နယုန်လ၏ လေနွေးနွေးကလေးက ခြံထဲမှ ပန်းပင်လေးများကို ကလူကျီစယ်နေ၏။ တောင်ပေါ်ဒေသဖြစ်သော ဤအရပ်ဒေသတွင်ပင် အိမ်ကလေးက ကုန်းမြင့်ပေါ်တွင်တည်ရှိနေသည်။
သဘာဝတရားကြီးနှင့်ထိတွေ့မှုများသည့်ဒေသပင်မို့ ခြံဝန်းကျယ်ကလေးကိုလည်း အသုံးဝင်စွာ အသုံးချထားသည်။ အခြားမဟုတ်။ ခြံအရှေ့၊ အိမ်ဘေးနှင့် ခြံနောက်ဘက်ရှိ သစ်ပင်ပန်းမန်များ။
လေဝှေ့လေတိုင်း မဆိုစလောက်ယိမ်းထိုးသွားသည့် ခြံအနောက်ဘက်မှ ကြယ်တာရာပန်းကလေးများကို ငေးကာ မင်းသုတ ပြုံးနေမိသည်။ မိခင်ဖြစ်သူ၏ အနှစ်သက်ဆုံးပန်းကလေး။
"ကိုကိုကြီး"
"ခခ ဘာလိုချင်လို့လဲ။ ပန်းပင်နားမကပ်နဲ့လေ"
"ဖေဖေက သွားကြမယ်တဲ့"
အချိန်စက်ယန္တရားက တရွေ့ရွေ့နှင့်ကုန်ဆုံးလာခဲ့သည်။ ယခုစာသင်နှစ် စတင်လျှင် မင်းသုတ မူလတန်းနောက်ဆုံးနှစ်တက်ရပြီး မင်းသုခပင် မူကြိုစတက်ရတော့မည်။
"သားတို့ရေ သွားကြမယ်"
အိမ်နောက်ဖေးဆီမှ ဒေါ်သက်ထား၏ အသံကြောင့် ညီအစ်ကိုနှစ်ဦး သံပြိုင် တုံ့ပြန်လိုက်ကြသည်က 'ဟုတ်ကဲ့ မေမေ' ဟူ၍။
"ခခ လာလေ"
ဂျင်းဘောင်းဘီကို ခြေကျင်းဝတ်ကလေးလိပ်တင်ကာ တီရှပ်အနီကလေးနှင့် ကလေးလေးက ငယ်စဉ်ကလိုပင် အသားအရည်ဖြူဖြူလေး။
"ကိုကိုကြီး"
လှည့်ကာ ခေါ်လေသည့် အသံပိစိလေးနှင့် ပါးဖောင်းဖောင်းလေးကို မင်းသုတ အသည်းယားစွာ ဆွဲညစ်လိုက်ပြန်သည်။
"ဘာမေးဦးမလို့လဲ"
စကားပြောတတ်သည့်အချိန်မှစကာ သိလိုသမျှတို့အား မင်းသုတကို တိုင်တည်ကာ မေးလေ့ရှိသည်မှာလည်း သုခ၏ ချစ်စဖွယ် အကျင့်ကလေးသာ။
"အဲ့ဒါ ဘာပန်းတွေလဲ"
"ကြယ်တာရာတဲ့ ခခရဲ့"
"ကြယ်နဲ့လဲမတူဘဲနဲ့"
စပ်စပ်စုစု စဉ်းစားရင်း မေးခွန်းထပ်ထုတ်လေသည့် မင်းသုခရယ်ပါ။
![](https://img.wattpad.com/cover/243340370-288-k909849.jpg)
YOU ARE READING
ကြယ်ပန်းလေးတွေ ဝေမှဖြင့်ကွယ်.....
Teen Fictionကြယ်ပန်းလေးတွေရဲ့ အဓိပ္ပါယ်က ဖြူစင်စွာ ဖြည့်ဆည်းပေးခြင်းတဲ့ ။...။ ကြယ်ပန္းေလးေတြရဲ့ အဓိပၸါယ္က ျဖဴစင္စြာ ျဖည့္ဆည္းေပးျခင္းတဲ့ ။...။ Art : @ZinMinHtike❣️