صقر الظلام

صقر الظلام ١٦

صقر الظلام ١٦
*************
اللهم صل على محمد وعلى آل محمد، كما صليت على إبراهيم، وعلى آل إبراهيم، إنك حميد مجيد، اللهم بارك على محمد وعلى آل محمد، كما باركت على إبراهيم وعلى آل إبراهيم، إنك حميد مجيد“. متفق عليه. –
“اللهم إني ظلمت نفسي ظلما كثيرا ولا يغفر الذنوب إلا أنت، فاغفر لي مغفرة من عندك وارحمني، إنك أنت الغفور الرحيم. متفق عليه. –
“اللهم إني أعوذ بك من العجز والكسل، والجبن والهرم والبخل ، وأعوذ بك من عذاب القبر ومن فتنة المحيا والممات”. متفق عليه
اللهم صل وسلم وبارك على سيدنا محمد وعلى آله وصحبه أجمعين

❤❤❤🧡💛💛💛💚💚💚💚💙💙💙💙💜💜💜💜
تاليا بدئت تتحرك جامد بخوف فتحت عيونها واتنهدت لما شافته ضاممها : حرام عليكى بتعملى فينا كدا ليه
تاليا رمت راسها على صدره بتقل شديد وتعب .. قومها وخد الشنط وطلع برا بيها ركب معاها التاكسى إلا منتظرهم
قالت بلسان تقيل : مودينى فين
أدم : هانرجع حالا بطايره أنتى جبتينى على ملى وشى
تاليا برجاء : لاء .. ارجوك عايزا اروح لرامز اخويا ضرورى
أدم بيتأملها : أنتى مالك مش قادره تتعدلى ليه فى حد شربك حاجه
تاليا بتعب شديد ؛ مش عارفه دماغى وجعانى قوى ومش قادره افتح عينى
أدم بص للسواق : أقف جمب اى صيدليه من فضلك
السواق هز راسه ووقف فعلا جمب صيدليه .. تاليا وهى نازله خدت شنطة الفلوس مارديتش تسيبها فى العربيه .. دخل قاس لها الضغط والسكر اتفاجئ إن السكر واطى جدا جدا عندها
الدكتور : أكلها حاجه مسكره بسرعه و دلوقت حالا
أدم خرج بيها وقف قدام محل عصير قصب وجاب لها عصير واجبرها تشربه كله ووقف قدام محل حلويات وجاب لها بسبوسه بردو أكلها منها .. وناول السواق ياكل معاهم  .. خدها تحت دراعه وباصص لها .. عامله إيه دلوقت
تاليا هزت راسها ؛ الحمد لله احسن بكتير
أدم بزعل : أنتى بتضرى نفسك مش بتضرينى   .. تاليا أعقلى أنا مش عدو.ك
تاليا رجعت راسها تانى على كتفه وساكته ما بتردش عليه أبدااا
أدم أتنهد : عايزا تروحى لإخواتك ليه
تاليا : فى امانه لازم أسلمها حتى لو ها يخلصو منى للأبد اسملها ومش مهم اى حاجه
أدم  : محدش يقدر بفضل الله يعملك حاجه أنا معاكى ماتخافيش
تاليا ابتسمت : مش خايف صورتك تتهز لما يشوفك هايقولو ساب الجديده وبيجرى ورا القديمه
أدم بهزار : مين ابن القديمه إلا ها يفكر يقولى كدا .. مفيش أجدد ولا أحلى منك فى عيونى أبتسم جااامد وبمداعبه .. وأهو يا ستى سيبت الجديده وبجرى ورا القديمه إلا مطلعه عينى وياريت عاجبها .. عارفه مين حبك أول ما شافك وقالى الله يباركلك فيها
تاليا بصاله وبفضول : مين
أدم : عامر أخويااا  قالى هى دى إلا من  توبنا وتخصنا مش رايح تتجوز عروسه حلاوه مكشوفه لخلق الله كلهم وخدت كلمتين حلوين بسببك
تاليا أبتسمت بسخريه : دايما الحلاوه بتكسب فى الأخر .. أنا مبقاش فارق عندى أى حاجه جوايا أقتنع خلاص وأستسلم
أدم  بيجاريها فى الحوار : أستسلم لإيه
تاليا لفت راسها وهى بتقول : للوحده يا أدم .. أستسلم للوحده .. كل إلا بتمناه من الدنياااا هو إلا فى بطنى وبس وأعيش فى أمان واستقرار .. بصت على الطريق .. ادخل يمين على ال.... من فضلك
السواق هز راسه : حاضر يا فندم
أدم باصص فى عيونها : ومين قالك إنى ها اسيبك لوحدتك أنا على قلبك وقلبهم
تاليا بصتله افتكرته عرف إن فى بطنها توأم : قلبهم مين
أدم ببتسامه : ولادى منك .. أنتى مكتوب عليكى تبقى أم ولادى ان شاء الله كلهم
تاليا ضحكت بسخريه هزت راسها : إن شاء الله
