Bad Gyal Poochie

Chapter 27: Exposed

Hey yall. I didnt have time to edit so enjoy and have a great weekend. 3/3

_________________________________________________________________

After di doctor visit Monday weh mi did a try avoid, mi learn three things. 

1) Mi no pregnant. Di only reason why mi period no come yet is due to mi excessive weight loss an di fact seh mi a stress out mi self too much. 

2) Afta di heavy blow weh mi get ina mi head back wid a piece a board, mi have a concussion an low iron which can cause fainting spells. 

3)Di cut pan mi left hand clean up, but di scar might neva fade. 

Mi did extremely nervous fi dem check mi pee because mi did a wonder if di pregnancy test dem di wrong, plus mummy di deh dere. All now nobody no know a who di girl dem be weh try gang mi. Kelly seh she no know a who dem be but a lie she a tell. Mi a look fi see if any video a di fight go up pan social media but not one no post or send out. Abby keep on a cuss seh if she did deh deh she dah affi send one a dem a hospital. Ashley upset so till, she just cute wen she mad but a serious situation mi could a get stab up. Mi deh pan rest day from now until di next two days so mi deh home. 

As mi sit down mi just a scroll fi see weh mi can find a job outside of Clarendon. Dontae a keep mi company pan di phone cause we a chat fi a good amount a time. Me neva know him could a chat Patwah due to how him just a twang wen we just meet. 

"Yuh cannot stay in dat community yuh need fi leave." Dontae seh. "More while yuh just affi push through an know seh a no di end. It hard an mi sorry seh yuh lose yuh bestfriend, yuh relationship, you affi drop out a school an di next ting people a trash you reputation. It no easy but you affi look forward. Yuh affi leff deh so if you wah prosper." 

Mi feel it wen him mention all a dat but mi just affi tink bout di fact seh Michael tell everybody seh mi dash weh belly an a expose mi to noting but criticism. Nuff people a look dung pan mi tell all Brandon a come call mi 'Miss Nyam Belly'. Mi affi tell him seh from all di belly dem weh fi him mada nyam why it couldn't be him. Bwoy wah gwan di most way until mi remind him seh him no fi judge nobody. 

"Mi a work pan it. Don't worry mi a work pan it man. It nah go be fi long because mi ave a plan an I'll be damned if mi no achieve weh mi want. Mi spend nuff time a get counselling wen mi just angry an more while dem sessions deh no mek mi feel no betta. Mi just really wah study psychology so mi can help people cause from weh mi a come from, it betta fi understand. Mi ave a plan just watch mi an see." 

We chat some more until him seh goodbye an mi decide seh mi ago sell ice-cream. Di big people dem no buy none from mi since di whole Kelly incident, but since mi get gang up one an two persons come buy. Most a mi customers a likkle pickney still, dem nah hold grudge cause dem want ice-cream an popsicle. Mi look up some college an apply fi see if mi can get in. A mean why not try after all mi ave a goal. 

"Poochie yuh no know a wah?" Mi spin round quick an see Mummy a rush come out a di house.

"Wah?" Mi slam down di laptop so mummy cannot see a ting. 

"Dem thief Bredda Bandy Pick Up Truck. Dem seh dem know a who cause di camera show everyting. Come on." Mummy staat drag mi.

"So weh dat affi do wid mi mum mi nah go." Mi seh an she hang on pan mi shirt an drape mi up right ina Pack Man car. 

Wen we reach a di yaad cross likkle down from weh Faas Mavis live we see seh di house door open. Di people dem weh live deh always deh a foreign but it look like dem come back. Mummy drag mi by mi hand so hard dats di laptop almost drop out a mi hand. 

"A weh happen?" Mi see Mavis run come cross di road.

"A right yah so mi park di car last night cause di tire buss. Now mi come dis morning, di buss tire deh a grung but mi no see mi Pick Up Truck." Bredda Bandy deh pan di verandah wid di ole man an him wife weh own di house. 

"We have surveillance camera so let's see how it go." Di lady seh. 

Everybody push pass di people dem go ina dem house. It annoy mi so till because di people dem not even know we to dat. Kelly, Marva, Mavis, Bredda Bandy, Mi, Mummy an two other man. We look pan di big screen T.V as di people dem play di footage from last night. Wen we look pan di time afta 1am we see wen two man come an change di tire pan di pickup an drive weh. Di faces don't look familiar but dem drive weh. 

"Bandy masa yuh ave it fi bear." Marva seh. 

"Mi a go a station go report it right now. Yuh know how long mi ave dat deh vehicle? Mi ole now mi no ave dollar fi buy back none." Bredda Bandy seh. 

Everybody staat step out a di house an all of a sudden mi get a idea. Mi borrow an ask di nice lady if mi can check di footage from way back. Mi a go true di recording until mi find di night wen Kelly did drop an almost lose di baby. As mi continue fi watch mi see wen mi bruck do corner an did a listen a di gate a Mavis. Di recording show di entire ting up to di point weh mi push off Kelly an she hold har balance, den she charge afta mi an drop wen har slippers pop out. 

"God a you alone! God a you alone!" Mi a shout an everybody run come back ina di house. Di two ole people dem a look pan mi like mi mad. 

"A wah Poochie a wah?" Mummy come an grab on pan di laptop before it mash up. 

"Unu look yah," Mi reverse di footage. "Unu a wicked, unu mi a talk." Mi point pan Kelly, Mavis an Marva. 

"A wah? Likkle gyal mind weh yah do. Worse like a how nobody bout yah no like you afta weh yuh do." Marva seh wid har hand pan har side. 

"Unu watch wicked." Mi play di footage an everybody watch it. "Unu watch real dutty wicked people. 

Di silence ina di room thick so till all wen di recording pass an show everyting nobody no seh a word. Bredda Bandy an di two man dem look pan Mavis, Marva an Kelly wid disgust. 

"A so unu di tan?" Bredda Bandy seh. "A so unu did stay?" 

"A wah?" Marva seh wid attitude like everybody no see di truth now. 

"Yuh know wah come out a di people dem house." Di next man seh an everybody step outside. 

"You a ask a wah? Yuh no see wah just gwan likkle while? How yuh fi do dat to Poochie? Mi know yuh hate Tara cause you did a sleep wid Dean behind har back but how you fi tek it out pan di pickney." Bredda Bandy mek mummy bend dung an hold har knees. 

"Hold on wah?" Mummy seh. 

"No gwan so Tara cause him dah leff you same way if mi want." Marva seh. 

"Yuh know wah di two a unu shut up." Bredda Bandy shout. "Mek we talk bout di fact seh dis woman an har pickney, frame a good likkle young girl. Mek she affi drop out a school fi pay fi you medical bills." Him point pan Kelly. "An you big ole woman witness di truth an no say a word of truth to a soul." Him scornfully look pan Mavis.

"A no so it fi go man." One a di man dem seh. 

"So if dem neva tief mi vehicle we wouldn't know seh Poochie innocent?" Bredda Band staat shout afta Kelly an she staat cry. "Shut up wid dat. How unu sleep a night time? How yuh tek di girl money? How?!"

All mi can do a stan up an look. Mi speechless due to how mi glad seh di truth finally reveal.

"Right now some a unu can just gwan dung a hell go marinate till judgement day cause unu mind bad. God no want no liad an badmind people ina heaven." One a di man seh. 

"Yuh know wah Poochie come. Come mek we go home." Mummy hug mi an we staat walk go home. 

Wat a day of exposing.