Bad Gyal Poochie

Chapter 9: Drunk Drop

YESSS!! EVERYBODY REALIZE THIS? I AM UPDATING MORE THAN USUAL RIGHT NOW BECAUSE I WILL BE TAKING A BREAK FROM UPDATING ON HERE. I'LL BEGIN TO START UPDATING MY OTHER BOOK "JEALOUS OF CANDICE" SO WONT BE MUCH TIME TO UPDATE THE TWO BOOKS AT ONCE. ENJOY THESE THREE OTHER CHAPTERS FOR NOW AND THEN YOU CAN CHECK OUT JEALOUS OF CANDICE TOO. ENJOY ^^

_________________________________________

Di party tun up till mi can't even find mi purse.

"Ashley gimmie mi damn purse." Mi grip on pan har hand an she fling mi weh.

"Move an no touch mi. Yuh see mi look like yuh likkle scabby dem?" Wen mi look good, a di dutty foot gyal tan up side a Ryan.

"Weh yuh seh likkle while?" Mi straighten up mi self now although mi kinda drunk.

"Yuh deff?" Abby seh. She ave on a white knee length shorts wid a fancy backless blue blouse wid sequins. Di blue an white sneakers she ave on match di blouse. Har hair ina wah top not with blue braid.

"Well fi di first yuh look..alright-ish." Mi compliment har.

"Wah?" Abby move vex now. "Me eva look good dutty gyal." Judging clothes (clothes worn at home) look good yes.

"No dear if mi sure?" Mi behave like mi a think. "You neva look good till now. A hope you keep it dat way." Mi turn roun fi go find Jada dem.

"Just cause you look good tonight no think mi no know how you get fi look so." She walk up an a talk behind mi.

Di place kinda dark an di music loud so mi affi go turn an look pan di batta ears gyal. Kmt.

Mi spin facing she. "Well inform mi please cause obviously you know someting." Mi seh to har.

"Di one night yuh f**k Michael an him gi you money no mek you more dan mi." Mi might tipsy but mi no feel weak at all. Dem muscle yah a build from mi ina belly an mi ready fi use it knock out a gyal back teeth dem again.

"Wait how you know dat? How you find out?" Mi a behave sarcastic now. "Ohhh!" Mi snap mi finga dem. "A did you?"

"A did mi wah?" Abby a step closer like she ready fi fight. Fi har clothes can roll ina dutty but no mine. Mi look too good tonight. Mi no ina di mood, plus a bey money man a pree mi from mi reach. Mi cya look like so likkle tegareg a now.

"A you did deh behind di banana tree deh night deh?" Mi laugh an some oda man laugh to. "Mi know, cause mi did a tell Michael seh..." Somebody walk up behind mi an put dem hand pan mi waist.

"Tell mi seh wah." Mi drag him close up behind mi an him well a play ina di act to.

"Mi did a tell you seh yah give it to mi too good dats why mi a mek up so much noise. Mi neva want nobody fi hear but Abby know cause she did a faas from back a di banana tree fi hear."

Abby mouth heng a grung an Ryan move off. Bwoy mi no know a wah do my bestfriend why she cyah do betta. She well hook up pan dis bwoy weh follow up bey batta ears gyal. Mi ago cut dem off fi har own good. Jada deserve betta mi no know a wah kinda sweet talk him plant ina har head. All dis time it look like mi did a cut off di branches weh spring up. Just watch how mi going dig up dem raas stupidness deh by di root. No man no fi a keep bey woman wid Jada an nah treat har good an she stay wid him. Not as long as mi a har bestfriend. Not ova my dead body.

"Mi an you neva do ntn." Michael let go of a mi wen Abby walk weh.

"Mi know." Mi whisper ina him ears den mi staat giggle. "Come here mi wah gi you someting." Den mi drag him go a wah quiet place.

________
------------

By di time mi reach back a yaad a bout 4:51am. Mi drunk yuh frig. Wen James drive up which part mi lef mi shoes a di banana tree a Jada an Ashley affi help mi outta di car.

