ـ مدرسة فاطمة عملت احتفال لتهني طلابها بالنجاح وكرمو فاطمة أولى المركز وادوها هدية (مصحف, وشنطة مدرسة, وكراسات ولبسة الثانوي وكل ملزمات المدرسة).
ـ ومدير مدرسة الثانوي قرر انو فاطمة تدرس معاهم مجان من غير رسوم.
ـ مرت أسابيع..
فاطمة: يمة أمبارح حلمته حلم غريب.
سامية: حلم شنو يا بنتي?
فاطمة: حلمته يمة انك لابسة ليك توب ابيض ومشيتي بعيد وخليتيني انا براي وانادي فيك يمة يمة!
سامية: هههه حلمة سمحة يا بنتي معناها بمشي الحج لبيت الله!
فاطمة: ان شاءالله يمة تحجي انتي وابوي, إكون حلمي اتحقق لو حجيتو انتي ويابا.
سامية: ان شاء الله يا بنتي!
سعيد: يا سامية يا فاطمة! تعالو شوفو جبتا ليكم معاي منو!
سامية: هيي يا محاسن!
فاطمة: عمتي محاسن!
ـ محاسن اخت سعيد , ساكنة في قرية جنبهم, جابت معاها ولده محمد صغير.
ـ محاسن عمتهم دي مراة صعبة وكعبة وبتتدخل في اي حاجة.
ـ سامية وفاطمة سلمو على محاسن وبقو يسألو فيها..
سامية: كيفنك يا محاسن وكيفو ابو عيالك, والاهل كلهم لعلهم بخير?
محاسن: تمامين نحمدالله ما عندهم عوجة تب.
محاسن: كيفك يا فاطمة مبروك النجاح, كلمني ابوكي في الشارع.
فاطمة: الله يبارك فيك عمتي, وانتي اخبارك شنو.
محاسن: كويسة الحمد لي الله!
فاطمة: تعال يا حمود النسلم ليك.
سامية: ماشاءالله تبارك الله حمود ولدك كبر!
محاسن: ايا كبر, غير قوة الرأس وقلة الادب ما عندو حاجة, ما بسمع لكلامي.
فاطمة: هههه صحي يا حمود?
سامية: هههه دا كلو جهل باكر بكبر بخلي دا كلو , مش يا ولدي حمود?
حمودي: ما بخلي!!
سامية: لالا كدا عيب !
محاسن: سعيد اخوي مالك بقيت ضعيف كدا ما بتأكل ولا شنو?
سعيد: هههه شغل الخلا بس.
ـ فاطمة عاينت لامها مستغربة في كلام عمته.
سامية: قومي يا محاسن غيري هدومك قبل ما اجيب ليكم العصير.
سعيد: النقوم انا امشي الدكان اجيب ليكم البن.
محاسن: لشنو تمشي انت الدكان? فاطمة ياها قاعدة تمش هي!
فاطمة: ايا يابا اديني القروش انا بمشي.
حمودي: انا ماشي معاكي.
سعيد: هاكي يا فاطمة بنتي القروش ما تتأخرو.
فاطمة: سمح يابا!
محاسن: الشنطة الجديدة ولبس الثانوي ديل هيلات منو??
سامية: ايا ما كلمتك , فاطمة بنتي جات أولى المركز وناس المدرسة عملو احتفال وكرمو فاطمة بنتي وادوها الحاجات دي هدية تقرأ بيهم الثانوي.
سعيد:ايا ديل عشان تقرأ بيهم الثانوي.
محاسن: من متين عندنا بنت بتقرأ, قال قراية قال , بنت شنو البتقرأ .
محاسن: فاطمة مافي ليها قراية.
يتبع..
