سامية: كيفن يعني فاطمة بنتي ما تقرأ?
محاسن: كدا ما عندنا بتآ بتقرأ, تتغرب وتختلط بالوليدات في الجامعة.
سامية: بنتي فاطمة تقرأ الثانوي والجامعة وتشتغل كمان, والغربة ماله? في درب العلم ماها عيب, وانا فاطمة بنتي واثقة منها مربياها على يدي دي, وما كل الجامعات مختلطة بنات واولاد, وحتى لو مختلطة كان بنت كان ولد المحترم دا محترم, عدم الاحترام ما دايرلو اختلاط او يتأثر بالاصحاب الكعبين, المؤدب والرايق دا من يومو مؤدب ورايق ما بتغير مهما حصل, على حسب التربية والاخلاق الآتربى عليها كان ولد او بنت.
سعيد: ايا محاسن اختي سامية كلامه صاح, وفاطمة بنتي متفوقة وجات أولى المركز ما بقيف ليها في طريق نجاحة, ما بمنعه انو ما تواصل قرايتة, وان شاء الله ربنا يقدرني واقدر اساعده وما احوجه لزول.
محاسن: قولته كدا يا سعيد اخوي! خلاص داير تمنع عاداتنا وتقاليدنا الإتربينا عليها.
محاسن: ولا خلاص سامية بقت تفرض عليك رأية وتسمع لي كلامة.
سعيد: دا كلام شنو محاسن اختي?
محاسن: ايا كلامي صاح, خلاص لمن بقيت ما بتعمل وتنفذ لعاداتنا انا ماني قعدالك في بيتك دا , ودا دربي لبيتي وينو حمود عشان نمشي ?
ـ محاسن تجوط وتتكلم بصوت عالي وقالت الا تمشي وسامية بتتكلم معاها وبترجع فيها.
سامية: متين جيتي شان تمشي?
سعيد: ماكي ماشة , وعلي بالطلاق ما بتمشي!!
ـ لمن سعيد حلف طلاق محاسن اتراجعت, ونزلت دموعة الوهمية وعملت فيها بتبكي, وقالت اريتو لو طلقة!
سامية: بسم الله! استهدو بالله, الله ينعل الشيطان.
ـ حمودي بهناك معزب فاطمة قال الا يشترو لي كورة من الدكان وفاطمة ما معاها قروش غير قروش البن والسكر.
ـ فاطمة وحمودي جو راجعين من الدكان ماشين في الشارع وحمودي زعلان عشان فاطمة ما اشترت لي الكورة..
فاطمة: حمود ما تجري بتقع امشي براحة.
ـ حمودي وقع وجاء البيت يبكي..
محاسن: مالك يا ولدي بتبكي?
حمودي: وقعدتني فاطمة!
ـ فاطمة اتخلعت من كلام حمودي ما وقعتو وقع براو..
فاطمة: والله يا عمتي انا ما وقعتو وقع براو كان جاري.
محاسن: خلاص اسكتي ما تتكلمي بعد وقعتي, وقعتك كيف يا حمود?
حمودي: دفرتني في الطوبة!
فاطمة: والله حمود ولدك دا كذاب.
ـمحاسن ادت فاطمة كـف!! !
يتبع..
