ـ سعيد جاء من الخلا سمع كلامهم كلــو!!
ـ سعيد اتخلع بكلامهم ما صدق بقى برجف لمن قعد في الواطة.
ـ سعيد مشى ليهم جوا وواقف في الباب وهم بضحكو, لمن شافو سعيد الاتنين بقو بتمتمو ما قادرين يقولو حاجة.
سعيد: حليمة جيبي لي كباية جبنة .
ـ حليمة جابت الجبنة وماداها لسعيد, سعيد عمل فيها برجف وكبا الجبنة في حليمة قال عشان كبت الجبنة في فاطمة بنتو!!
حليمة: ( صرخت! الجبنة حاره) ما بتشوف!
ـ سعيد رفع يدو وادى حليمة كــــف حار لمن وقعت في الواطة!
سعيد: دي الجبنة الكبيتيها في فاطمة بنتي شوفيها حارة ولا باردة, اتغشيت فيك, كلامهم صاح القالو المظاهر خداعة!
سعيد: وانتي يا محاسن القولتي ليها كبي الجبنة في فاطمة, عرفنا ديك غريبة لكن انتي لحمي ودمي تعملي كدا في بنتي اسي لو انا مــوته فاطمة دي انتي ما بتربيها? يا خسارة!
ـ حليمة ومحاسن بقو اتشاكلو في بعضهم , اي واحدة تقول للتانية انتي القولتي لي اعمل كدا ( قربو يتضاربو) حليمة قالت لمحاسن..
حليمة: اصبري بوريك!!
ـ سعيد قعد في السرير وابكي علي فاطمة بنتو قال..
سعيد: معقولة يا فاطمة بنتي احصل معاك دا كلو وانا ما جايب خبر وما تحكي لي, كنتي متحملاهم الاتنين وصابرة عليهم, يا عيب الشوم علي ايو اب انا!! , كل مره بتكبري في نظري اكتر!.
سعيد: حليمة انتي طلقانة ( 3 طلقات) لمي عفشك عشان تمشي!!!!
سعيد: محاسن انسي انو عندك اخو اسمو سعيد, فيك تمشي معاها!!!!
ـ سعيد سكري ارتفع جاتو رجفه محاسن جاتو سعيد رفع ليها يدو انو ما تقرب لي!
ـ في الجامعة..
ـ فاطمة شايلة هم رسومة قسطها الثاني قالت لازم تمشي يعملو ليها تخفيض.
ـ فاطمة مشت للمسجلة تسأل من التخفيض, المسجلة قالت ليها دقيقة اشوف السجل تبعك انو دافعة كم!
المسجلة: فاطمة سعيد حامد علي?
فاطمة: ايا دا اسمي.
المسجلة: رسومك الدراسية كلها مدفوعة!!
ـ فاطمة انهجمت انو الدفع ليها منو ..?
ـ بيت ناس فاطمة..
ـ حليمة لمت عفشة وسافرت.
ـ محاسن ما مشت بيتا.
سعيد: محاسن انا ما دايرة اشوف وشك!
ـ محاسن بكت ومشت ناس ريان.
ـ محاسن حكت القصة كلها لأم ريان ..
ام ريان: لا حول ولا قوة الا بالله كل العذاب دا فاطمة بنتي كانت عايشاهو وبتجي لريان طوالي ما حصل جابت سيرة المعاملة البتعاملة ليها حليمة ( ام ريان بكت) تسلم البطن الجابتك فاطمة بنتي, فعلآ بنتها لي سامية الله يرحمه.
ـ ام ريان مشت لسعيد في بيتو لقتو متأثر شديد اتكلمت معاهو كلام كتير عن فاطمة.
سعيد: اضربي لي لفاطمة بنتي.
ـ ام ريان اتصلت لريان قالت ليها اديني فاطمة.
فاطمة: الوووو!
سعيد: ( سعيد دمعتو نزلت وسكت اتكلم بعد مسافه)!
فاطمة: الوووو الوووو!, يابا انت كويس.
سعيد: ما كويس لمن انتي تدسي مني البحصل معاك, معناها انا ما مهم بالنسبة ليك, ما تكلميني بمعاملة محاسن وحليمة ليك.
فاطمة: ( بكت) لالا يابا ما تقول كدا انت ياكا ابوي البفتخر بي والبنسند علي انا من غيرك ولا حاجة, ايا ما بكذب اني ما كلمتك قولته عشان ما تكره اختك عمتي محاسن, وحليمة شايفاها ما مقصرة من حقك مهتمه بيك قولته ما اخرب بيناتكم بتونسك وبتقلك لمن انا اجي الجامعة.
سعيد:لكن تسكتي وتتعذبي علي حساب سعادتي انا, كل يوم بتكبري في نظري اكتر, عافي منك ورضيان عليك ( سعيد قفل التلفون وبقو ابكو الاتنين).
ريان: فاطمة يحصل معاك دا كلو وما تكلميني ( ريان زعلت من فاطمة).
فاطمة: ريان انا ما كلمتك لانو انتي ما بترضي فيني بتمشي تكلمي ابوي طوالي وابوي اخرب بيتو واكون انا السبب.
ـ ريان حضنت فاطمة وبكت معاها.
ـ جاء الصــباح..
فاطمة: يا الله اسي ابوي اكون عامل كيف بعد طلق حليمة وعرف عمتي محاسن علي حقيقته, الله يصبرك يا ابوي!
فاطمة: ريان امس مشيت للمسجلة لقيت رسومي كلها مدفوعة, اكون الدفعه لي منو??
ريان: انتي جادة, يا ربي اكون دا منو ? لكن الزول الدفع ليك دا اصيل بالجد ومافي زيو!!
ـ فاطمة وريان مشو الجامعة..
ـ فاطمة بعد المحاضرة الاولى عندهم قاب ساعتين قبل المحاضرة الاخيرة , قالت تمشي الكفتريا تشتغل عشان نهاية اليوم تمشي الداخلية ما تتأخر , سحر كانت شايفة فاطمة قالت يا ربي فاطمة دي مستعجلة كدا ماله? فاطمة دخلت مطبخ الكافتريا وسحر شافته.
ـ فاطمة جوا المطبخ رفعت رأسه لقت سحر واقفة ليها في باب المطبخ!!
ـ سحر جرت وفاطمة جارية وراها. ( فاطمة قالت ما تكلم لي ريان) سحر دخلت القاعة وكل الدفعة قاعدين في القاعة وفاطمة وصلت سحر جوا القاعة.
ـ سحر شالت المايك وقالت..!!
ـ فاطمة واقفة جنبها.
ـ استاذ عادل عندو محاضرة معاهم طالع ليهم لمن سمع صوت سحر بتتكلم ما دخل القاعة وقف برا جنب السلم وسمع كلامهم!
سحر: عايزين تعرفو فاطمة شغالة شنو?? شغالة في الكفتريا هنا جوا الجامعة بتنضف خضار وبتكنس وبتغسل عدة!
ـ فاطمة شالت المايك من سحر وبتتكلم هي قالت..!!
يتبع..