"So if yah stumble so Poochie how yah go climb ina di house?" Ashley ask mi an a laugh.

"Mi no know, mi can swim go in?" Mi seh an di wol a we staat laugh. Wol a we drunk like bat. He he heee he heee. Except James.

"Mi wah doo doo." Mi seh.

"Hee hee he he use dis." Jada seh an a gimmie piece a napkin.

"Move an go wipe you mouth." Mi seh.

"Move!" Jada seh loud loud den bey dog staat bark.

In a bout two second Ashley an Jada jump ina di car an James screech off.

"Unu nyam shiiiit." Mi whisper loud afta dem like dem can hear.

Mi put di chain ina di purse an mi earrings.

"Damn it." One a di diamond studs drop a grung. "Cho." Mi affi go find it a mawnin.

Mi tek off mi heels an put on mi shoes. Mi staat trod through di bush fi go ina di yaad. Mi know mum dem no wake yet. When mi finally reach a di window mi tip pan mi toe dem an slide it weh. Mi kotch di heels ina di window sill so dem hang ina di room but a di heel part a wol dem up. Mi no wah fling dem in an go wake up nobody. Mi grab on pan di window open part an brace mi self pan di tank an push up mi self.

"Rahtid." Neva know it dah so hard fi go in. Mi affi jump back dung.

Ruff ruff!

Ruff ruff!

Mi tek up wah half a block an fling afta di mongrel dog.

Ruff ruff ruff ruff ruff!!!!!!

"Watch mi an you dutty nayga. Mek mi see a who ago feed yuh when mi nyam mi Sunday dinner a evening. You watch." Same time di dog tap di noise an lie dung a look pan mi.

Mi wol on pan di window opening an brace mi foot dem pan di wall. Same time mi hear movements mi drop back dung a grung. Ouch mi han. No tell mi seh nobody wake already. Two minute afta dat mi hear toilet flush an two door lock. Mi climb up again an reach up through di window. Tank God. Mi tek up mi heels an sneak go ina mi room.

Mark lay dung upside dung now. Di part weh di him foot deh woulda be mi head. Mi change off faas an hide mi clothes an ting dem under di bed. Mi cold yuh fret. When mi finally lay dung mi feel good. Yes mi can......sleeeep.

____________
------------------

Mi feel wata a drip pan mi face. Mi wipe off it wid mi han an spin roun ina di bed. Next ting mi know mi feel like mi a drown.

"Woie woie woie!" Mi fly up an try fi ketch deep bret.

Mark stan up a di door wid wah empty cup an a laugh. "Wake up an come eat you breakfast. A soon time fi we go dung a yaad." Mi tek two pillow fling afta him an him run.

Wen mi tek up di phone a 8:30. Mi not even get no good sleep. Jesus mi head a hat mi bad. Mi go brush mi teeth an wash mi face den go ina kitchen an dis tek up mi food eat an drink mi tea.

"So everybody laas dem manners now?" Daddy seh a look pan mi. Him an mummy sidung roun table a eat food. Mark tan up pan wah board box a wash plate ova di sink.

"Mawnin." Mi seh but mi voice sound rapsy.

"Yuh no wake yet man," Mum seh.

"No." Mi just go sidung pan di verandah an eat mi food.

Mi go fi wash mi plate an see one wol heap a pot an pan, plate an cup ina di sink.

"Poochie wash dem two likkle someting deh ina di sink deh an come put on yuh clothes." Mi hear mum a call from outta di room.

"Two likkle plate she call dem yah." Mi seh to mi self.

By time mi done wash up everything mi just put on mi clothes and jump in a di car wid everybody.

"Daddy lata." Mark shout afta Daddy wen we a walk go dung ina we yaad.

"Pull di door an go wipe out di house Poochie. Afta dat unu get ready fi go a church." Mummy walk gawn out di road to where eva.

Mi just open di house door an drop dung ina mi bed. Mi nah do not a ting an mi nah go a no church. Mi wah sleep. No know wah di hell wrong wid people cho! Come mek mi more miserable dan how mi tan. CHO!