أدم سحب إيديها مسكها شبك صوابعه فى صوابعها باسها  وبرجاء : ماتقسيش عليا  أنا أدم جوزك وحبيبك انا إلا القدر جمعناااا من غير معاد ولا مناسبه .. شدنى ليكى وشدك ليااا
تاليا دموعها نزلت من الجمب وساكته
أدم باصص لها بطريقه بتقولها أرحمينى وأرحمى نفسك : مابترديش عليا ليه
تاليا بصوت مبحوح : لا يكلف الله نفسا إلا وسعها .. تخيل أتقبلت اى حاجه اتعملت فيا بس مش قادره أتقبل جوازك علياااا .. أنا جمرة نا.ر بتحرق فيا من جوا .. لايمكن مهما اوصفلك ها يوصلك إحساسى فقدت الحب فى لحظه .. فقدت الإحساس .. فقدت الشعور بكل حاجه حلوه هدفى دلوقت أعيش فى أمان عشان عرفت إن إلا فى إيدى مش ليا ولا نصيبى حتى حقى مش عايزاه يا أدم .. عيطت جااامد .. عارفه إنه حقى بس خلاص مش عايزا .. محتاجه ابعد عنكم كلكم .. غمضت عيونها وهى بتقوله .. هدنه الله يباركلك .. هدنه 
أدم أنسحب من الحوار ماحبش يضغط عليها بزياده سابها مغمضه عيونها برغم الدموع إلا بتنزل منها بس ضاممها بقوه مش ها يقولها تانى إنه جمبها مش ها يقولها تانى أنه لايمكن يتخلى عنها .. مر الوقت والتاكسى وقف قدام بيت رامز لما شاورت عليه .. أدم حاسبه نزلو وقفو قصاد البيت وبكل هدوء : ممكن تعرفينى جايه ليه عشان الفلوس إلا جابها ياسين
تاليا هزت راسها : أيوا
أدم : ولو قولتلك أجلى الموضوع دا شويه
تاليا بإصرار : لاء ممكن تسيبنى براحتى
أدم : تاليا موضوع ورثك فى حوار كبير لازم اقعد معاكى أفهم منك أمور وافهمك أمور
تاليا اتنهدت وبصتله : عارفه بس أخواتى بياكلو فى بعض بسبب الفلوس وقلتها معاهم ..   ها أنقذ فيهم شوية مشاعر يمكن يحافظو على بعض شاورت .. ارجوك سيبنى أعمل حاجه انا شايفه انها صح
أدم رفع إيده بإستسلام : براحتك ها افضل بعيد لحد ماتقوليلى يا ادم انا مقتنعه بكلامك بس اتحملى اى حاجه ممكن تعرفيها مهما كانت واتعاملى على اساسها .. الا معاكى دول شوية فكه بيسلكو بيها سنانهم فلوسكم أكتر من كدا بكتيرررر .. أبوكى طلع له مزارع مواشى وطيور فى كذا محافظه على مستوى الجمهوريه وبيصدر منها برا مصر غير الخضار والفاكه عمك بيختفى كل شهر يومين تلاته بيلف عليهم كلهم 
تاليا بصدمه : بابا عمره ما قال ان فى مزارع مواشى وطيور
أدم بتأكيد : ومقالش حاجات كتير جدااااا  انا لحد اللحظه دى مش فاهم ليه مقالش بس قربت اوصل هاتساعدينى والا تستسلمى لوضعك ولعمك إلا نهب ثروه ملهاش أولها وأخرها مش معروف  عارفه لو هتاخدى حقك وتوزعيه على الجمعيات الخيريه أنا ها ارتاح إنما ياكله بالبساطه دى ويحرمكو من كل جنيه وكمان عايز يقتلك
تاليا قلبت وشها : يقتلنى
أدم بتأكيد : أيوا إمال أنا معين حراسه عليكى ليه ذكريا بنفسه مهتم بالموضوع .. ذكريا حبيبى اه بس ما ينفعش أشغله عندى هو مش تحت أمرى ..  لما بدء يدور وراكو كلكو أتاكد إن الموضوع كبير وخطير أنتى حياتك فى خطر فاهمه ليه أنتى بالذات دا اللغز إلا أبوكى خباااه سنين ورفض يبوح بحقيقة ثروته .. أنتى يا تاليا سر لازم نكشفه ونكشف ورقه
تاليا دماغها لفت .. افتكرت كلام ابوها .. صاحب الأمانه مين .. أبوها ملوش غير حاجات معينه وبسيطه .. نفضت راسها من الأفكار وقربت من رصيف تحت البيت قعدت عليه وأدم واقف قدامها ماسك الشنط .. تاليا هاتمشى والا تطلعى
تاليا خدت نفس : لازم أطلع لهم بابا له حق يجيب الفلوس دى وأكتر .. مدت ايديها مسكها وقامت ونفض هدومها من ورا طلعت بردو ونفذت إلا فى دماغها .. رنو الجرس وانتظرت الباب يتفتح
