ـ فاطمة لقت ملابسه في الواطة!!
فاطمة: ( جرت علي ملابسه وبتلم فيهم) المشر دا القطعو شنو?
حليمة: جاء هواء وتراب كتير لمن قطع المشر.
ـ فاطمة قالت مافي هواء جاء, عرفت انها قاصدة تقطع ليها المشر, فاطمة سكتت ما سألته.
حليمة: قولته اقوم ارفعهم ليك كراعي فجأة انكمشت ما قدرته اقوم من السرير.
فاطمة: ما مشكلة تاني بقوم بغسلهم.
ـ فاطمة تاني غسلت ملابسه والدنيا برد لمن تعبت.
ـ سعيد جاء البيت..
سعيد: فاطمة بنتي مالك بتغسلي بالليل في البرد دا? كان تغسلي بالنهار?
حليمة: بري مرقت من انت طلعته مشت وين الله يعلم حتى ما كلمتني, دي جيتا!!
سعيد: فاطمة بنتي تاني لمن تجي ماشة محل كلمي ناس البيت ما معروف البحصل شنو.
فاطمة: سمح يابا نسيت ما كلمتها.
ـ فاطمة ما قالت لابوها انو كلمت حليمة لمن طلعت عشان ابوها ما يعرف انو حليمة بتكذب.
ـ فاطمة غسلت ملابسه ورتبتهم في الشنطة, فاطمة نهائي ما نامت كوت ملابس ابوها كلهم ورتبتهم ليهو.
ـ جاء الصباح..
ـ فاطمة لبست عبايته وطلعت شنطته.
ـ فاطمة جرت حضنت ابوها وبتبكي ( بتودع فيهو) .
سعيد: عافي منك ورضيان عليك يا بنتي ( سعيد ببكي وبتكلم مع فاطمة ) خلي بالك علي نفسك ركزي في قرايتك ما تشيلي همي انا.
فاطمة: وانت كمان يابا خلي بالك علي نفسك وحافظ علي السكري يابا.
سعيد: هاك القروش دي خليها معاك.
سعيد: ودعتك الله ( سعيد قعد في السرير وببكي اول مره فاطمة بنتو تفارقو) .
حليمة: يلا مع السلامة ( سلام بارد)
ـ فاطمة طلعت من بيتهم وحليمة ولا حاجة ما ادتا ليها للداخلية.
ـ فاطمة طالعة من بيتهم وبتعاين لابوها وبتبكي.
ـ فاطمة مشت بيت ناس ريان..
ام ريان: هاك يا فاطمة بنتي دي الحاجات الجهزتها ليك , زيت لشعرك , صابون, سكر, كيس عصير ولبن بدرة, انتي كيسك براك وريان كيسه براها ما ختيتهم ليكن في كيس واحد عارفة بنتي ريان بتاكلن في يوم واحد.
ريان: الفضايح لشنو يمة, هههههه!
فاطمة: شكرآ خالتي لشنو التعب دا!
ام ريان: مافي تعب ولا حاجة انتي في غلاوة بنتي ريان.
ريان: يلا فاطمة الزمن اتأخر.
ام ريان: تصلن بالسلامة يا بناتي انطبقن سوا ما تتفرقن.
ـ ابو ريان جاء ادى ريان وفاطمة قروش.
ًـ فاطمة وريان وصلو الخرطوم ونزلو عند ناس قرايب ريان وسجلو في الداخليةومشو قعدو في الداخلية.
ـ فاطمة وريان راكبين في الحافلة ماشين الجامعة جات بنت لابسه اسكيرت قصير شديد وفيهو خطوة ريان قالت لفاطمة..
ريان: فاطمة اختي عايني البنت دي ماشة عريانة كرعيهم كلهم برا وشعره نصو برا.
فاطمة: اي والله شكلها ما عارفه عذابها بعدين كيف, ربنا يهديها ويهدينا, يا رب تسترنا!!
ريان: برييا النخجل ليها انا, وابوها وامها وين ما شايفنها لابسه كدا لمن طلعت.
ـ فاطمة وريان دخلو الجامعة..
فاطمة: ( من دخلت من باب الجامعة قالت.. ) يا رب تجعل حظي فيها سمح, ونتخرج منها مبسوطين.
ريان: اللهم امييين!
ـ فاطمة وريان لمن دخلو الجامعة البنات كلهم بتعاين ليهم عشان لبسهم ( فاطمة لابسه عباية وقديمة) طبعآ البنات لابسات لبس اخر موضة ( الضيق والواسع) واخر تلفونات اكيد ما كلهم , فاطمة تلفون ما عندها.
ريان: فاطمة البنات ديل مالهم بعاينو لينا كدا?
فاطمة: ما تشتغلي بيهم اتجاهليهم لو قولتي تشتغلي بكلامهم ما بتقدري تقري.
ريان: ايا والله كلامك صاح ما عندهم موضوع.
ـ ريان مشت تسأل ليها بنات..
ريان: قاعة ادارة اعمال وين??
ـ البنات قعدو يضحكو عليها, قالو ليها مافي حاجة اسمها قاعة ثابتة كل محاضرة في قاعة جديدة , في بنت اسمها الاء ردت ليهم..
الاء: مافي حاجة بتضحك مجرد سؤال سألتكم توضحو ليها كلكم برالم هنا وفيكم البكون سأل نفس سؤاله دا لمن جيتو الجامعة اول يوم!!
يتبع..
