ـ سامية جات لناس سعيد ومحاسن وشايلة فناجين الجبنة وسمعت كلام محاسن لمن قالت لسعيد لازم تعرس, سامية من الخلعة وقعت الفناجين في الواطة.
سعيد: سامية مالك? ما يكون الفناجين عوقنك?
ـ محاسن مبسوطة ومتكيفة انو سامية سمعت كلامه حق العرس لسعيد.
محاسن: اجي يا سامية مالك بتوقعي في العدة? عيانة ولا سمعتي كلامي القولتو لسعيد.
سعيد: كلام شنو?
محاسن: قصدي كلامي لمن قولته ليك تعرس مراة تانية.
سعيد: عرس شنو, الله يدينا العافية بي باقي عمرنا دا.
ـ سامية اتخنقت غلبة الكلام ودمعتة خلاص بقت قريبة.
سامية: ايا سعيد محاسن اختك كلامه صاح.
سعيد: ياتو كلام الصاح?
سامية: انك تعرس ليك مراة تانية!
سعيد: انتي جنيتي ولا شنو!
سامية: ماني جنيت شديدة, لكن لمن تعرس ليك مراة تانية بتجيب ليك اولاد يخاو فاطمة وينفعوك.
محاسن: ايا سعيد انا مش قولته ليك سامية بترضى ما بتابا!!
محاسن: البنت ما بتنفعك بجيها ولد حلال بعرسة ويسوقة منك بنفعك الولد.
سعيد: خلاص اسكتو ما داير كلام في الموضوع دا, شكلكم جنيتو عرس شنو, البركة في بنتي فاطمة ربنا يخليها لي باكر بتكبر وبتنفعني بتبقى لي بنت و ولد وسندي وعكازي البنتكل علي, الله يخليها لي.
سامية: ربنا يديك العافية ويطول ليك في عمرك.
محاسن: خلاص يا اخوي ماني جابراك علي حاجة.
ـ محاسن دايرة تتفقع من رد سعيد ليها لمن رفض يتزوج تاني, وقالت اصلآ ما بخلي من موضوع العرس دا.
سعيد: ام فاطمة جيبي الجبنة دي, عشان بدور امشي للخلا.
سامية: سمح! النمشي اجيب السكر.
ـ سامية مشت تجيب السكر من المطبخ واتذكرت كلام محاسن وما قدرت تحبس دموعة لمن جاها صداع اخدت بكيتة وجابت السكر للجبنة.
ـ سعيد شرب الجبنة ومشى الخلا.
حمودي: يمة محاسن اديني جبنة.
محاسن: ايا صاح الليلة انت ما شربته الجبنة, زاتا يا ولدي جبنة ما سمحة, لكن شربتها ساي من وجع الرأس اعمل شنو.
ـ ريان جات تسأل من فاطمة..
ريان: سلام! انا جيت.
سامية: اهلن بنتي ريان, سلمي يا ريان بنتي على محاسن دي اخت سعيد.
ـ ريان سلمت علي محاسن وقعدت في السرير.
ـ حمودي بعد ما شرب الجبنة جدع الكباية في الواطة وانكسرت.
ريان: هي يا ولد يا قليل ادب لشنو تجدع الكباية في الواطة?
ـ محاسن اتنفخت من كلام ريان حمرت ليها عيونة وعاينت ليها بنظرة حارة.
محاسن: عرفتي من وين شان تقولي لي قليل ادب?
ـ ريان خافت منها ما ردت ليها سكتت.
ريان: خالتي سامية فاطمة وينا?
سامية: فاطمة بغادي في الشجرة.
ـ ريان مشت لفاطمة في الشجرة..
ريان: فاطمة كيفك, وعمتك الفقر دي جاتكم متين? كنت بتكلم مع ولدة الساعة الحمرت لي دايرة تأكلني خوفته منها .
فاطمة: ايا دي عمتي محاسن جاتنا هي و ولدة حمود , لا بالعكس طيبة قلبها ابيض بتشوفيها كدا ساي بتقولي كعبة.
ـ فاطمة قالت لريان انو عمته طيبة عشان ما دايرة ريان تعرف انو عمته دي كعبة وصعبة.
ريان: قلبك انتي الابيض يا فاطمة! ما علينا دا ما الجيتك عشانو.
فاطمة: اها جيتيني عشان شنو ?
ريان: جيت افرحك يا فاطمة انو المدرسة بكرة !
فاطمة: عليك الله بكرة!! ياه فرحتيني والله!
يتبع..