عبير بصت من العين السحريه وأتفاجئت بتاليا .. دخلت جررررى لرامز شدته من على السرير : قوم
رامز بخضه زعق : براحه فى إيه
عبير : اختك تاليا برا ومعاها واحد
رامز قام بخضه وربكه فا اتخبط فى درج الكومدينو .. مسك دراعه .. ااااه اقفلى الزفت دا .. أطلعى ها البس بسرعه
عبير خرجت خدت نفس وراحت على الباب فتحت أول ما شافت تاليا بصوت عالى : تالياااا مش ممكن .. أهلا أهلا وقربت حضنتها وباستها .. شاورت على بطنها .. ربنا يقومك بالسلامه يارب
تاليا ببرود وتعب : يارب .. رامز موجود
عبير هزت راسها : ايوا موجود .. شاورت مين حضرته
تاليا شاورت : أدم جوزى
عبير : يا ألف اهلا وسهلاا .. اتفضلو رامز هايطير من الفرحه لما يعرف بوجودكم هناااا بعد اذنكم
أدم قعد وتاليا قعدت جمبه لحظات كان دارس المكان  بعيونه بإدقان شديد همس : شقته كويسه ومهتم بيها مستواه المدى كويس
تاليا بهمس : بيتهيئلك مستواه المادى تعبان بيحقق لمراته كل حاجه على حساب نفسه للأسف لأنها دايما تبص لغيرها ومش عايزا حد أحسن منها مديون بديون كبيره مش ملاحق من ساعة وفاة بابا الله يرحمه
أدم هز راسه وسكت .. رامز طالع ببتسامه وترحيب قرب من أدم الأول سلم عليه : أهلا بجوز أختى الغاليه يا مرحب بيك
أدم ابتسم : عامل ايه يارب ماتكون واخد موقف منى
رامز هز راسه بنفى : أبدا أبدا .. إلا ها يحب تاليا ها أحبه وإلا ها يكره تاليا ها اكرهه
تاليا رقعت ضحكه صدمتهم ماعدا أدم بيدارى الابتسامه بالعافيه
رامز بصلها : بتضحكى على اخوكى
تاليا : لا والله يا رامز بس فى حد حبيب أدم قوى قوى لسا قايل  الكلمتين دول بردو  
رامز نطر ايده وابتسم : ياستى ربنا يكتر حبايبكم حد يكره
تاليا بضحكه : أنا بكره
أدم : ههههههه معلش عصير القصب أثر على مخها .. أفصلى واقعدى
تاليا هزت راسها : حاضر قعدت ورامز قعد وأدم وعبير واقفه بصلها : انا عايزك تنزلى تجيبى ديك رومى وتعملى احلى أكل إنهارده 
أدم : ماتتعبش المدام إحنا مش هانقعد للغدا فى موضوع  مهم لازم نتكلم فيه  ونخلصه مع بعض ونمشى
رامز : موضوع ايه
تاليا : موضوع يخص ورثنا 
أدم لما فهم إنه مديون ومراته بتجبره يداين لسد إحتياجها قطع الشك من ناحيته : إخواتك لازم يحضرو القاعده دى لو تحب هنا ماشى .. تحب فى مكان تانى تمام مفيش مشكله
تاليا بصتله أدم داس على ايديها بمعنى تسكت .. 
رامز نطر ايده : بقولكم ايه ورث مش ورث هاتتغدو هاتتغدو .. أنزلى يا حبيبتى تعالى اديكى فلوس وأنزلى لازم ارحب باختى وجوزها  أول  مره يدخل عندنا
أدم سكت ماعلقش عليه حب عبير تمشى عشان يتكلمو براحتهم  .. لحظات وعبير نزلت فعلا والولاد نايمين جوا رامز قعد معاهم  تانى : إيه الموضوع
أدم شال الشنطه حطها قدامه وفتحها ورامز تنح شاور : ماشاء الله إيه دا كله
أدم قفل الشنطه ونزلها : دا جزء من حقكم هاتقسموه على بعض
رامز : جبتوه ازاى
أدم منعها تتكلم وحب يدير هو الحوار  : أنا جبتهم بمصادرى الخاصه وتاليا ماحبتش تاخد جنيه غير فى وجودكم كلكم
تاليا :  من ساعة ما أدم جابهم  وهما  فى الشنطه محدش لمسهم  قولت ها أفتحها ونقسمها مع بعض  .. اتصل بإخواتك هاتهم عملت ايه فى فلوس الدهب
رامز شاور : لسا الفلوس جوا
تاليا بإستفسار  : ليه المفروض كنت ودتهم من زمان يا رامز
رامز هز راسه : اقول لهم ايه .. انا وعدتك ما قولش إنك فى مصر  لفد ايده ..   جبتهم ازاى عملت ايه .. ملحوقه وزعيهم مع دول برغم إنى بنصحك لا تعبرى رامى ولا لميس الاتنبن ما يستهلوش إلا بتعمليه عشانهم
