ـ فاطمة صرخت بصوت عالي بتنادي بكلمة يـمــة.
ـ سامية ماتت وهي ساجدة سبحان الله! كانت بتصلي في ركعتين انو ربنا يشيل منها الصداع!
فاطمة: يمة يمة قومي شوفيني انا جيت من المدرسة, عايني لي يمة, جيت بدري يمة عشان افطر معاك, واحكي ليك الليلة حصل لي شنو في المدرسة اصحي يمة.
ـ ريان وهي في الحصة قالت يا ربي فاطمة دي طلعت مشت وين قالت لازم تطلع تشوفة, ريان طلعت من الفصل وبتتكلم مع الخالة الفي المدرسة..
ريان: يا خالتي شوفتي فاطمة مشت وين?
الخالة: ايا فاطمة دي بعد ما طلعت من الفصل جرت جري شديد علي بيتم ما عارفة الحاصل معاها شنو.
ريان: ايا خلاص بمشي بلحقا في بيتم, لو الاستاذة سألت مننا قولي ليهم فاطمة امها عيانة مشو يشوفوها.
الخالة كويس يا بنتي.
ـ ريان بتتكلم براها..
ريان: اعفي لي خالتي سامية كذبتة قولته انك عيانة ان شاء الله ما تمرضي نهائي ربنا يديك الصحة والعافية.
ـ ريان جارية في الشارع ماشة علي بيت ناس فاطمة..
ـ ريان بتنادي من باب ناس فاطمة قبل ما تخش البيت جوا..
ريان: خالتي سامية وينك انا جيت, مشتاقة ليك والله, يا فاطمة يا فاطمة.
ـ ريان سمعت فاطمة بتبكي وبتتكلم..
فاطمة: عليك الله يمة قومي ما تخليني براي يمة, قومي يمة.
فاطمة: يماااااااااا
ريان: انتي يا فاطمة جنيتي بتتكلمي مع امك وهي بتصلي.
ـ ريان لمن قربت علي سامية ورفعت ليها رأسة وسامية وقعت ليها في كتفة عرفتة انها ماتت!! وصرخت صرحة حارة جابت الحلة كلها.
ريان: لااااااااااااااااااااااا
فاطمة: ما تصرخي يا ريان امي كويسة نايمة بس ما عندها حاجة, امي استحالة تخليني عشان كدا خليها نايمة ما نزعجة
فاطمة: تعالي يا ريان نشيل امي نخته في السرير عشان نخليها ترتاح ما نصحيها.
ـ ريان بقت تكفت في فاطمة وتقول ليها..
ريان: امك ماتت يا فاطمة ما نايمة.
فاطمة: لالا ريان امي ما ماتت نايمة بس قالت عندها صداع بس اسي بنوديها الدكتور وبروح منها , مش يمة, قومي يمة شوفي ريان جات تفطر معاي قالت اكلك سمح عشان تدينا الفطور قبل الجرس ما يضرب, قومي يمة!
ـ فاطمة تتكلم ودمعتة جارية ..
فاطمة:عليك الله يمة قومي ما دايرة تشوفيني لمن انجح واخش الجامعة واتخرج, ايا يمة ولمن اجي زمن الامتحانات كنتي بتصحيني مع صلاة الصبح وتقولي لي فاطمة بنتي قومي صلي واقري , ولمن اجي ماشة المدرسة بتوصليني لحدي الباب, ولمن اكون عيانة تساهري معاي للصباح , ولمن انجح كنتي بتفرحي لي قبل ما افرح انا , تاني البعمل لي الحاجات دي منو يمة!! والبنصحني والبوصيني منو تاني يمة, قومي يومه!
ـ فاطمة من الصدمة ما مصدقة انو امها خلاص ماتت, فاطمة حاضنة امها وبتتكلم وبتبكي..
ـ سعيد جاء من الخلا شاف الناس جنب بيتو كتيرة وجاء جاري لمن بترجف.
سعيد: في شنو يا جماعة??
فاطمة: يابا يابا تعال شوف امي الليلة ما دايرة تتكلم معاي, يمة قومي دا ابوي جاء ادي الفطور واعملي لي الجبنة.
ـ سعيد لمن قرب علي سامية ولقاها ميتة , وقع في الواطة وجسمو كلو برجف ودموعو نزلت..
سعيد: لا حول ولا قوة الا بالله , انا لله وانا اليه راجعون, يا ربي يا سيدي تلزمني الصبر , لا اله الا الله.
سعيد: لكن انا خليتة كويسة ومشيت الخلا.
ـ سعيد بقى بكرر في الجملة دي بس ( لكن انا خليتة كويسة ومشيت الخلا).
ـ وكل الحلة تبكي علي سامية من كبير ل صغير.
ام ريان: كـر عليك يا سامية اختي, جاهلة وصغيرة الما شوفتي للدنيا حاجة, لكن ما غالية علي ربك , الله يلزم فاطمة الصبر ما بتقدر تتحمل الصدمة. متعلقة شديد بامها, يا حليلك ياسامية ربنا يرحمك, يا حليلك يا ام ريان التانية.
ـ ام ريان ماسكة فاطمة وبتبكي معاها..
ـ فاطمة خلاص بقت ما قادرة تستحمل فراق امها , بتصرخ باعلي صوت وبتبكي بكلمة يـمـــــــة, الناس بقت بتعاين لفاطمة وببكو زيادة.
فاطمة: يمـــااااااااا, يا حليل كلمة يمة تاني, يا حليلك يمة الخليتينا انا وابوي برانا.
ـ ريان بقت تسكت في فاطمة ..
ريان: خلاص يا فاطمة تاني خالتي ما بتجي , وسامية ما امك براك امي انا برضو وما بقدر انساها وما بتتنسي لانها ما خلت لينا الا الذكريات السمحة, عشان كدا ادعي ليها بس تاني, وانا هندي جنبك ما بفارقك مهما حصل, زي اختك وامي ياها امــك.
فاطمة: امــي ما ماتت يا ريان , انا الصباح دا اتونسته معاها قبل ساعة بس !! وقالت لي عافية ورضيانة عليك,خليتة كويسة , وبعدين يا ريان امي دي لسه ما شبعته منها ياداب انا في بداية عمري ما شافت لي حاجة , امــي مافي زول بسد مكانة يا ريان وانا ياداب محتاجة ليها , محتاجة احكي ليه البحصل لي كلو وتغلطني في الغلط وتصححني في الكلام الصاح, وانا اقول ليها سمح يـمـــة! !
ـ محاسن عمتهم جات للبكاء..
يتبع..
