سعيد: يا ناس كيف.
سامية: اهلن ابو فاطمة, مالك الليلة ماجيت فطرتة?
سعيد: فطرتة مع عوض الله صحبي عيالو جابو لي الفطور في الخلا.
سامية: ان شاءالله ينفعك.
سعيد: ام فاطمة اعملي لينا الجبنة.
سامية: بن مافي.
سعيد: قروش اجيب بيها بن ما عندي.
ـ سعيد سرح بعيد.. وقال معقولة قروش اشتري بيها القهوة ما عندي, ويقول الحمدلله يا رب تفرجة.
سعيد: دا فلس شنو يا الله!
سامية: ما تقول كدا يا ابو فاطمة, الحمدلله الله كريم.
ـ فاطمة كانت بتقرأ وسمعت كل كلام أمها وأبوها.
فاطمة: يابا كيف! مالك الليلة اتأخرتة?
سعيد: اهلن ست ابوها! الشغل في الحواشة كان كتير يا بنتي عشان كدا اتأخرتة.
فاطمة: يابا هاك دي 5 جنيه اشترو بيها البن.
سعيد: من وين يا بنتي لقيتي القروش دي?
فاطمة: الاستاذة قبيل في الحصة سألت سؤال, وقالت البحلو بدي هدية, وانا حليت السؤال عشان كدا ادتني ال 5 جنيه دي.
سعيد: الله يجعل فيك البركة يا بنتي, وان شاءالله تكبري وتشتغلي وتدينا.
سامية: عافية ورضيانة عليك يا بنتي, الله ينجحك.
ـ سامية عملت الجبنة وفاطمة وأبوها يتونسو ويضحكو وسامية تعاين ليهم وهم يضحكو وقالت يا رب ما تحرمهم من بعض.
سامية: بدور امشي اجيب لي حطب من الخلا البعمل بي بكرة ما عندنا, لكن متألمة لي بوجع رأس.
فاطمة: لالا يمة ما تمشي انا بمش اجيب الحطب.
سامية: لالا بنتي براك ما تمشي.
فاطمة: بقول لريان تمشي معاي نمشو سوا.
سامية: خلاص يا فطومة امشو لكن ما تتأخرو.
فاطمة: سمح يمة!
ـ سامية وصلت فاطمة لحدي الباب وتوصي فيها من..
سامية: اعملو حسابكم يا بناتي من العقارب والحية, وما تتأخرو.
فاطمة: متوكلين على الله الكاتبو الله لينا بجينا في اي محل حتى لو كنا معاك.
سامية: الله يكبرك يا بنتي بعقلك دا.
ـ سامية قعدت في السرير وتدعي لبنتها فاطمة انو الله يحفظة ويسترة وينجحة.
ـ الصداع زاد على سامية ما اداها راحة.
سعيد: ام فاطمة قولتي عندك وجع رأس نومي عشان يروح.
سامية: لالا ما بنوم دايرة اعمل الغداء لسه ما عملتو.
سعيد: الغداء هين بنعمل, خلي وجع الرأس يروح اول.
سامية: خلاص بنوم شوية واقوم اعمل الغداء.
سعيد: ايا ريحي نفسك دي شوية.
ـ سامية طولت في النوم وسعيد رجع الخلا وفاطمة إتأخرت ما جات.
فاطمة: خلاص يا ريان الحطب دا كفاية اكتر من كدا ما بنقدر نشيلو.
ريان: ايا كلامك صاح فاطمة, تعالي ختي لي الحطب في رأسي, فاطمة العقرب! اعملي حسابك ما تقرصك.
ـ فاطمة قتلت العقرب بطوبة.
فاطمة: لو ربنا كاتبة لي تقرصني بتقرصني!
ريان: صدقتي يا فاطمة كلامك صاح.
ـ فاطمة وريان ماشين في الشارع ويتونسو , ريان حبلة حق الحطب اتقطع, الحطب اتشتت! فاطمة نزلت حطبة في الواطة عشان تساعد ريان تربط ليها الحطب.
ـ فاطمة اثناء ما بتربط لريان في الحطب صرخت!!
ريان: فاطمة مالك?
فاطمة: قرصتني عقرب في كراعي!
ريان: لالا ما تقوليها , عقرب!
ـ ريان بكت على فاطمة, وفاطمة خلاص تعبت وعيونة بقو حمر وسم العقرب بدأ يأثر فيها.
فاطمة: قبيل قولته ليك لو ربنا كاتبة لي بتقرصني!
فاطمة: هاك يا ريان اقطعي لي حبل من طرحتي عشان اربط بيها كراعي قبل السم ما يمشي لجسمي كلو.
ريان: لشنو تقطعي من الطرحة اربطي بالطرحة كلها.
فاطمة: لالا ما بمشي رأسي كاشف.
ريان: انتي في اللحظة دي عيانة ما مشكلة .
فاطمة: لالا! حتى لو شنو داك ما بمشي رأسي كاشف!!
ريان: دائمآ عقلك كبير يا فاطمة, ربنا يحفظك!.
فاطمة: يلاكي نمشي ريان عشان ما نتأخر .
ريان: لكن بتقدري تمشي?
فاطمة: ايا بمشي!
ـ اثناء ماشين في الشارع فاطمة وقعت!
يتبع..
