ـ فاطمة قالت لريان..
فاطمة: ايا صاح كلامة لخالتي حليمة من جيت من المدرسة كنت بقرأ وتاني قولته افرق شوية ياهو قولته ليها ماشة الخلا اجيب لي حطب.
ريان: والله علي كيفك تالتة دي صعبة ما زي اي فصل عشان كدا دايرة تركيز من الاول.
فاطمة: لالا ريان ما تخافي قريت اطمئني.
ـ فاطمة وريان جو البيت, ريان مشت بيتهم.
ـ فاطمة بعد ما جابت الحطب قالت حاسة نفسها تعبانة قالت تاخد ليها نومة شوية.
حليمة: قومي يا فاطمة عوسي الكسرة قبل ابوك ما يجي عشان لمن يجي يلقى الاكل جاهز, انا والله لسه الصداع ما راح مني كان عوسته براي.
فاطمة: سمح خالتي.
ـ فاطمة بي تعبة داك قامت تعوس قالت عشان ابوها عندو السكري ما بتحمل الجوع, قالت تعوس قبل ما يجي ابوها من الخلا.
ـ فاطمة انتهت من العواسة وسعيد جاء من الخلا..
سعيد: فاطمة بنتي الحقيني بالاكل جعان شديد.
فاطمة: هاك اشرب الموية اول يابا قبل الاكل.
سعيد: فاطمة بنتي مالو شكلك تعبان كدا?
ـ ردت حليمة بسرعة قبل فاطمة ما ترد.
حليمة: من القراية الكتيرة عشان الليلة قرأت كتير من جات من المدرسة تقرأ.
ـ فاطمة استغربت في رد حليمة.
فاطمة: ايا يابا صاح.
حليمة: والله بوجع راسي دا قومته عملته الغداء وعوسته قولته عشان لمن تجي تلقى الاكل جاهز.
ـ فاطمة سرحت بعيد في كلام حليمة .
سعيد: فاطمة بنتي وين سرحتي?
فاطمة: لالا مافي حاجة.
حليمة: فاطمة جيبي الغداء عشان انا العواسة زادت لي وجع الرأس زيادة.
ـ فاطمة مشت تجيب الغداء وبكت قالت ليه مراة ابوها بتعمل معاها كدا!!
ـ فاطمة بعد ما اكلت نامت من غير ما تشعر ونست تقرأ وهي بكرة ممتحنة.
ـ حليمة لمن شافت فاطمة نايمة ما صحته عشان ما تقرأ, حليمة مشت نامت.
ـ فاطمة صحت مخلوعة الساعة 2 صباحآ اتذكرت انها ما قرأت وهي ممتحنة باقي ليها ساعات بس.
ـ فاطمة ولعت اللمبة وقرأت للصباح تمت المادة كلها بالقراية وراجعته, تاني ما نامت والصبح اذن وصلت وبقت تدعي لنفسها بالنجاح ودعت كمان لأمها وابوها.
ـ حليمة نهائي ما صحت شالته نومه .
ـ فاطمة بعد صلت الصبح قالت تعمل الشاي قبل ابوها ما يجي من الجامع قالت عشان ابوها يلقى الشاي جاهز .
ـ سعيد جاء من الجامع شرب الشاي ومشى الخلا, وفاطمة لبست عشان تمشي المدرسة.
ـ حليمة لمن لقت فاطمة جاهزة لابسة لبس المدرسة قالت ليها..
حليمة: فاطمة قبل ما تمشي المدرسة غسلي معاك العدة دي عشان بعدين ما تكون ليك كتيرة!!
يتبع..
