ـ فاطمة وقعت دخلت في غيبوبة من قرصة العقرب, ريان صرخت بصوت عالي, في راجل كبير في العمر سمع كواريك ريان جاءهم.
ريان: فاطمة قومي!
الرجل الكبير: ماله البنية دي?
ريان: قرصته عقرب!
الرجل الكبير: لا حول ولا قوة الا بالله! العقرب قرصته صعبة يا بنتي.
ـ الرجل الكبير قرأ لفاطمة قرآن في رأسة وجرح محل قرصة العقرب عشان السم يطلع, وفاطمة رجعت للوعي وبقت كويسة.
الرجل الكبير: حمدلله بالسلامة يا بنيتي, عقرب صعبة, الله مرقك منها.
فاطمة: شكرآ ليك يا عمي! الله يديك العافية.
ـ فاطمة وريان واصلو مشيهم للبيت, فاطمة قالت لريان في الشارع قبل ما يصلو البيت ..
فاطمة: ريان ما تكلمي امي بقصة العقرب دي.
ريان: لشنو ما اكلمه كنتي دايرة تموتي!
فاطمة: لانو امي بتخاف علي شديد وبتقعد تبكي, وبتقول هي السبب في قرصة العقرب عشان خلتني مشيت الخلا, وتاني مره لو كانت عيانة او تعبانة ما بتخليني اجيب ليها الحطب بتقول بقرصني العقارب.
ريان: لالا خلاص ما بقول ليها.
فاطمة: ان شاءالله ربنا ما يفرقنا من بعض يا ريان.
ريان: ان شاءالله يا فاطمة.
فاطمة: ريان بعدين العصر تعالي لي نقرأ عشان الامتحانات قربت.
ريان: سمح لبعدين!
ـ فاطمة وريان وصلو البيت..
سامية: جيتو يا بناتي الله ينجحكن.
ريان: خالتي اعملي لينا شاي احمر تقيل.
ـ ريان قالت عايزين شاي تقيل عشان فاطمة قرصتة العقرب وعندهم قرصة العقرب بشربو ليها شاي تقيل بخفف الألم.
سامية: هههههه شاي تقيل لشنو يا بنتي قارصاك عقرب?
ـ ريان يا ربي خالتي دي عرفت بالعقرب ولا شنو.
ريان: لالا عقرب شنو يا خالتي انحنا العقرب لو شافتنا بتخاف مننا خلي تقرصنة.
سامية: هههههه والله انتي يا بنتي ريان مجرمة.
ـ سامية وفاطمة وريان يضحكو مع بعض ويموتو بالضحك.
سعيد: سلام عليكم, ريان بنتي كيف.
اهلن عمي سعيد.
فاطمة: يابا كيف قيلت? هاك الموية.
سعيد: سقاكي الله من الجنة يا بنتي.
ريان: انا نمشو البيت.
سعيد: اتغدي معانا يا بنتي.
ريان: لالا مره تانية.
ـ ريان مشت بيتم وسامية بتعمل في الغداء.
فاطمة: يابا كدي اعصر ليك ظهرك بتكون جيت من الخلا تعبان.
سعيد: ايا بنتي والله جسمي كلو مؤلمني, الله يجعل فيك البركة.
ـ جاء الصباح سعيد مشى الخلا وفاطمة مشت المدرسة وجات..
فاطمة: يـمة يـمة!
سامية: اهلن بنتي مالك فرحانة كدا الليلة?
فاطمة:
ادونا جدول الامتحانات النهائية بعد دا خلاص.
سامية: الله ينجحك يابنتي. يكفيك شر العين ويحفظك.
سامية: تعالي يا بنتي اقعدي جنبي هنا عندي كلام مهم دايرة اقولو ليك..
فاطمة: شوقتيني يمة قولي..
سامية: فاطمة يا بنتي الزول ما عارف نفسو يعيش لمتين , اصلآ الدنيا دي نحنا فيها ضيوف عندنا فيها ايام محددة بنعيشة, يعني ما عايشين معاك مدى الحياة, عشان كدا بوصي فيك تعتمدي على نفسك وترضي ربك! وتحفظي دينك! وتحترمي كبيرك وصغيرك, وتتعلمي ما تتخلي عن قرايتك الا للشديد القوي , ايا تقري الثانوي والجامعة وترفعي رأس ابوك وتقيميهو بسماعك لكلام ابوك ما ترفضي لي طلب, ابوكي قراك وعلمك عشان يقوي عينو بيك وتبقي سندو , وبعد تكملي قرايتك تشتغلي عشان تساعدي ابوكي انتي براكي عارفة الوضع العايشنو , ابوكي ما عندو زولآ غيرك.
وكان قريتي يا بنتي الجامعة في الغربة احفظي نفسك من الصحبة الكعبة وخلي اخلاقك دائمآ حميدة ما تغيريها وما تغيري واقعك العايشاهو , وانستري في الغربة واحفظي كرامتك وشرفك.
وركزي اكتر حاجة علي قرايتك الجامعة ماها لبس وشياكة راكل سمح, هدفك القراية وبس.
وما تنسي مصحفك خلي دائمآ معاك اقري القرآن كتير يا بنتي خليك قريبة من ربك بصلاتك وصيامك وعملك الصالح, خلي اي زول يشوفك يتمنى بنتو تطلع زيك ما تخيبي املي فيك يا بنتي.
ولو جاكي يابنتي ولد حلال كويس ما تابي عرسيهو لكن بعد تكملي الجامعة.
فهمتي كلامي دا يا بنتي?
يتبع..
