمل كذا محاولة صلح مع لميس ورفضت نهائى 
عبد العزيز مفقدش الامل إنه يلاقى بناته وابنه مفيش يوم ما بيدورش عليهم فى كل مكان ولا بيبعت رجاله هنا وهنا
عمرو برغم محاولاو أمه وابوه لرجوع منى بس قفلو مخهم وهى رفضت الرجوع تماما لحد ما عمرو يجى يعتذر عن إلا عمله  ويصالح أختها بنفسه وكان رده اتفلقى أنتى وهى ..
المشهد اتقلب وأختلف تماما من حياه روتينيه لناس عاديه  لحياااه كلها أكشن وإثاره لأتنين غابو عن وطنهم وعن حضن ناس بتحبهم وبتتمنى قربهم من وقت ما يقرب الخمس شهور ونص اكتر شويه او اقل شويه ..
أدم وعصام بيجرو وطيارات هيلكوبتر بتطير فوق راسهم بيضربو نار بعشوائيه رجولهم من شدة الجرى ماتشفوش ملامح لجريهم على الأرض .. 
أدم وقف وعصااام صرخ بقوه ونهجه فظيعه : إجررررى يا مجنون
❤❤🧡🧡💛💛💛
بقلم : لبنى طارق
💚💚💙💜💜💜💜💜