أدم أتعدل وبصله بطريقه  وترته : تفتكر ممكن قلبهم يرق زيك لتاليا لو خدو المبلغ إلا هنا
رامز بنفى : لميس أبداااا .. رامى ممكن يمشى مع مصلحته .. وبعدين لميس كانت هاتمو.ت جوزها والراجل بين الحياه والمو.ت فى المشفى
تاليا شهقت وحطت ايديها على بوئها : ليه
رامز حكى لهم إلا حصل او إلا اتقاله : بس طلعت وقاعده بعيالها إجبارى لا هى طايقه العيال ولا العيال طايقنها بمعنى الكلمه
أدم : وإيه يجبر الراجل انه يتهجم عليها وانت بتقول إنه بيربى الولاد بعيد عنها وهربان من القضايا المرفوعه عليه ها يضحى بولاده بمنتهى السهوله دى
رامز هز راسه بنفى : أكدب عليك لو قولتلك إنى فاهم حاجه لحد دلوقت ولا أعرف عنهم الأتنين أى حاجه 
تاليا بحزن شديد بدئت تعيط تانى
أدم اتنهد وحط راسه بين ايده دعكها وبصلها : تاليا ارحمينى العياط ها يجيب أجلك
تاليا نطرت ايديها : أنت مش سامع .. اصلك ماتعرفش مجدى بالنسبالى إيه الوحيد إلا وقف جمبى وكان بيقول كلمة حق قدامهم كلهم حتى الفلوس لما كانت تأزم معايا ويحس إن مفيش معايا فلوس كان بيدينى  هى ليه الدنيا جايه على الناس الكويسه وواقفه جنب الناس الظالمه .. حرام والله حرام
أدم : عشان الظالم يزيد فى ظلمه فايروح فى داهيه محدش يعبره لما الكل يعرف حقيقته والكويس ربنا يكفائه على صبره وإيمانه .. وبحده  هانبطل ندب وعياط والا إيه
تاليا مسحت وشها وسكتت ربعت إيديها وهى باصه لأخوها ورامز مستغرب تاليا مش دى طبيعتها أبداااا .. كانو مسمينها الفارسه المقا.تله .. قويه لدرجه إن محدش قدر عليها .. ليه بقت كدا حساسه زياده دموعها قريبه بزياده .. فسألها بتلقائيه : راحت فين الفارسه والمقا.تله تالياااا
تاليا ابتسمت ونطرت إيديها : راحت فى الوبا
أدم بصلها وأبتسم : دانتى عنيده قديمه بقى بس عليا لوحدى
تاليا : ههههههههه عليكو كلكو
رامز : مالك يا تاليا طب والله انا مستغربك
تاليا بصت لأدم ورجعت بصت لرامز : الحقيقه .. من اللحظه إلا حسيت إن فى شئ جوايا جديد وبدئت  شخصيتى تتغير بسرعه وغصب عنى .. بقيت أخاف أكتر .. دموعى أقرب .. سلوك ممكن يكون غريب عليا بس بعمله .. فى اللحظه دى  فهمت شعور الحيوانات إلا بتخاف حتى من اصاحبها وهى حامل وممكن تعاديهم كل دى أمور أنا مليش يد فيها يا رامز  .. بتنقل إيديها .. البنت قبل الجواز غير بعده .. وقبل الخلفه غير بعدها كل مرحله من حياتها فى هرومانات بتتغير وطبيعه بتختفى عندها وتحتل مكانها طبيعه تانيه خالص فا راعو دا كله معايااا عشان فعلا تاليا مش تاليا
أدم لف إيده حوالين ضهرها قربها منه وباسها هز راسه : وانا بردو أدم مش أدم ووقعتك سودا لو مارجعتيش تاليا
تاليا بصتله بنظره قاطعه إلا هو مهما عملت خلاص مجرد وقت 
أدم بجديه : أتصل بيهم وياريت ماتعرفش لميس إننا عرفنا حوار جوزها
رامز قام وقف : حاضر برغم انى مقاطعهم بس مش ها ازعل تاليا ولا جوزها    .. اتصل بيهم وبلغهم وجود تاليا وأدم والاتنين سابو كل حاجه فى إيديهم ولبسو وهيئو نفسهم ولبست ولادها أحسن لبس عندهم وطول الطريق تهزر وتضحك معاهم وتقولهم انها بتحبهم جدااا بابا كويس بس مسافر برا دلوقت
**
ياسين يوميا يطلع يشتغل وينغمس فى الشغل أكتر وأكتر  ويرجع اخر النهار مهدود ما بيكلمش البنات فى حاجه ياكل اللقمه ويدخل أوضته .. طول الوقت يفكر فى اليوم إلا أمه راحت فيه وعمه ومرات عمه .. معقول أبوه له يد .. معقول .. مره يكدب نفسه ومره يقول اااه إلا يفكر يقت.ل إبنه وبنت اخوه أكيد له يد ..
