أبطال قصتنا أسرة تتكون من أب ( سعيد) وأم (سامية) وبنت (فاطمة) بتقرأ في الصف الثامن.
ـ أسرة بسيطة عايشين في قرية ووضعهم على قدر حالهم.
سعيد: يا ام فاطمة جيبي الشاي دا خلينا نمشي.
فاطمة: يمة أبوي قال ليك اديهو الشاي.
سامية: ايا بعمل فيهو يا بنتي ابوكي قولي لي يصبر.
ـ سامية جابت الشاي وسعيد بعد ما شرب الشاي ..
سعيد: انا بدور امشي للخلا دايرلكم حاجة?
سامية: اها شوال الفحم ما جبتو لينا بساعدنا شوية مع الحطب ايام الخريف دي.
سعيد: بعد ربنا يسهل! انتي براكي عارفة ما عندي قروش بعد تجيني قريشات.
سامية: ايا عارفة! ربنا يسهل, خلاص امشي تنعدل عليك.
ـ فاطمة كانت عايزة تقول لأبوها يديها تشتري مذكرات , لكن لمن سمعت أبوها قال ما عندو قروش سكتت ما كلمت أبوها بالمذكرات.
ـ فاطمة لبست لبسة المدرسة ..
فاطمة: يمة انا ماشة المدرسة.
سامية: الله يوفقك يا بنتي وينجحك.
ـ مشت فاطمة المدرسة مع بنت جيرانهم (ريان) اصحاب من هم صغار ما بفرقهم شيء الا النوم, ريان بتقرأ في ثامن مع فاطمة, ماشين ويتونسو في الشارع..
ريان: ما وريتك يا فاطمة!
فاطمة: توريني بشنو?
ريان: امس ابوي جاب لي كل المذكرات.
ـ فاطمة زعلت عشان هي لسه ما جابو ليها المذكرات, وقالت أسي بتسألني من انو ابوي جاب لي المذكرات.
فاطمة: والله ماشاءالله! كويس والله انو جابوها ليك.
ريان: وإنتي يا فاطمة جابو ليك المذكرات?
فاطمة: لالا! أبوي قال لي كويس بجيبهم ليك.
ـ فاطمة وريان دخلو المدرسة, ودرسوهم الحصص الصباحية, وجاء زمن الفطور طلعوهم البيوت لانو بفطرو في البيت.
ـ جات فاطمة البيت..
فاطمة: يمة يمة!
سامية: جيتي يا بنتي.
فاطمة: ايا يمة جيت, الفطور عملتي?
سامية: لالا! ما قضة يا بنتي عشان الليلة الحطب ما ساعدني ابا يولع لي لانو ليين من مطرة امس.
سامية: قبل الفطور ينتهي يا بنتي اقعدي اقري شوية لو بتقدري.
فاطمة: سمح يمة!
ـ فاطمة قالت الزمن اتأخر للرجعة للمدرسة, وهي جعانة شديد قالت تقول لأمها انها ما جعانة عشان تخليها تمشي المدرسة ما تتأخر.
فاطمة: يمة انا ماشة المدرسة.
سامية: والفطور يا بنتي?
فاطمة: ماني جعانة يمة شبعانة.
سامية: كيف ما جعانة يا بنتي أكلتي وين?
فاطمة: صحبتي جابت لينا مدمس كتير أكلناهو.
ـ صحبتهم ما جابت ليهم مدمس كذبت لأمها عشان تخليها تمشي المدرسة من غير فطور.
ـ رجعت فاطمة المدرسة من غير ما تفطر, في اثناء الحصة فاطمة جاعت شديد أتجاهلت الجوع لحدي ما انتهى اليوم الدراسي وجات البيت تعبانة.
ـ فاطمة عشان ما تحسس أمها انو الجوع أثر عليها, مع انو الجوع ظاهر في عيونة.
فاطمة: يمة انا جيت.
سامية: يا بنتي اعفي لي الليلة مشيتي المدسة من غير فطور, الغلط مني انا مفروض ادخل الحطب قبل المطرة, سامحيني يا بنتي!.
ـ فاطمة رأسة في الواطة وامها بتتكلم معاها ودموعها جارية عشان امها بتعتذر ليها وكلام امها الحنين ليها.
ـ سبحان الله! فاطمة ما حصل أمها بتتكلم معاها بتعاين ليها في وجها.
ـ فاطمة حضنت أمها شديد وسلمت عليها.
فاطمة: لالا يمة ما تعتذري لي مسامحاك! اصلآ انا ما جعانة , قولته ليك صحبتي جابت لينا مدمس.
ـ فاطمة عشان تخلي امها تضحك قالت..
فاطمة: يا ست الكل وينو فطورك دا ? الليلة أكلو ليك كلو لمن براك تقولي لي خلاص كفاك.
سامية: هههههه كويس يا فطومة بالهناء يا بنتي.
فاطمة: الله يخليك لي يمة ويديك الصحة والعافية وما يحرمني منك.يتبع..