حليمة: فاطمة قبل ما تمشي المدرسة غسلي معاك العدة دي عشان بعدين ما تكون ليك كتيرة!!
ـ فاطمة قالت لو غسلت العدة الزمن بفوت ليها وبتلقى الناس دخلو الامتحان.
فاطمة: خليها لبعدين بعد اجي راجعة من المدرسة لانو اسي الزمن اتأخر.
حليمة: لالا الزمن لسه بدري غسليها وامشي بسيطة ما كتيرة.
فاطمة: سمح بغسله.
ـ فاطمة قعدت تغسل في العدة وقلبها مع الامتحان, وحليمة تشيل وتزيد ليها في العدة, فاطمة بعد ما انتهت من العدة مشت المدرسة, لقتهم دخلو الامتحان وبقت خايفة وبتبكي, في استاذ برا الفصل قال لفاطمة..
الاستاذ: ليه يا فاطمة اتأخرتي كدا, دخلو الامتحان ليهم ساعة, انتي ما عارفة انو عندك امتحان? الحاصل ليك شنو بقيتي ما زي زمان كنتي بتجي بدري وبتراجعي في المدرسة.
ـ فاطمة مدنقرة في الواطة والاستاذ بتكلم معاها ودموعها نازلة, لمن الاستاذ قال ليها بقيتي ما زي زمان اتأثرت وبكت زيادة.
فاطمة: لالا يا استاذ كنت بفتش لكتابي ما لقيتو قولته اراجع منو في الشارع والمدرسة.
ـ فاطمة كتابها ما ضايع اخرته العدة.
ـ ريان قاعدة برا الفصل ما دخلت الامتحان قالت الا تجي فاطمة اطمئن عليها واعرفه ماله اتأخرت ونخش مع بعض!!
ـ ريان لمن شافت فاطمة جات جارية ليها بلهفة وبقت ماسكاها بيديها من اكتافه وبتسأل فيها..
ريان: فاطمة مالك اتأخرتي كدا طمنيني عليك انتي كويسة ابوك كويس, الناس دخلت الامتحان ليهم ساعة!!
ـ فاطمة قالت لريان نفس الكلام القالتو للاستاذ.
ـ الاستاذ جاء لريان وفاطمة وقال ليهم خشو الامتحان, وحذرهم قال ليهم دي اخر مره تاني ما تعيدوها.
ـ فاطمة وريان انبسطو من الاستاذ ودخلو الامتحان وامتحنو وطلعو مبسوطين من الامتحان الو جاهم ساهل.
فاطمة: الحمدلله رب العالمين الامتحان جاء ساهل واشتغلته سمح.
ريان: يلا يا فاطمة نمشي البيت.
ـ فاطمة قالت هناك في البيت حليمة ما بتخليها تقرأ قالت تقعد في المدرسة كم ساعة تقرأ وتمشي.
فاطمة: لالا ريان ما نمشي البيت اقعدي نقرأ هنا ونمشي البيت, لانو لو غلبتنا حاجة نمشي للأستاذ في المكتب نسألو.
ريان: ايا والله كلامك صاح.
ـ فاطمة وريان راجعو في المدرسة ومشو البيت.
حليمة: مالك الليلة اتأخرتي كدا امس جيتي بدري قبل الفطور.
فاطمة: الاستاذ قال لينا ما تمشو قال عندو حصة معانا!
ـ يا رب تغفر لي علي الكذبة دي اعمل شنو مافي حل .
ـ حليمة تتكلم براها حصة قولتي لي يعني قريتي في المدرسة ماشي اصبري بس.
حليمة: امشي جيبي لينا موية من البحر.
فاطمة: سمح بعد افطر بمشي.
حليمة: الفطور لسه ما جاهز امشي وتعالي افطري.
ـ الفطور جاهز حليمة دايراها تمشي جعانة.
ـ فاطمة مشت جعانة تجيب الموية من البحر لمن ماسكة بطونه من الجوع.
ـ فاطمة جابت الموية وجات البيت..
فاطمة: كراسي وكتابي ديل الشرطهم لي شنو كدا? كنت خاتاهم في الشباك!!
حليمة: دا ولد جيرانكم ديل جاء مع امو , ونحنا كنا في الراكوبة دخل المطبخ كيف ما عارفين, غفلنا وما جيبنا لي خبر.
ـ حليمة هي الشرطت لفاطمة كتبه!!
فاطمة: مشكلة ديل ممتحنة بيهم بكره, اقرأ في شنو !!
ـ فاطمة قعدت تبكي!
ـ فاطمة مشت لريان تقرأ معاها , قالت تقول ليها نسيت كتابي وكراسي ما جبتهم معاي عشان ريان ما تسألة.
ـ حليمة خاتة كلام محاسن في بالة كل ما فاطمة تجي تقرأ حليمة تجيب ليها شغل من مافي.
ـ فاطمة بقت بتقرأ في المدرسة وتاني بتقرأ الساعة 2 صباحآ بعد حليمة تنوم , فاطمة بقت ما بتنوم كتير نومها مقطع لمن التعب والارهاق ظاهر في جسمة.
ـ مــــرت شهـــور..
ـ فاطمة وريان امتحنو الشهادة السودانية .
فاطمة امتحنت الشهادة بمعاناة وتعب مع حليمة , كانت ما بتخليها تقرأ .
ـ والاجازة مره فيها كم شهر.
ـ ريان جات لفاطمة..
ريان: فاطمة وينك اجري جاي تعالي سرييييع النتيجة قالو طلعت!!
يتبع..