ثريا جايبه الطقم الجديد إلا نزلت جابته مع ساميه لبسته عباره عن جيبه واسعه وبلوزه وطرحه نفس لون الجيبه وجزمه .. بتتفرج على نفسها فى المرايه وفرحانه قوى بنفسها بتلف بفرحه وطالعه تجرى على برا : توحيده إيه رايك ياختى
توحيده ببتسامه : قمر .. إيه يا بت الحلاوه ديت .. لن اخرج من جلباب أمى أديكى خرجتى يا حزينه
ثريا : هههههههه ... ساميه وتاليا الله يبارك لهم خلونا حاجه تانيه خالص
توحيده : ساميه بتقولى اعدل ام لسانكم واعلمكم القرايه والكتايه وأقدم لكم فى المدرسه ههههههه  عشان ناخد شهاده .. هزت ايديها ولوت شفتها .  أل بعد ما شاب ودوه الكتاب يابت يا ثريا
كريمه طالعه من المطبخ فى ايديها طبق فاكهه بتاكل فيه .. شهقت وضحكت : إيه يابت  الحلاوه دى يا مضروبه كلك تاليا بنت عمك
ثريا بفرحه ضحكت وبقت تلف يمين وشمال جريت على البلكونه   وهى بتضحك وبمجرد ما وقفت واحد واقف فى البلكونه إلا قصادهم صفر : هو القمر بيطلع بالنهار عادى كدا .. فى داخله كريمه وراها .. قلبت وشها وبصوت يخوف : بيطلع ومعاه شومه تفشفش راسك حته حته يا خفيف جاتك ضربه تجيلك فى كلوتك .. شدت اختها .. ادخلى تعالى .. دخلت جوا وقفلت باب  البلكونه بصتلها بحده .. ماتقربيش النواحيدى تانى دا راجل قليل الربايه
ثريا بتذمر : ماله ماهو  راجل والسلام ما تسكتى يمكن يتجوزنى هانفضل فى وش بعض كدا
كريمه : يا هبله دا متقردن على عينه متجوز ومخلف تلات قرود شبه كدا قاعدين فى الجباليه إلا ورا ليل نهار أنى عارفه ( تقصد البلكونه الا ورا )
ثريا شهقت : متجوز أخص عليك يا حزين وبتعاكسنى وتشاغلنى ليه بس
كريمه : عشان شايفك هبله مستنيه كلمه والا نظره أدخلى لو ياسين سمعنا ها يقطع خبرك وخبرى
ثريا نطرت إيديها : ياختى هو ياسين سامعنا وإلا شايفنا أديلو كام يوم أهوووو
كريمه هزت ايديها : مهموم يا كبدى بخمس بلاوى فى راقبته غير ابوكى تلاقيه قالب علينا الدنياااا
ثريا رفعت إيديها لفوق : قالبه تقلب مراته ماتتعدل بعدها أبداااا .. قالتها بحرقه .. وحشتنى دارنا برغم إن هنا أحسن بس وحشتنى
كريمه : لازمن توحشك داحنا سمك لا نعرف غيرها ولا بنطلع براها .. زقتها وضحكت .. بس أسكتى داحنا عايشين شفنا إلا عمرنا ما شفناه ولا سمعنا عنه لاء ولبسنا  حلوووو  .. شفتشى ومشتشى
ثريا ضحكت بصوت عالى وكريمه شدتها دخلو جوا عشان تغير 
ياسين خرج من الأوضه وبحده : مالكم عاملين دوشه ليه
ثريا قربت جرى عليه وبفرحه : بص يياسين لبسى الجديد بقيت حلوه وقمر
ياسين شاور : هاتمشى كدا يا ثريا
ثريا بعدم فهم : مالى كدا ما تاليا بتمشى كدا وبتموت فى التراب إلا بتمشى عليه عيب يا يياسين وإلا عيب
ياسين مسكها من دراعها ضغط عليه وبحده كبيره : ملكيش دعوه بتاليا ولا بغيرها هنااااا .. زعق بصوت عالى .  انا جايبكم مش عشان تلفو وتدورو على حل شعركم اللبس أنى إلا ها اجيبه حتى الأكل والشرب أنتو فاهمين
توحيده بحمقه : ليه هربنا من نا.ر أبوك عشان تدخلنا نا.رك مالكم كدا إحنا عملنا فيكم إيه لدا كله
ياسين قرب منها ضر.بها وبتحذير : الكلمه إلا اقولها هى إلا هاتمشى أنى مش واخدكم من أبوكم اضيعكم هناااا زى ما حافظتو على روحكم هناك .. شاور هاتحافظو عليها فى أى مكان أنتو فيه . زعق أكتر .. أنى بليت نفسى بيكم  كان لازمن تفضلو تحت عينه بكل ظ.لمه وجبرو.ته بس مربى بناته .. سابهم ودخل جوا رزع الباب وراه
الخمسه واقفين مصدومين .. لايمكن يكون دا ياسين دا نسخه من ابوه بدء يتشكل فى توبه وأخلاقه
ثريا عيطت هى وتوحيده وقعدو جمب بعض
كريمه زعقت بتسمعه  : لو هى هى العيشه رجعنا لأبونا وريح روحك مننا
منال فتحت باب اوضة ياسين ودخلت لقته قاعد يعيط أول ما شافها مسح دموعه وكش فيها : إيه مدخلك عليا عايزا إيه انتى روخره
بدون أى خوف قربت منه وقعدت جمبه ابتسمت ومسدت عليه : مالك يا اخويا إيه مزعلك مننا واحده فينا عملت حاجه كدا وإلا كدا
ياسين لف وشه واتخنق : لاء يابنت أبويا
منال ابتسمت : أول مره تقولها وبحزن كمان .. أنا اختك ضى عيونك من جوا يا حزين
ياسين بصلها : فضلتو تقولو يا حزين يا حزين .. لحد ما بقيت حزين بجد الفرح خايف يقرب النواحيدى .. إلا عشناه كله كوم يا منال وإلا هانعيشه كوم تانى خالص 
منال لسا هاتفتح بوئها الاربعه هجمو على الاوضه واترمو فوق بعض ..
