ـ فاطمة جات بيتهم ..
سعيد: فاطمة بنتي اها بشريني نجحتي جبتي كم?
ـ فاطمة جرت حضنت ابوها وبتبكي.
فاطمة: نجحتا يابا جبته 92,8%.
سعيد: مبرووووك يا بنتي من الفرحة ما لاقي لي كلام اقولو ليك.
ـ سعيد بقى حاضن عليهو فاطمة وببكي لمن بقى بترجف.
ـ السكري طبعآ لا داير فرح شديد لا حزن.
ـ حليمة لمن شافت سعيد جات سلمت علي فاطمة وبتبكي معاها بدموع الكذب, حليمة قالت لفاطمة..
حليمة: الفضل كلو برجع لي انا كنت بصحيك تقري صلاة الصبح ولمن كنتي بتجي من المدرسة كنت بقول ليك لالا ما تشتغلي انا بشتغل انتي اقري بس عشان تجيبي لينا نسبة كبيرة.
ـ فاطمة احتارت في كلام حليمة!
ـ سعيد عشان ما عارف حليمة علي حقيقتة.
سعيد: ايا والله ما قصرتي.
فاطمة: ما قصرتي كل العملتي لي مذكراهو, في ميزان حسناتك!!
ـ حليمة استغربت في رد فاطمة قالت يا ربي تكون قاصدة شنو!!
سعيد: انا ماشي الدكان اجيب حلاوة.
فاطمة: سمح يابا الله اديك العافية وربنا ما يحرمني منك.
ـ فاطمة قالت تقوم تصلي ليها ركعتين تحمد فيهم ربنا علي نجاحه.
حليمة: فاطمة بعد ما تصلي غسلي معاكي العدة دي, عشان انا دايرة اعمل الغداء.
فاطمة: سمح خالتي!
ـ حليمة زعلانة علي نجاح فاطمة قالت بعد الشغل الشغلتو ليها وما بتخليها تقرأ نهائي قالت كيف تنجح وتجيب نسبة كبيرة!!
ـ فاطمة قعدت تغسل في العدة والناس بتجي تبارك بتلقى فاطمة بتغسل في العدة, وحليمة مبسوطة عشان خلت فاطمة تغسل العدة وما تلقى طريقة تضيف الناس البتجي تبارك ليها.
ـ وفاطمة قالت للناس البتجي تبارك ليها..
فاطمة: اقعدو بعد تشيلو الحلاوة, ابوي مشى الدكان يجيبا.
ـ سعيد قال لسيد الدكان ..
سعيد: اديني حلاوة وبلح سجلهم لي في الدفتر مع الحساب القديم, بعد ما ربنا يسهل.
سيد الدكان: الحلاوة لنجاح بنتك فاطمة?
سعيد: ايا والله جات اولى المركز!
سيد الدكان: علي بالطلاق ما بتدفع ولا قرش للحلاوة, والبلح والبارد ديل هدية مني للنجاح وتفوق فاطمة بنتك, ان شاء الله فاطمة بنتي تجي زي بنتك دي ربنا يحفظة ليك!
سعيد: شكرآ ليك وبارك الله فيك, ربنا يزيدك ان شاءالله وتفرح جناك, وربنا يقدرنا علي جمايلك دي.
ـ سعيد جاء البيت..
سعيد: فاطمة بنتي هاك الحاجات دي هداها ليك سيد الدكان ابو فاطمة دخليهم جوا.
فاطمة: شكرآ ليهو ما قصر والله ربنا يدي الصحة والعافية.
حليمة: جيبيهم يا فاطمة انا بدخلهم الحاجات دي جوا.
ـ سعيد مشى الخلا والناس بتجي تبارك لفاطمة وبترجع من غير ما يشيلو حلاوة , حليمة دست كل الحلاوة والحاجات ما ادت زول نهائي , وفاطمة متأثرة وبتبكي من عمايل حليمة.
ـ محاسن جات..
محاسن: سلام ناس البيت كيفنكم.
ـ حليمة قامت تسلم علي محاسن.
حليمة: اهلن محاسن كيفك ان شاء الله كويسة.
فاطمة: اهلن عمتي كيف عاملة.
محاسن: تمام الحمدلله سمعته بنجاحك هناك في حلتنا مبروك.
فاطمة: الله يبارك فيك .
ـ محاسن نادت حليمة جوا قالت ليها..
محاسن: فاطمة نجحت وبتفوق كمان انتي ما عملتي الانا قولتو ليك?
حليمة: نهائي ما خليتة تقرأ ولا حرف ما عارفة نجحت كيف , انا برضو استغربته بنجاحة دا!!
محاسن: انا عندي ليها حاجة بتمنعة القراية مره واحدة!!
ـ سعيد جاء من الخلا..
سعيد: ناس البيت كيف قيلتو .
ـ محاسن وحليمة جو الراكوبة ..
محاسن: اهلن سعيد اخوي كيف مع تعب الخلا , والف الف مبروووك لفاطمة عجبني ليها شديد فرحتني.
سعيد: الله يبارك فيك عقبال حمود ولدك.
محاسن: اللهم امين!
ـ محاسن عاينت لفاطمة وحليمة وقالت..
محاسن: سعيد اخـوي فاطمة بنتك جاها عـريس!!
يتبع..
