TRIGGER WARNING! IF YOU ARE EASILY TRIGGERED READ AT YOUR OWN RISK.
Happy saturday
__________________________________________________________________
"Who Dontae? Me? Me of all people? Nope, dat nah go happen. You will neva live fi see dat happen." Mi a laugh afta him an afta mi self to.
"How yuh mean?"
"Mi weh no ave a good school record or noting. First of all mi get good passes fi CSEC yes but mi grades from dis year kinda gawn downhill since mi stop go fi a while." Dontae a try force mi fi apply fi dis grant fi needy students. It worth $150 000 an mi sure as book seh dem nah gi mi.
Mi a try ketch up wid di school work dem weh mi ave fi send in before midnight. Is whole heap a tings mi ave fi do an considering mi did get lef out a some group work di teacher dem gi mi a bly afta mi beg out mi heart to dem. Right now mi ave a whole four project fi complete by mi self fi mek up di group grades but mi no worry.
"At di end a di day yuh neva know yuh just might surprised how yuh luck turn out. It betta yuh try dan not at all. Anyways mi affi go weh now so do yuh work." Dontae hang up di 2hour 56minute call an mi continue do mi work.
If tired was a person it would a be mi. Di whole night mi sidung up a try study an do school work to. Exam might look far but it soon come an by dat deh time mi ago be ready. Mi look pan di time an a 4:50am now so mi just lean back an sleep pan all a di paper an di text book dem.
___________
"Poochie a time fi gwan a school." Mi hear mummy seh an mi look pan di time. A soon 8:00 an mi jump up an rush go look bout mi self.
"Mummy weh mi umbrella cause it look like rain ago fall?" Mi drag off di tie head an fling it pan di chair.
"Come quick cause see di taxi hear." Mummy stretch di umbrella give mi an mi run go ina di car.
Wen mi deh a school today mi hang out whole day wid mi friends an ave a good time. A whole heap a tings tempt mi fi retaliate but mi shake mi head an walk weh each an every time. Some a di people dem weh a try mi a some likkle wanna be so mi just push di thoughts aside an try fi remain pan di dean an mi teacher dem good side.
After school mi study an ina di late evening mi decide fi follow mummy go a prayer meeting. Right now mi no ave a ting fi do an mi brain tired so mi just say yes. Is a whole heap a people come out an mi just go ova di corner an cozy up mi self. Mi feel like mi wah piss but mi ignore di feeling. Di congregation a sing a prayer chorus an get ready fi worship.
"Sista Poochie a beg you close di door deh di breeze a blow hard." Sista Patt seh. Mi roll mi yeye an get up go close di door. Den mi sit back down.
Knock!
Knock!
Knock!
Boom!
Boom!
Boom!
"A who a boom dung di door so?" Mi ease up an go swing open di door in anger.
"Poochie." Mi look pan Jada an mi heart sink wen mi see har. "Help mi...please help mi." She sound like she ago cry.
Jada bottom lip buss an a bleed, unda har yeye dem swell an har neck an har han dem a drip ina blood. Di pink sundress soak ina blood up a har chest paat an har hair ave in blood stain to. She stumble an come drop ina mi hands.
"Mi kill him." She whisper an heng on pan mi in fear. "Mi kill him!" She scream out an staat bawl out hell.
"Wah happen Jada?"
"No!" She a scream dah type a no deh weh mean mi cya seh noting.
"Jada tell mi."
"Noooo!" Mi shut di door so dats nobody no see har lay dung flat pan har back a sob. Mi tek one more look pan har.
Knock
Knock
Knock
Mi look pan Jada an halp har go hide ina wah corner. A wonder if a somebody see she a come ina di house an tink she injured. Mi rush back ova to di door an think twice if mi fi open it. Mi look pan Jada an har face turn to di wall an she a breathe har. As soon as mi open di door somebody kick mi back so hard ina mi stomach dats mi affi couch fi catch bret. Mi look up an see three black men shoes infront a mi. Mi ease up mi head fi look an di guy drag mi upright by mi hair.
"Mi done wid you. Dis a time fi payback." Di voice sound like fi Ryan but him face ave on mask.
Mi look ova to weh Jada deh ina di same positon an all of a sudden har head spin roun slowly. Mi nearly dead wen mi see di big ole dutty grin pan har face. She ease up an use di sundress wipe from unda har yeye dem an har mout den mi see a clear face.
"Dats it Netfilx need fi hire mi." She laugh. "Sorry fi do dis to you."
"Pin har up." Mi hear Ryan seh den di next two man dem garb mi hands an pin mi gainst di wall.
"No." Mi see Ryan a pull him belt. "Jada please no." Mi see she shrug an step outside.
Mi look dung pan mi skirt an see it soak ina blood. Ryan stop weh him a do an look pan mi in horror. Di next two guy dem let go off a mi an step back. Jada almost lock di door an she hold har belly ina pain.
"Di baby. Ryan." She seh an Ryan an di next man dem run fi go hold har hand an lift har up.
As dem turn dem back di door gi a hard slam an mi black out.
"Ayyyyyyyye!" Mi fly up an open mi yey dem.
"Yuh alright Pooochie?" Sista Patt seh. "Wait Poochie cuh deh, lawd God." She drag mi back down fi sit.
"A wah?" Mi seh an wipe di sweat off a mi forehead.
"Tek mi sweater an gwan go clean up yuh self." Mi tek di black sweater from Sista Patt an skeptically go open di church door. Mi run go ina di bathroom an two girl in deh a giggle. Mi go ina one a di stalls an look pan mi beige skirt. It soak a period an mi tek it off. Jesus christ one likkle dream shock mi so till mi period finally decide fi come. Mi ask one a di girl dem if dem ave no Stayfree an mi get one. Mi try clean up as much as possible wen dem leff an go in a church wid di sweater an tell mum seh mi ready.
"Mi ago mek you a cup a tea." Mummy dash dung har shoes an lock up di house wen we reach in.
As mi tek a shower mi just a remember di dream. A wah kinda ting dat? Mi stress an from mi tell mum she say not even mi yeye lash no fi go near dem deh people. Mum threaten mi so till mi all get fraid a har cause she hell bent pan di fact seh mi not going back no weh near Jada. Not dat it was eva mi intention any ways. Mi hide Sista Patt sweater ina di wash basket cause mi ago wash an return it tomorrow.
"Hear." She hand mi do cup a mint tea an mi sup it an watch a calming movie.
Daddy come sit dung beside mi an we chat fi di longest while. Him talk bout how a man reputation take foreva fi build an how easy it be fi ruin. Him always on di edge fi tell mi wah happen mek Marva dem could a blackmail him but him always hold back. Mum not even gi much energy to di whole Marva ting. She forgive daddy but di tension is real round here. Relieved seh mi alright now mi go ina mi room fi go study although mi ina likkle menstrual pain. Mi open di scholarship an grant website den mi apply fi di $150 000 grant.
"Betta fi try dan none at all. Mi affi mek it out a dis place." Mi seh an work hard fi di rest a di night.
YOU ARE READING
Bad Gyal Poochie
Teen FictionWRITTEN IN JAMAICAN PATIOS/PATWAH "Yow yow mic check 1..2..3...yes di mic good enough cuz mi want unu hear dis loud an clear. Dis yah story affi go be a well draff up package bout I bad gyal Poochie. My lifestyle no normal an no bady cyah tep ina my...
