فاطمة: يا ربي البنات ديل ملمومات في البورد مالن!!
ـ ريان والاء لمن شافو فاطمة جو جارين ليها, فاطمة اتخلعت في شنو مالكم?
ريان: فاطمة النتيجة طلعت!!
ـ ان شاء الله تكون نتيجتي مشرفة!!
الاء: اكيد مشرفة , ماشاء الله عليك موادك كلها امتياز ( +A ) مافي زول نتيجتو زيك يا بروف.
ـ فاطمة ما مصدقة جرت بلهفه علي البورد تتأكد.
ـ فاطمة لمن وصلت البورد خاته اصبعها قصاد اسمها ويدها بترجف وبتبكي لمن قعدت في الواطة , ريان بقت بتبكي معاها.
الاء: ( مبسوطة وبتنادي بأعلى صوت وبتوصف على فاطمة ) يا بنات يا اولاد اولى ادارة دي البروف حقكم.
ـ كل الدفعة متشوقين يشوفو بروف الدفعة .
سحر: ( قالت لمن شافت فاطمة ) بلاي دي انتي ( بترفع في حواجبه ).
ـ ريان والاء نتيجتهم كل موادهم امتياز الا مادتين جيد جدآ.
ـ فاطمة مشت صلت ليها ركعتين وجابت ليها حلاوة توزعها من قروشة الاشتغلته!!
ـ الاء قالت لفاطمة وريان..
الاء: انا عازماكم علي حسابي بمناسبة نجاحنا.
فاطمة: لالا برا الجامعة ما بنقدر نمشي واسي الزمن اتأخر خليها لبكرة في الجامعة تفطرينا.
الاء: اوكي ما عندي مانع.
ـ فاطمة وريان مشو الداخلية واتصلو لناس البلد كلموهم بالنتيجة .
ـ في الجامعة..
ـ سحر تتكلم ليها مع بنات..
سحر: طبعآ ما وريتكم بالاستاذ الجديد, استاذ الادارة إسمو " عادل يوسف " استاذ سمح سماحة وصغير تقولي اتخرج ياداب , بعد تشوفو بتقتنعو براكم.
ـ فاطمة سمعت كلام سحر قالت..
فاطمة: سبحان الله شنو يعني سمح او شين دا ما الجينا عشانو في النهاية استاذ يوصل لينا رسالة الهدف منو.
ـ محاضرة الادارة بدأت..
استاذ عادل: السلام عليكم, اولى ادارة صاح?
كل الدفعة: صاااح!
استاذ عادل: اعرفكم عن نفسي , عادل يوسف خريج جامعة الخرطوم " ادارة اعمال " اتخرجت لي سنتين حضرت الماستر في لندن , وحاليآ شغال في الدكتوراة عقبالكم!! قوود لك!
ـ استاذ عادل درس محاضرتو وطلع.
ـ كل الدفعة بتمدح فيهو , في النوع البقول يا الله استاذ مبالغة شراح ماشاءالله وضغير!!
ـ محاسن تتكلم براها في بيتا..
محاسن: والله موسى دا طول والمشكلة بعد دا كلو يجيني فاضي من الدهب , بعد دهبي كلو البعتو لي عشان يشتري الجهاز هيل الدهب دا, طول شديد وعرس حليمة بنت خالتو ما حضرو!.
ـ في الجامعة..
ـ محاضرة ادارة دي كانت اخر محاضرة اليوم , فاطمة مشت الكافتريا ( من غير ريان ما تحس عليها ) عشان تشتغل سريع وتطلع.
ـ ريان بقت تفتش لفاطمة وما لاقياها..
ريان: الاء ما شفتي فاطمة مشت وين ماني لاقياها?
الاء: بتكون برضو بتفتش فيك كدا امشي الداخلية هنا ما ح تلقيها في الزحمة دي ح تتلاقو هناك في الداخلية.
ريان: انتؤكل امشي الداخلية لكن انا متأكدة ما بتمشي وتخليني.
ـ فاطمة شغالة نضفت معاهم الخضار وكنست وكان الشغل كتير نست الزمن وهي ما عندها ساعة او تلفون عشان تعرف الزمن والوقت اتأخر.
ـ فاطمة لمن طلعت من الكافتريا لقت الجامعة فاضية كل الناس مشت , فاطمة بقت خايفة وطلعت واقفة في الظلط عشان تمشي الداخلية ومواصلات مافي واقفة براها في الظلط ما معاها زول وزمن المغرب قررب , فاطمة بقت مغمدة وبتدعي..
فاطمة: يا رب تسهل!
ـ جات عربية صغيرة وقفت لفاطمة ( توسانة ) !!
يتبع..
