Bad Gyal Poochie

Chapter 21: The Relapse

Wellll here's to the final chapter for the weekend. Let's really have a conversation about how the book is going so far. How do you feel about the characters? How do you feel about the different situations? I'm all ears, express yourself in the comments. 

_____________________________________________________________________________

Fi di whole entire week mi deh up an about just a waste time. If mi no dung a Michael, mi gone look fi Rick. Since Jada reunite wid har man we hardly ave time fi each other, except wen we go have a likkle fun an shop together, an go eat pan mi birthday a few days ago. Ashley still deh a Mobay an nah come back till di day before school.  A cya wait fi di likkle boutique hurry up and open in di next two days. Mi not even like stay a my yaad cause di tension ina di house between mummy an daddy unbelievable. Mi no know a weh dem a gwan wid but mi know seh dem no as discreet as dem think dem be. Even Mark come a ask mi how dem a move weird so.  Mark di likkle pickney can sense it so yuh must know how bad it be. Right now mi a go down a Bredda Bandy Tailor shop fi mi uniform dem fi school Monday morning. 

As mi come out a di taxi and go ova to di likkle board up tailor shop mi see Bredda Bandy a rush. A hope him done mek mi skirt dem cause him seh dem ready. 

"Poochie oye?" Him sit dung round di ole time sewing machine a sew a uniform fi a girl. "Yuh affi go wait likkle bit enuh." 

"A you tell mi fi come wid mi money enuh sar so mi assume it ready." Mi frown an say. 

A four persons sit down in deh a wait pan him. 

"Look ova deh side deh weh mi record book dem keep if you see yuh skirt dem." Mi staat search. "No man not ina di basket, look up weh mi hang up some pan rock. Di uniform ave yuh name pan a paper tape." 

Mi stand up a look fi bout ten whole minutes. A one ting wid Bredda Bandy him can sew, but anytime yuh ready fi yuh tings it can neva find. Di place likkle an chuck up already an before di man organize di place, it come in like as him done sew one ting him just label it an fling it ina di pile. Mi dig some more and search but all now mi no find it. 

"Bredda Bandy mi no see it enuh." Mi hand dem tired as hell.

"Look man it di deh cause mi sew it last night."

"You know seh mi nah get pay fi dis. Mek yuh no clean up di shop sah? Mek yuh so disorganize." Mi shake mi head in frustration. 

"Darlin no matta how mi fix it, it neva keep neat so it no mek no sense." Him push up him glasses an squint up him yeye likkle more before him staat sew again. 

"Sar mi no see it mi done now. Mi nah look fah." Mi just go a di door go lean up. 

Him finish sew di girl uniform an tell har fi go try it on. Wen she get up go ina di likkle curtain changing room, same time Bredda Bandy staat laugh an go ova to weh she did sidung. 

"Poochie see yuh skirt dem yah man. A my lady weh gawn change did sidung pan it." Him hand it to mi an mi see mi name. 

"So dah gyal neva ave di decency fi tek up mi uniform before she sit dung ina di chair. A wah do dah big sour batty gyal deh man?" Mi a look pan di curtain weh she deh. 

"Poochie tek time talk memba seh she can hear you," One a di woman dem seh to mi. 

"Afta mi no business. Dis gyal come from weh mi no know tek har likkle dutty a** an sit dung pan mi skirt like she nave no care." Mi talk likkle louder an di curtain draw. My girl can only look pan mi an tek off har yeye. Not even cut she couldn't cut har yeye afta mi, a dare har.