Bad Gyal Poochie

Chapter 14: Expect the Unexpected

Good morning all thanks for the votes. I've seen that the votes are still coming in thanks so much. The stats are really looking up and I will be consistently updating sooooo just you're luck....expect another update later today because when I said I meant business, I mean serious updates will be coming you way. Don't forget to continue commenting I love that. Subscribe to my youtube (Link in my bio) and I will shoutout the most active person in the comment section. 

_______________________________________________________________________________

As mi step in a di house mi see mummy an daddy sit dung a hold conversation an stop all of a sudden. Di only ting a run through mi mind now enuh is dat mi nah get fi stay down here not one more weekend by mi self no matter wah. Mi drag mi foot an di bag an go sit dung infront a di two a dem. Fi a whole 2-3 minute nobody no seh a ting. 

"Alrite mi ago talk now," mi mumble.

"So a now you ready fi talk?" Mum move har hand from unda har chin an point pan mi wid har long finger nails, den put dem back unda har chin. "Now you feel like you can open yuh mouth an tell we lie?" 

"Mi neva did ago tell no lie." 

"Shut up pickney wen mi a talk." She use har two finga an push back mi forehead. "Yuh feel yah bad gyal, eee?"

"A dat a gwan from mawnin enuh. Everybody come a try accuse mi of doin someting an nobody nah ask mi if a true." Mi affi try an find out how much dem know cause wid dem yah two mad parents mi a trod pan dangerous grounds. 

"Den talk to mi Miss Big Woman Poochie! Talk mek mi get fi hear weh yuh ave fi say." Mum a shout now an she stand up ova mi. 

"Who tell unu seh mi go a party e, mum who tell unu dat? Mi nah say mi no step outta di house wah one an two night but who tell you say mi go a party?" Mi brace mi self ina di seat fi back up likkle further from mum in case she decide fi swing afta mi, den mi can duck.

"So you a tell me say, you Poochie neva go a party a Kellits?" Baxide, a which a informa go talk pan mi name. Yes people did di deh so it coulda be anyone. People pan a whole know seh dem no fi seh noting wen dem see mad people pickney a dance cause nuff girl sneak out go a party an dem parents no hear till long afta. Dat somebody must really hate mi. 

"No mum mi no go a no Kellits last week." 

Daddy hold up him han ina di air an get up. Him look vex so till. "Poochie mi cya belive to say a dem yah tingz yah yuh really a gwan wid."

"Yuh too," *fist fist slap "baxide lie," *fist slap bax "tap tell lie man," *fist fist fist. Mum gimme some hot fist an bax so dat all wen mi a try block dem wid mi han, she a pull dem an fist same way. 

Mum march go fi har phone pan di table top an a cuss bad. "A no you dis yah ina booty and long horse hair? A no you? Tell mi say a no you an Rick dat a whine up an gwan wid unu big people tings." She fling di phone pan mi an same as mi look mi see seh is a video pan Facebook wid di likkle dancing competition, from dat same night a Kellits mi an Abby did a gwan. Wen mi realize a Jada profile di video deh pan. 

"Mum but a long time video dis yah. Dis a no from last week." Me put dung di phone an stan up in case mi affi run out a door but it look like daddy realize an go block di door. 

"Yuh hear mi ask you noting bout last week? So dat mean yuh sneak out last week to? Mi ask you if a you dat in a di video mi no business if a last week or di week before. Mi ask you a simple question! An due to how yuh lie you can't even answer!" Mum tek up di rubbing alcohol bottle an fling lick mi an two cushion. Same as she tek up di flashlight daddy run go wol on pan har hand.