Bad Gyal Poochie

Chapter 25: Betrayal

Heyyyyyyy. So today I have a little token for your weekend. I'm uploading three chapters todayyyy! Normally I would wait to watch the Statistics of how well this book is going but I'll be posting an additional two chapters. 

So this is 1/3.

________________________________________________________________________________

From di incident happen wid kelly one week ago, is like mi literally open hell an drag mi self go down there. Mi no encounter noting good from den until now. Mavis, Marva an Kelly tell everybody seh a me push har down an mek she nearly lose di baby. Of course everybody believe seh a me do it fi true an is not Kelly accidentally buck har toe an drop. Mummy seh she nave a dollar fi give mi fi go school so guess who turn drop out? Yep, me. Daddy no deh a yaad no more him eva gone away. Marva wid har money hungry self a talk bout court an lock up so mi affi tek on two jobs fi help pay Kelly medical bills. Due to my bad luck Kelly almost lose di baby now she affi get regular check ups fi ensure di baby alright until it born, which I am funding. At dis point mi just feel fi run weh because dis yah place a wol dung to baxide. Mi live ina Clarendon an no ave no weh fi go. No place or no one fi run to. 

More while mi just buss two cry an get up an do road cause weh mi ago do? Mi cya just give up so cause mi know betta deh out deh fi mi. From dat night wen di three a dem females weh know to God seh mi neva do a ting, is like mi wah give up. Me, I am di bad guy, me always portray di habits an attitude of a bad girl. Mi just cya believe seh even mi own parents turn dem back pan mi afta all mi explain. Mi all send out di recording wid dem a talk an is like dat no mek up fi di fact seh dem a liad. Mi just a gwan buss a sweat pan dis likkle job fi provide fi mi self right now an pay di doctor bills fi Kelly, but mi ave a plan. 

Right now mi stress out cause mi period no come two weeks now an mi no know weh fi do. Mi affi a hold di faith seh mi no pregnant cause mi cya go to Michael wid dat. Him no wah see mi none tall. Him block mi pan Whatsapp an now a him an Taty a talk. Dem in a full blown relationship because every party dem go dem match out. Mi buy a pregnancy test an hide it di one place mi know mum nah go look. Mi soon tek di test but mi just need di strength. Di only person mi tell bout it a Jada an a only because mi vomit up har sheets three times since week so it kinda obvious. Mi just constantly anxious an always feel tired, is like mi a carry concrete bucket pan mi shoulder dem due to how dem tense. Lawd gimmie strength.

"Tanks mumz." Mi tek di $200 JMD tip put ina mi pocket afta a lady collect har bag. Mi work ina dis wholesale from Monday to Friday at 8:30am to 6pm. Den pan Sundays now mi sell ice-cream an popsicle while mi tek hair appointments fi di weekend.

"Alissia? Wol on pan dis yah fi mi. A soon come back come collect di bags." One a mi favorite customer call mi. Anytime him come fi get him bags packed him always slide mi di receipt wid a $600 an sometimes a $800. Him impatient bad but yuh see because mi glad fi get a ting, mi just sort him out. More while mi a pack all nine big bag a groceries an household items fi him den him vehicle just reverse an him collect dem. 

By di time mi finish an go home mi foot dem feel like dem ago drop off. Mi ease out mi foot dem out a di shoes an flop dung ina di couch. Di house silent an mi know seh mummy dem no deh here or there woulda be no peace an quiet. She gone down a daddy a di house we used to live seh she a carry back har husband. Wen mi did play di recording wid Kelly mum skin catch a fire an immediately she pack bag an gone. Mark still no come back from grandma so mi alone ago deh here tonight. Mi turn on di T.V an a news a read so mi go mek someting fi eat weh no tek too long. 

Riiing

Riiing

"Hello?" Mi sit down a eat di mac n cheese wid sausage an lemonade.