Bad Gyal Poochie

Chapter 23: Paternity Confusion

Hey ya'll here we have the chapter for tonight. Happy reading.

____________________________________________________________________________

"Michael! Michael!" Mi a boom dung di door fi dis dutty johncrow nasty ugly toe bwoy open up. Mi blood a boil an mi know seh a him an di likkle dutty gyal ina di house cause mi hear whole heap a shufflings. Mi have half di mind fi bun dung di house wid di two a dem ina it, but mi no do well ina cell an mi a no murderer. 

"Michael! Yuh know seh mi will bun dun dis baxide enuh, OPEN DI D*MN DOOR!" Mi see him neighbor dem staat look out fi faas. One staat tek up clothes off a line, a next one decide fi wash dem clean car, a next one decide seh a time fi weed di yaad an di last two decide seh wifi work best pan dem verandah. Other people find some reason fi do someting outside. Suddenly di door swing open an a Michael mi see a rub him yeye dem like him a sleep but dem clear as day. 

"Weh yah come wake mi up fah? Yuh vulgar enuh gyal." Mi not even pay him no mind mi run go in a di house. Inside no ave nuff furniture so it no tek long fi mi search. 

"A so you do mi?"

"So mi do wah?" Him sit dung pan di bed edge.

"Yuh breed otha gyal pan mi an a just yesterday yuh tell mi seh yuh love mi." 

"Poochie mi no know weh yah talk bout." Him ease back a gimmie sexy look. 

"Weh Kelly? Yuh mek gyal a shame mi off pan social media big head hog. How yuh so d*amn disgusting?" 

Him laugh an say mi no ave no sense. Mi tek out di screenshot an show him. All of a sudden him speechless. Mi staat fight him now but di ole crosses know him stronger dan mi so him just a hold on pan mi two hand dem. 

"Calm dung yuh self. Is a prank. Is a prank." Him a laugh but him nervous wid it. 

"Michael weh di camera dem deh? Mi look like YouTube clown to you? Yuh no ave no channel so mi no know who yuh think you a fool." 

"Mi just did wah see you reaction." 

Mi know a lie him a tell an mi affi mek him admit to mi today seh a lie him a tell. 

"Yuh know seh Kelly tell mi seh you an she deh an a you a di fada." Him shake him head an let go off a mi hand. 

"Wat a gyal can chat. Poochie a no mi breed Kelly yer dat. Wen mi get a link off a har from wen she did a breed already. She come gimmie some yesterday an a try seh a mi a di daddy so dats why she post up di picture. Mi mek it clear seh a no mi she a fool so she tek it dung fast yuh zimi.  A no mi one did have har a do noting. Mi know you vex but dem time deh yuh did so moody and hard fi get to. If mi tell you seh a who she talk a di real baby fada yuh drop dung dead."

In all honesty mi done wid Michael clean clean. If mi can deh pan mi cycle an him go link a next girl cause mi cya have sex wen him want mi no important to him. All dem time mi spend wid him yesterday an we a chat bout we future did completely meaningless. Him a seh we ago married afta mi leave school an how we ago build di best life together. Him even tell mi seh him love mi an him neva tell no girl dat before but a guess mi is just 'another one' according to how DJ Khaled say it. Mi look round again fi find someting cause mi know mi did hear somebody else in here. A God mek mi search unda di bed cause a see a red an black handbag an drag it out. 

"Who fah dis?" Him look like him see duppy den him staat stammer. 

"A..a..a." Mi mock him an just open it an shake out everyting pan di floor. 

"Suh yuh nah cry." Him ask mi.

"Weh mi a bawl fah?" Mi kiss mi teeth. 

"Afta everyting we go true not even likkle crocodile tears?" Mi look pan him an bend down a search.

Di bag look like some female pack an come fi spend di night. Two thong an matching bras, short black dress, toothbrush, lotion, roll on, makeup bag, morning afta an a big fat purse wid $150. Mi tek out di pack a bubblegum weh ina di purse an put ina mi pocket wid di $150. Mi know seh di girl who eva she be deh someweh bout di house, but mi not even ago bada waste my energy. Mi step out a di house an slam di door but not before mi tek two big rock stone an fling bruck di window to di bedroom. 

"Aye gyal." Michael run out an come drape mi up. 

"Lick mi no, dweet cause mi know a long time yuh feel fi do it. " Him let go an push mi dung a grung. 

"A gyal like a unu mek man affi commit crime enuh pu**yh*le. Mi a come up deh a morning to yuh muma mek she pay fi dis hear mi." 

Him a cuss a whole heap a bad word an mi a cuss him back to. Afta a long time of just cussin mi tell him seh him no ave no ambition which mi neva mean, but a it mi know would a hurt him bad. Michael no like wen people tell him dat it mek him mad. 

"Mi you a tell dat." Him seh. 

"Yes! Yes a you mi a tell dat!" 

"At least mi way betta dan yuh likkle undercover perverted pupa." As him seh dat mi brace back. 

"Weh yuh seh likkle while?" Mi feel fi di lighter ina mi back pocket cause it look like somebody or someting affi go burn today, Is either di house or him. Mi vote is on di house. 

"Yes go ask yuh fada how him get fi breed yuh mada friend daughter." Mi drop di lighter an mi mouth open. "It look like Kelly a carry Dean pickney. So go hold yuh corners an no mek mi affi notify di whole neighbourhood." 

Mi spin an run go fi reach a mi yaad. Usually mi dah tek a taxi an it tek a few minutes fi mi reach home but mi just a run. Mi run pass Jada lane, mi run pass di yaad weh mi used to live, mi run pass every house till all dog staat run mi dung. Mi heart a pump so fast ina mi chest till it come in like it ago come through mi throat. Wen di dog finally stop chase mi ease up an drop dung a wah corner. Mi just a catch breath, mi head a pound, salty sweat a run ina mi mouth an mi yeye an mi can't even swallow mi own spit. Mi see a bottle a wata deh pan di side walk an mi pop di cap an use it rinse out mi mouth, it disgusting but mi a dead. Di only ting mi can play ina mi mind a weh Michael seh. Him really seh someting else fi hurt mi ten times as bad. Mi sit dung fi a second an den mi walk di rest a di journey till mi reach home. 

"Weh yuh deh from time?' A mummy mi see walk come out a di house. 

"Mummy.." Mi no get di chance fi seh a word cause mummy staat ask mi one million question back to back. Mi not even can ansa one a dem due to how she a talk fast. Mi only catch di words, Kelly, Dean, pregnancy an dead. 

"Come! Cause mi mek sure send Mark gone dung a him granny." 

Mi go ina di house an a dat deh time mummy staat cuss mi. She want fi know how mi get fi keep it a secret from har seh daddy might be di baby fada fi Kelly unborn child. She cuss mi worthless fi condone slackness wen poor mi neva know a ting. She seh Marva call har a cuss seh she a go a police station even though Kelly a nineteen cause a must rape daddy rape har. Mi run go ina mi room go lock di door but dat no stop di noise. Mi phone ring an as mi open di line a Jada a bawl pan har phone seh she need mi right now cause Ryan out fi kill har. Di way how mi overwhelmed wid stress mi hang up di phone an fling it ina di wall. Mi hand dem start shake an mi heart dis a race fast. Mi feel like mi cya breathe an mi just drop pan di floor an cry. Mi cry in silence as mi hear mummy voice deh behind di door a cuss same way. Mi hug mi legs to mi chest, grab mi head phone an turn up di music an just cry till it come in like mi cya stop.