ثريا ضربت حكمت وهى واقعه على الارض  : كسرتيلى الكعب الجديد يالهوى
توحيده : كعب أيه وزفت إيه فوق دماغك هاتى كوبايه من المطبخ حطيها تحت رجلك واسكتى
أمانى : الكوبايه كبيره يا حزينه تجيب صحن أحسن
كريمه ضحكت ضحكه ضحكتهم كلهم : ثريا أبو طبق
كلهم : هههههههههه
منال بصتله : عايز تحرم روحك من الأشكال العفشه داهين
ياسين بصلهم  معقول ممكن ربنا يرد كل إلا عمله فى أخواته البنات  سكت وبقى يلف فى ايده يمين وشمال الشاب أو الراجل لما بيعمل حاجه حرام مش من حقه بيبقى مغيب عن الواقع لا بيفكر فى امه .. أخته .. زوجته .. بنته .. بيفترى عليهم لما يفوق بيبقى عامل زى الكلب المسعو.ر  ويديق عليهم عيشتهم ليترد فيهم وبدال ما يبطل ظلم بيزيد فى ظلمه وظلم إلا حواليه وقهرهم منه لحد يكرهوه ويكرهو عيشته ..
توحيده ؛ حقك عليا يا أخويا والنبى ماترجعنا لأبوك هانسيب شرق ونروح فين لهبه
ياسين بصلها وضحك : شرق ايه انتى كمان شرم
توحيده ضحكت : شرم .. شرق .. المهم نفضل هنا دانى حبيتها حبيتها
ثريا بصتله وبمرواغه : هاتسيبنى ألبس اللبس الحلو داهون والا أسلط عليك ساميه
ياسين رفع إيده لفوق وبهزار : لاء أبوس إيدك  كله إلا ساميه دا ممكن تطردنى من الشقه ومن الشغل  أنتو مش شايفين عامله إيه فى أبوها كل ما يشوفنى يقولى بتخلص حق أمها ياريتها فضلت عايشه  ورحمتنى منها
منال : هههههههه عرفنا خلاص نقطة ضعفك وهانجيبك ازاى
ياسين بصلهم وبجديه : والله أنا شايلكم فوق راسى بس حافظو على روحكم فى وجودى وغيابى  يوم ما اعرف إن واحده فيكو بتعمل حاجه كدا والا كدا ها أطخ.ها عيارين ومش ها أندم .. فاهمين
هزو راسهم الخامسه : فاهمين
ثريا رفعت رجليها : حلوه الجيبه ههههه
ياسين : هههههههه أنتى لابسه الكلسون بتاعى يابنت الحر.ميه
ثريا : ههههههههه لاء أشتريت زيه بيدفينى فى لسعة البرد وبيسترنى وأنى نايمه زى البقره مش دريانه بروحى
ياسين فضل يضحك ونطر ايده : صدقتى .. بقره 
**
عصام لابس ونازل
عزت : رايح فين دلوقت
عصام ابتسم : صباح الخير يا بابا
عزت ساب التليفون وقلع النضاره : صباح النور
عصام : غريبه إنك تفضل فى البيت ماتنزلش لشغلك
عزت : مستنى حضرتك تقوم عشان نتكلم أجلت كل إلا ورايا عشان خاطرك
عصام قعد وفاهم هو قصده إيه بالظبط : خير أتفضل
عزت خد نفس وطلعه ضم ايده عند بطنه : إيه إلا أنت قولته لعمك إمبارح فى الفرح من غير ما ترجعلى
عصام هز راسه بفهم : أفتكر الموضوع مش جديد على حضرتك .. عايزنى اتجوز وانا كمان عايز بس ساميه عايز ساميه
عزت اتعدل وبحده فى كلامه : أنت كبير وعاقل كفايه مش لازم أوجهك وأقولك جوازك من ساميه غلط مش قصه بنعيد ونزيد فيها
عصام نطر إيده : لو جوازى من ساميه غلط  إيه هو الصح بعد عمرى إلا ضاع دا كله .. أنت عارف انا عندى كام سنه .. طب عارف أنا عشت اتعذب اد إيه بسبب جوازها اصلاااا .. بابا أرجوك بلاش تحطلى العقده فى المنشار وزى ما وقفت فى وشى زمان جاى تقف دلوقت
