As mi come out a di taxi from school mi stand up an look pan mi yaad gate. Mi honestly no wah go inside due to how mi know seh a stress a mi ears as mi open di door. A 7:00pm now an mi just a reach in because mi stop down a Michael from afta 4:00pm. Di house not even homey cause from wah day yah mummy a tek out har stress pan mi because she find out seh daddy a cheat. In all honesty mi did alright wid dem visiting relationship, but mum run go ina church cause she want ring. Now she realize seh marriage a no just weh she tink. All Marva did a try warn har from morning but she no listen. Apparently me an Mark have a two year old sister by a next woman but she go a Merica go have har.
Zooooom!
Zooooom!
Mi jump further up ina di embankment wen a White Honda Civic come to a screech a mi foot. Di window dem roll down an mi see seh a Ryan. As mi glance further to di right mi see seh is a next girl ina di front seat.
"Wah gwan Poochie?" Ryan ask mi.
Mi no ansa.
"Yuh good?"
Mi stand up an look pan him.
"Yuh see how life work out good wen yuh mind yuh owna business?" Him stretch a likkle brown paper bag give mi.
"Weh dis for?" Mi feel di weight a di bag an it light.
"Gi yuh likkle bestfriend tomorrow afta school an tell har seh she must come to mi." Ryan turn on di song weh Quada sing name Problem.
"Mi no know weh she deh enuh mi an har no cha..." My yute turn up di song till di base a jerk out mi heart an speed off.
As mi step ina di house a mummy mi see she sit dung a watch TV. Mi tell har evenin an all now she no fart pan mi. Mi go ina kitchen an no food no put dung fi mi.
"Mummy yuh no cook?" Mi go tek off mi shoes an sit down beside har.
She turn off di TV an turn to mi. "Weh you a come from?"
"School but mi did stop down di road fi talk to some friends." Mi seh.
"Yuh mean yuh stop mi go link di likkle bwoy dung di road?"
"Weh you a talk bout mummy?" Afta mi seh dat she stand up an gimmie one box.
"Yuh feel yuh big now? Yuh feel like cause you a tek man you can walk in any hours now?" She use har gun finga dem push mi forehead.
"Mum.." She grab di paper bag weh Ryan gimmie out a mi hand an look in deh.
"Jesuuuus!" Mummy sit dung an hold har head. "My God!" She look like she ready fi bawl.
"A wah?" Mi a reach fi di bag an she no give mi.
"Poochie come. Walk wid mi deh." Mum run go ina di room an fling open mi suitcase. "Why Poochie? Why?" She a grab mi clothes an fling ina di suitcase.
"Mummuy weh mi do dats you a pack mi clothes?" Mi staat bawl now cause mi no know weh mi do, but at di same time mi know weh mi do, but at di same time mi a wonder if she know weh mi do. Yuh get weh mi a seh?
"Mummy! Mummy!" Mi a try stop har but she a move too quick.
"Mummy weh yah do!" Mi see Mark come in a try help mi to.
Mum stop an turn har back to we an mi hear har a draw up har nose. She turn to mi an mi see har a cry. So me a cry, she a cry an Mark a bawl.
"Poochie mi ago ask yuh something an be honest wid mi." She wipe har eyes. "Yah breed?" Mi shock as to why she dah assume dat. Same time mi heart staat beat fast so till mi staat tremble.
"No why yuh dah ask mi dat?"
Mi see she pull out a pregnancy test an mi drop pan di floor an staat cry. Not because mi no sure if mi pregnant but because mi suddenly get di feeling seh Jada might be breeding. Mummy walk ova to me an hold out di stick.
"Yah breed? Last time mi a ask you."
"No. A Ryan..gi..me...fi gi Jada..a..and mi no..no want har fi ..be.." Di way how mi a cry mum affi just hug mi up.
By time me finish she grab Mark to an hug di two a we. We hear di door pull an know seh a daddy just a come in from work. Mummy help mi pack out back mi clothes an just a lecture mi seh mi must keep mi head straight cause there is a better life ahead mi just affi wait an fight through it.
