Bad Gyal Poochie

Chapter 1 : Dance Battle

"Yes babes raaay yuh look good Jada a nung Ryan ago stop fool roun dah ediat gyal deh from dung a Becka Hill." Mi twirl mi sexy good body friend an she pause an look ina di dresser mirror well feel hype up an ting. 

"Yeah yute mi well look good man." Mi laugh out an mi put on mi army green high waist shorts wid a white belly skin off the shoulder blouse. Wi did go shop yesiday.

"Dah party yah ago slap weh ino. yuh dun know seh a we run dis place." Jada line up har mouth with har mada red lipstick an apply face powder weh mek har face look bright an pretty yuh fret.

"Mi no wah dah crawny bady bwoy Jason come near mi enuh. Him a come gwan like mi an him deh." Mi grab mi black ankle leada booty weh mi get from England wah time yah.

Jada laugh out an drop pan mi bed an roll. "A run yuh fi run di bwoy, him don't even work much more. All him do a beg." Jason a dis likkle scabby from outta Jada lane. Him eva a bun ganja an a ask me fi buy him drink. Brite an outta orda look how much time him drink lemonade over yah. Wata ina di drum dem otta door.

"Come on a time fi wi roll out enuh." Mi grab mi white Gucci hand bag wid di green an red stripe an sling it over mi shoulder.

Beep

Beeeeeeep

"Hear Ashley man a blow wi deh Jada come on." As mi spin Jada just a put on har shoes an grab di phone.

Be beep beep beeeep

"Wi a come weh di hell yuh no wait bwoy." Mummy deh outta daddy yaad so mi can cuss as loud as mi want an mi bredda Mark gone deh to. Mi flash mi Brazilian loose wave too hard to di side and it nearly blind mi. "Cho man"

As wi go in the probox mi keep on a scratch below mi batty jaw.

"James a weh u put pan dem seat yah mek it a scratch mi so no man."

Him, Jada and Ashley start laugh after mi an mi just cut mi eye after dem.

"Yuh neva rub dung deh so wid di cream mi gi you?" Ashley ask mi an mi don't ansa.

A tek a peep over to di front an James well a rub dung har thigh like mi rub dung mi puss. Wonder if a man wi charm mi tonight cause mi single way too long now.
On di way to Kellits mi start feel hypish cause dat mawga foot gyal ago di deh. Heyyy yah, she try don't show up har duty colaz.

__________
--------------

"All a di gyal dem weh ave a man roll out wid him an rock to dah one yah," di selecta seh.

     When your legs don't work like they used to before
And I can't sweep you off of your feet
Will your mouth still remember the taste of my love
Will your eyes still smile from your cheeks

As mi look round people start tan up sida dem man. Ashley heng on pan James, Jada a laugh wid a boy weh from wi reach him just drag har weh. Mi just tek up my self and move otta di spotlight.

"Baby weh yah go yuh have a man?" Mi freeze when mi hear him seh so nung people start look pan mi.

"Yeah man a mi," Lawd gimmie strength cause mi no ina di mood fi dis boy. Jason hug on pan mi and well tight to almost dash weh mi drinks. Mi fling him hand offa mi as soon as di selecta gone mind him own business kmt.

"Jason move."

"Buy mi a drinks no Poochie." Him ave a Guinness an a plastic cup wid red liquor.

"Mek mi ask you someting. Yuh Eva ave money yet?"

"Yuh know seh a dis yah try dis mi."

"Weh mi do mi just a ask."

"Mi know yuh no like mi enuh Poochie but if a tru you hear seh Michael a pree yuh mek yuh skin ketch a fyah mi wi out you." Him walk weh go back weh some man a smoke, drink an laugh a watch a gyal wine up r self.