أميره خرجت من جوا برغم تحذير عزت لها ماتدخلش ..  ولادها كلهم برا مفيش حد موجود خايفه الأمور تطور بينهم : عزت يا حبيبى أسمع أبنك وريحه ارجوك بلاش عند
عزت : أنتو إلا بتخلقو العند معايا قبل ما يسافر قالى ها انزل أعملك إلا انت عايزه .. هو دا إلا انا عايزه يا عصام .. ساميه تانى
عصام : بابا أنا ما صدقت إنها تلين وتوافق
عزت زعق جامد : وانت قاعد تحت رحمتها .. أنا قولتها وبقولها تانى جواز من بنت عمك لاء .. مش ها اشيل عيل الف بيه الكره الارضيه عشان أعالجه .. زعق جااامد .. عمك ماااات والتانى كانو بيلفو بيه لما ماتو بحصرتهم وتعبهم عليه عشان لحق التانى  ما فضلش غيرى أنا وادهم
عصام بصله برجاء : هانعمل التحاليل وكل حاجه تخص الموضوع دا عشان نريحك
أميره بصتله : حل وسط
عزت مخه اتقفل : ماتنزلش عمك هارون جاى والا ها يحكم بيه بينكم انا موافق عليه مهما إن كان
عصام وشه اتقلب ميه وتمانين درجه : يعنى إيه ناوين تعملو فينا إيه
عزت زعق : ناوين نعمل كل خير  أنت وهى إلا قولتو بلسانكم إحنا موافقين على أى حكم علينا
أميره مسكت عصام : عصام إهدى وخد الأمور براحه وشاور جدك هارون عرفه انت ناوى على إيه .. وهو ها يتفهم الموضوع صدقنى
عصام لمح ضحكة سخريه على وش أبوه وتيقن إن فى اتفاق إشمعنا جاى تانى يوم ما طلب ساميه للجواز  .. أتنهد وبص لأبوه :  محدش هايعرف يجبرنى على حاجه انا مش عايزها
عزت وقف قصاده مسكه من قبته بقوه وشده وكلامه كله تحدى : هاتقف فى وش أبوك وعمك .. هاتخسرنا كلنا عشان جوازك
عصام وشه أحمر : أنا مش عايز ازعلك منى بس انت مصر تزعلنى وتكسر راغبتى بأى طريقه عشان عيشتو تجربه قديمه الله اعلم مكتوبه ليا والا لاء .. بس عشان تكون عارف الاطفال إلا بيحصل فيها نسبة تشوهات مش شرط تكون من القرايب فى ناس ماتعرفش بعض ولا فى قرابه ولا غيره وبيحصل بردو
الجرس رن وعزت زقه بغيظ .. راح فتح كانت ساميه إلا واضح عليها انها قايمه من النوم جايه عليهم هى وأبوها .. شاور لجوا باين عليه  مدايق جدا  : اتفضلو
ساميه قربت منه تبوسه زى ما بتعمل بعد وشه عنها وشاور : ادخلى يا ساميه
عصام باصص لها ولأبوه غمض عيونه وادايق على إحراجها لفت راسها بإحراج وإنكسار ودخلت
أدهم بصله : مالك على الصبح مش عايز ساميه تبوسك ليه
عزت : أدهم ادخل واسكت انا مدايق
أدهم نطر ايده ؛ طب مش داخل زعق .. ياله يا ساميه
عزت مسكه وشده : أدخل ما تجننيش عليك بقولك مدايق فى إيه هاتقعدلى على الوحده أنت كمان
أميره بصتله برجاء فادخل ما اتكلمش تانى .. قعد هو وساميه ساكتين بعد ما سلمت على أميره وعصام .. رساله جتالها على الفون فتحتها لقتها من عصام : أسكتى وملكيش دعوه بأى حاجه تحصل ولو قالو حاجه اختارينى انا وبس وسيبى الباقى عليااا
ساميه بصتله بخوف وشبه فهمت إن الموضوع متوتر بسببهم .. جت لها رساله تانيه .. افردى وشك
ساميه : لاء
عصام : جاتك لويه هاتفرديه لأقوم افرده بقلمين زى إمبارح 
ساميه : هههههههههه .. رفعت راسها بصتلهم  لما نظرهم راح عليها وخطفت نظره لعصام ابتسم وغمز ورجع وشه فى لحظه طبيعى زى ماهو ..
