Bad Gyal Poochie

Chapter 30: Back to Hell

Remember that I haven't edited the chapters from 28 up so if you see errors please ignore as I will edit as soon as I get the chance to. 

2/3

_________________________________________________________________________

Afta mi tell mummy bout mi university acceptance email she tell mi congrats but daddy behave di most wid excitement. Mi an him chat di whole week weh we ago do fi send mi go college. Mi feel happy so till. Sure mi kinda worried but a mean mi just affi gwan wol di faith an work hard. Mi use mi ice-cream money along wid a part a mi pay fi throw a big partner but mi no tell mum or daddy. It dah be di worst ting mi eva do mi cannot trust dem so not one bit, not wid my money cause mi tell di banker mi want it soon an she seh sure. Aunty Dawn an mi a grow very close cause she always a call mi an tell mi noting but encouraging words. 

"Aye gyal watch it nuh baxide man." A hot gyal walk by an bounce mi almost knock mi bag off a mi shoulder. 

"Yuh no see seh di lashes a bling yuh ediat? A you fi watch weh you a go." Mi seh to har an she flash di extra red synthetic wig an walk off ina har Leopard romper. 

"Wat a gyal crawny. She no see seh har hair wah do?" Di friend weh a walk beside har seh. Di two a dem a laugh an look behind pan mi. 

One mind seh continue pan you journey an mek dem gwan but di next mind a tell mi seh fi done har an mek she shame cause di red hair one slippers bottom lef har a road. Mi look pan di slippers bottom pan di side a di road an di girl a walk go out to Shoppers Fair Supermarket. Mi kiss mi teeth an spin fi continue walk den mi buck mi toe an drop. Just as mi fi seh it betta mi did go cuss dem mi feel someting jook mi. Wen mi tek a stack, is a $5000 bill roll up fine so mi grab it up an look roun fass. Few people deh bout a mind dem business so mi just drop it ina mi bag an continue walk. 

"God yuh good enuh." Mi smile an go ina di bus weh a load fi mi go home. 

Mi tek out di money mi find an roll it open, only fi realize seh a four hard $5000 dollar. No sah today a my lucky day man who could it be but God. Dis a my partner money fi di next five week so mi no affi stress to dat. Mi step out a di bus a mi gate wid di biggest grin only fi it drop off a mi face wen mi see people a move out mummy an daddy bed put ina wah truck. 

"Wol on a wah gwan?!" Mi rush up di step dem an di house half empty. "Mummy? Daddy?" 

"Dem down a di next house." One a daddy friend seh weh a help move di tings. 

"Which next house?" Mi ask him. 

"Di first one weh yuh did live." 

Mi spin an ketch a taxi quick fi go back down a mi ole yaad. As mi step out a di taxi mi see a whole heap a people a look. Mi shake off dis feeling an go ina di house weh mi see mi parents a fix up di place. 

"Hello wah happen here?" Mi throw dung mi bag an stan up a look pan dem. 

"Di people dem ready fi dem place so we did affi leave," Daddy seh an sound like him a strain fi move di couch an fix it by himself.

"Which people?" 

"As in mi uncle wife an har pickney dem." Daddy drop dung di couch an whine him waist an stretch him back from side to side. 

"So how dem fi just do dat no daddy Uncle seh fi stay a di house?" 

"Poochie gwan go fix up ina yuh room," Mummy seh. 

By di time mi fi ask more questions she go tek up di pressure cooker cover weh did kotch pan di counter an look pan mi. Mi no know weh she plan fi do wid it so mi jus shut up an go ina mi room. As mi buss open di door a Mark dat a tek mi bed fi trampoline. 

"Bwoy come out!" Mi seh an slam di door. 

 Mi cya believe mi affi come back a dis yah hell hole come live. Dem someting yah no normal enuh, mi honestly cya believe. Mi pull di back door an go outside den mi look cross Faas Mavis yaad. Di house look di same only tru nuff bush ina di yaad weh need fi cut. As mi go back inside an go out to di front a di yaad mi realize seh people a pass an chat, an dem nah hide seh dem a chat mi either. Mi see Faas Mavis a walk come ina di yaad an mi go inside an tell mummy. She walk go back outside an mi realize seh Mavis come an invite har self ina di house an sit dung pan verandah. 

"Wat a piece a brightness." Mi seh an mummy stan up a look pan har. 

"Di prodigal people return no so?" Faas Mavis laugh an just step back outside. "So unu no plan fi leff an go back up so?" 

"Weh yah do ova yah?" Mummy ask har an if yuh no listen good, you dah neva hear har. 

"Mi just a come fi ask unu if you hear wah happen to yuh daughter likkle fren." She seh an mummy a wait pan har fi continue. "She dung a hospital bra she no tan good at all." 

Mi heart rate go up wen mi hear dat an all of a sudden mi ready fi hear a wah really happen. Hope she alright though cause mi nah hold a grudge or noting like dat. Maybe a har asthma come back like wen she did likkle. 

"A wah do har?" Mummy ask Mavis. 

"Di one Ryan no beat har to pulp. Not even orange pulp no supposed to bitter so. Mhm him do har real bad mi a tell you, an a him same one affi carry har go a Denbigh Hospital." Mavis stand up like she want each a we fi mek an input to di conversation but mum just say she sorry fi hear an go back inside. 

"She no ina mi she a gwan deh enuh?" Mavis point har mouth afta mummy. "She no ina di talking bra bra so mi a go outta road deh." She turn an go cross di road. As mi fi tink bout Jada daddy call mi.

"Poochie come here!" Mi hear daddy shout. 

"Yes?" Mi seh.

"Mi no want you a mix up wid nobody yuh hear weh mi seh?" Him look dead serious. 

"Yes sah." 

"Mi dead serious enuh pickney, if a eva ketch you mix an mingle wid dem bout yah you will hear bout it. Mi soon get we from out a dis community unu no worry. Mi a go pan a construction site an see weh mi can do cause we nah stay ina dis hell fi long. You hear mi Tara?"

Mummy nod har head but she look depress. 

"Mi soon come deh." Mummy get up an go ina di bathroom an lock di door. 

Mi know seh a cry she gone cry cause daddy tell mi fi go watch T.V den him go knock pan di bathroom door fi bout five minutes before mum let him in an slam back di door. Mi look pan mi Whatsapp status dem an realize seh people a post up seh pray for Kelly. It look like vehicle lick har pan di side a di road an she ina hospital from dis mawnin. A wah gwan ina di community? 

Back to hell we are. Mi cya bada wid di drama again.