မတူညီသည့်မျက်နှာနှစ်ခုတို့ဟာ မိနစ်အနည်းငယ်ကြာသည်ထိ တယောက်ကိုတယောက်စိုက်ကြည့်လိုက်ပြီးနောက် ဖိန်ရှာလည်း ပခုံးကိုအသာတွန့်ပြကာ "မင်းထင်ချင်သပဆိုလည်း ငါက ကိုယ်ပွားလွှတ်ပြီး အပေါ်ထပ်မှာပါ ဗြောက်အိုးတွဲကို သွားဖောက်ခိုင်းလိုက်တယ်လို့ ထင်လို့ရပါတယ်"
ပေါဟာကတော့ ကျောချမ်းဖွယ်အကြည့်မျိုးဖြင့် သူ့ကိုစိုက်ကြည့်ပြီးနောက် သလင်းကျောက်ကြမ်းပြင်ကို ကွင်းထိုးဖိနပ်နှင့်ရိုက်နေသည့်အလား ခြေကိုဆောင့်နင်းကာ အပေါ်ထပ်သို့ တက်သွားပါတော့တယ်။
ဖိန်ရှာကလည်း သုတ်သီးသုတ်ပျာဖြင့် ပေါဟာနောက်ကို အရိပ်လိုကပ်လိုက်ခဲ့ပါလေတယ်။ ဒီလိုရင်ခုန်စိတ်လှုပ်ရှားဖွယ်ရာပြပွဲကြီးကို သူဘယ်လိုတောင် လက်လွှတ်ခံလိုက်ရမှာလဲလေနော်... အထူးသဖြင့် သူကိုယ်တိုင် ဇာတ်ညွှန်းရေး၊ သူကိုယ်တိုင် ဒါရိုက်တာလုပ်ကာ သူကိုယ်တိုင်မင်းသားအဖြစ်ပါဝင်အားဖြည့်ထားတဲ့ အခုလိုဇာတ်မျိုးဆို ပိုလို့တောင် အလွတ်မခံသင့်သေး... တခုပဲ စိတ်မကောင်းဖြစ်ရတာက သူ့မှာ ပွဲကြည့်ရင်းစားဖို့ ပေါက်ပေါက်ဆုပ်လေးတွေတောင် ပြင်မထားခဲ့လိုက်ရဘူး... ကတီးကတီးရိုက်ရတာဆိုတော့ အချိန်မရလိုက်တာ...
လေတွန်ရဲ့အခန်းတံခါးဟာ ဟောင်းလောင်းပွင့်လျှက်။ မသိလျှင် မည်သည့်အခကြေးငွေမျှ ပေးစရာမလို၊ လွတ်လပ်စွာ ဝင်ရောက်ကြည့်ရှုနိုင်ပါသည်ဆိုတဲ့ ဆိုင်းဘုတ်တောင် ထောင်ထားတော့မည့်ပုံလိုလိုနဲ့... ကတိုက်ကရိုက်သွားကြည့်လိုက်တော့ ပေါဟာတယောက် အပြင်ဘက်ကို လှဲထုတ်ခံလိုက်ရသည့် ဗြောက်အိုးများနှင့်တောင် မိတ်ဆက်မိတော့မလိုပင်။
ချက်ချင်းဆိုသလိုပင် သူ့မှာရှိနေတဲ့ သံချေးတက်ပုဆိန်ထက်ကို ပိုမှိုင်းနေသည့်ဟန်ဖြင့် လေတွန့်အသံပေါ်လို့လာပါတော့တယ်။ အဆောက်ဦးတခုလုံးကို မိုးမွှန်နေအောင် အားပါးတရဆဲနေသံနှင့်တူတူပေါ့လေ။
"လ.. လ.. လ.. လ.. လ.. လ.. လ.. လ.. လ.. လ.. လ......"
ဖိန်ရှာလည်း ဆဲသည့်အကြိမ်အရေအတွက်ကို လိုက်ရေဖို့ကြိုးစားပါသေးတယ်။ ဒါပေမယ့် အဆုံးမှာတော့ အမြီးအမောက်မတည့်သည့် အရည်အတွက်ရောက်လာတာကြောင့် ခေါင်းပင်ချာချာလည်သွားသေးသည်။ မှန်းကြည့်ရသလောက်ဆိုရင်တော့ လေတွန်က ထိုဆဲသည့်စကားလုံးကို အသက်ပင်မရှုပဲ တခါတည်းဖြင့် အခါသုံးဆယ်လေးဆယ်လောက် ဆက်တိုက်ဆဲသွားတဲ့ပုံပဲ။ ဒါက ဘာကိုပြနေလဲဆို လူပုတွေရဲ့ကျိန်ဆဲခြင်း အရည်အချင်းဟာဆိုရင် သူတို့အရပ်နဲ့တော့ တိုက်ရိုက်အချိုးကျနေပြီးတော့ သူတို့အဆုတ်တွေရဲ့ လုပ်ဆောင်နိုင်စွမ်းအားကတော့ အရပ်နဲ့ ပြောင်းပြန်အချိုးကျနေသလားထင်ရအောင် အသက်တော်တော် အောင့်နိုင်တာပဲလေ။
YOU ARE READING
ဝိဉာဉ်ဟိုတယ် (Myanmar Translation)
Fantasyအချိန်အကြာကြီး အလုပ်လက်မဲ့ဖြစ်ခဲ့ပြီး နောက်ဆုံးမှာတော့ "ဖိန်ရှာရှီ" အလုပ်တခုကို ရှာတွေ့ခဲ့လေသည်။ ထိုအလုပ်ကတော့ စင်္ကြာဝဠာတခုလုံးမှာ ရှေးအကျဆုံးဖြစ်တဲ့ ဟိုတယ်ကြီးတခုရဲ့ ဧည့်ကြိုကောင်တာထိုင်ရန်ပင် ဖြစ်သည်။ ထိုဟိုတယ်ကြီးမှာ မိုးကျရွှေကိုယ် တမန်တော်တပါ...