وقت بسيط جدااا والجرس رن وكان قدوم هارون الفيصل بينهم كلهم ياترى ها يقول إيه ويحكم بإيه لسااا هانسمع ونشوف ..
قعد وأميره قامت هى وساميه عملو فطار وقعدو كلهم فطرو وبعد الفطار عملو القهوه ..  أتجمعو كلهم وهارون بينهم 
هارون بصوت عالى : اللهم صل وسلم على حضرة سيدنا النبى
كلهم : عليه افضل الصلاة وأذكى السلام
هارون بص لساميه : منوره يا ساميه بقالى زمن لا شفتك ولا اعرف عنك حاجه غير بعد طلاقك
ساميه بتوتر : الحمد لله ياجدى إنك شفتنى
هارون ابتسم : كيف الحال دلوجت .. كلامنا طلع كله صح ماكدبناش عليكى روحتى جيتى اخرتك بقت فى بيت ابوكى زى ما أتوقعنا لما شفنا الواد وقعدنا معاه   
ساميه بتأكيد : عندك حق يا جدى فى كل كلمه قولتها أنا مسمعتش لحد فيكو غير نفسى  ومحدش دفع التمن قدى انا موافقه
عصام قاطعها : أسف يا جدى انى قطعت كلامكم .. بس عايز أفهم وجودك انهارده بالذات كان طلب من بابا
هارون بحده : وإفرد يا عصام من ابوك وجودى مدايقك والا حاجه
عصام بنفى : لا ابدا .. أنت على دماغى من فوق  ومرحب بحضرتك فى أى وقت
هارون : إمال بتسأل باندفاع وقاطعت بنت عمك قبل ما تدينى موافقتها على كلامى أوعى  تفكر إنى مش فاهمك
عصام فرد إيده : ريحتنى ياجدى وكويس إن حضرتك فاهمنى وعارف انى بحب ساميه وعايز أتجوزها من زمان
هارون خبط بالعصايه وبحده : وزمان بردو قولتلك اتجوزها وأحميها من الواد دا قولتلى ماتلزمنيش ياعمى ولا عايزها
ساميه بصتله بصدمه أول مره تسمع الكلام دا
عصام : ماتلزمنيش وهى مشغوله بغيرى .. مش عايزها وهى بتحب واحد تانى وانتو عارفين دا كويس .. أنا عايز ساميه ياعمى وأرجوك أقنع ابوياااا واقنع عمى ادهم ما يقفوش فى طريقنا يسيبونا نعيش إلا راح مننا
هارون بص لأدهم : أنت موافق على جواز عصام من بنتك  يا أدهم
أدهم بص لعزت إلا ذغر له وأتنهد وسكت شاور : إلا اخويا موافق عليه انا موافق عليه عشان مايرجعش يلوم علياااا بنتى أهه قدامكم موافقه على كلام جدها  .. لف صباعه وعشان ماترجعش تقولى إنى بفرض عليها حد
هارون بص لعزت : وانت ياعزت
عزت برفض تام : لاء ياعمى .. أنت أكتر واحد لفيت مع أبويا بإخواتى الله يرحمهم ساميه بنتى وبنت اخويا وأخت لأولادى وبس عصام مندفع بأسم الحب وهى دلوقت بتتخبط لا عايزاه زوج ولا حاجه .. بص لعصام .. وأوعى تنسى ياعمى إن عصام حكم على نفسه وحلف ينفذ حكمك عليه هو وساميه لما وقف قصادنا وعملها إلا هى عايزاه وجوزها الواد الصا.يع إلا وقعت فيه وكسرو بخاطرنا كلنا
عصام بحده وزعل : بلاش يابابا تدخل من المدخل دا .. بلاش تشتتنا بعد ما اتجمعنا تانى أنا دلوقت بعمل اى حاجه بشورتكم وبعلمكم بس بعد كدا لاء
هارون زعق : عصام .. من امتى صوت الصغيرين يعلى  على كبارهم .. .. زعق أكتر وأنت كمان اوعى تنسى إن دا أبوك ..  هو مش دا كلامك بردو والا أبوك بيألف قصه
عصام بحده ؛ ما بيألفش بس ها تخسرونى .. وقف ولأول مره يبان الشر فى افعاله وكلامه  قسما بالله يا عمى
ساميه قامت بخوف : عصام أستنى انت ماخدتش منى الموافقه  كامله
عصام زعق ؛ انتى تسكتى وتقعدى
ساميه زعقت هى كمان : لاء مش ها اقعد يا عصام وبدال ما تقف قدامهم كلهم اقف قدامى أناااا .. جدى أناااا
❤❤🧡🧡🧡💛
بقلم : لبنى طارق
💛💚💚💙💜💜💜