"Mi ago mek something fi you eat. By time yuh done bathe mi carry it come."
As mi stand up ina di shower di water just a run pan mi back but mi no feel a ting. Wen mi finish mi go ina mi room an lock di door fi a good hour den mi get dressed fi go eat di delicious food weh mummy mek. Daddy just a itch up pan har ina di kitchen so till she cya do weh she supposed to in peace. Him a try friend har up fi two weeks now afta him baby mother call an a cuss seh har daughter need fi come spend time wid har daddy.
Ping
Ping
Mi open mi Whatsapp and see a whole heap a people a text mi. All a dem a ask mi if a true seh So-An-So pregnant. Mi lock di phone an just eat mi dinner. Mi no want a soul ask mi noting. If So-An-So refer to Jada den dem need fi go ask she not me.
______________
"Poochie mi no know a weh Ryan a give yuh dat fah come gimmie." She sit dung a di edge a di bed a text.
"Well here." Mi dash it pan di bed.
"Yuh know a who him fi tek it an give? Kelly."
Mi turn an go sit down beside har.
"Yes girl Kelly five months or so pregnant. Everybody a talk bout how dem neva know. She no look it enuh, she big ina body but mi neva notice har belly yet." Jada show mi di pics weh Kelly post up on har Instagram.
There is a long paragraph weh she write an most a it repetitive but congrats to she. A wonder a who a di baby daddy cause if she did ave a man mi dah know. Either way mi glad Jada no go breed fi dah likkle wild jackass deh. Mi not even ago tell har bout di gyal weh did ina di car wid Ryan. She affi learn di hard way. Jada a use har phone fi look pan some other tings so mi use mine fi go back pan Kelly page. Mi just a look how di picture dem turn out nice an simple.
"Di picture dem turn out nice man." Mi mumble.
Mi go pan har story an mi see she post a pic wen she lay down ina bed but a no dat a bug mi. Mi see like she lay down wid somebody. Mi try fi get a betta look an mi see seh di guy foot dem look like fi Michael. Mi staat slap up Jada fi look real quick.
"Dem here no look like Michael foot?" Jada look pan mi like mi crazy.
"How mi fi know dat? Yuh mad enuh, no must so har man foot look."
"Jada mi a tell you. Dem deh look like Michael foot cause nobody toe dem no ugly so." She laugh an tell mi fi stop give mi self head ache over foolishness.
As mi continue scroll pan har story mi see she tag Michael IG page wid a kissy face emoji bout 'Baby Daddy and Baby Mama'. It look like she forget seh mi did ina har close friends. Mi screenshot di picture an two seconds afta, di story get deleted off a har page. Fi di whole time mi just create a Temper tantrum.
"It look like a di two a we a yam head now. No worry it no all dat bad." Afta Jada seh dat mi run out a di house fi go a Michael yaad.
Mi want fi know a wah gwan. Mi feel fi mi lighter ina mi back pocket an tek it out. How Kelly fi do mi dat? Afta mi an she a friend from how long. Worse of all how Michael fi just do dat to mi? A dem tings here mi no like enuh. Wen mi finally reach, di house lock up an nobody no deh home. Mi just affi go home. As mi step ina di house a mummy dat again a mek noise pan phone wid Marva. She a cuss daddy bout how him no know how fi be loyal. Marva go tell har say Kelly pregnant an she no know a who a di fada. From dat mummy just a gimmie side yeye an a mek drop talk. A wonder if a know Ryan di know seh a Michael get Kelly pregnant mek him gi mi di stick an a try trick mi? Wait until I see dem two idiot deh, Just wait.
YOU ARE READING
Bad Gyal Poochie
Teen FictionWRITTEN IN JAMAICAN PATIOS/PATWAH "Yow yow mic check 1..2..3...yes di mic good enough cuz mi want unu hear dis loud an clear. Dis yah story affi go be a well draff up package bout I bad gyal Poochie. My lifestyle no normal an no bady cyah tep ina my...
