Bad Gyal Poochie

Chapter 20: Mending Love

Good Morning. I decided to update early today. Just a tip, when you're almost at the end of this chapter in the story, it hits different when you've actually listened to the song above. 

____________________________________________________________________________

A 7:30 a night an di people dem gone home weh did come. We affi help clean up di yaad afterwards which wasn't a problem till Ashley dem staat talk bout go tek a swim. 

"Poochie di pool clean enuh," Ashley run out ina har bathing suit an mi annoyed because a she said one tell mi no fi bring none.  

"My girl how yuh say di pool dirty?" Mi stand up ina mi joggers a look pan she, Jada an Abby a swim round.

"No worry yuh head come borrow one a mine." Ashley step out an drag mi go ina har room. Di place pink till mi affi wonder if a barbie live in deh. She open har closet an tek out a new pink and yellow two piece swim suit. 

"Alright come out mek mi change." Ashley go back outside an mi change. 

Di likkle dutty braids a scratch mi so mi tie it ina wah bun. As mi step off a di stair case a Kelly mi see a come out a di room weh James an somebody share. She look annoyed like she ready fi cuss. 

"Kelly yuh nah go swim out a di pool?" Mi ask har.

"No mi ago find someting eat cause mi hungry." She go upstairs weh mi hear Marva an mummy dem a pop big laugh.

One ting wid Kelly she hungry belly just like Marva. No amount a food cya full fi dem gut. Dem gut come in like a endless pit. No wonder Marva cya keep no man lolllll. Dem too hard fi feed no jokes. As mi step outside mi see Michael a walk fi go back ina him room. Him catch a glimpse den him go back inside. Mi irritated cause him shoulda come ova here so. 

"Poochie weh yuh plan fi do fi yuh birthday?" Jada ask mi.

"Noting." Mi seh to har. Birthdays always depressing an boring. If mi do plan a likkle someting a year time at di end a di day mi end up bawl because someting neva go right. Mi think mi ago save mi self from depression dis year.

'Yuh can keep a party enuh? Like a big bashment adult party." Abby a float an tell mi some ideas. 

"Wen mi get a raise a di likkle job weh mi ave, den mi might consider dat. Right now mi a consider fi go do sixth form." Mi sit down pan di edge a di pool wid mi foot a dangle ina di wata. 

"You really a go back a school Poochie? Yuh no tired? A just weh day yuh pass 6 subject." Abby seh. 

"Mi no know bout nobody else but me nah set foot back pan no school campus. Mi done wid book cause dem deh ting deh pressuring like wah," Jada seh an come sit dung beside mi. 

"Well me wah go back cause mi wah futher mi self," Mi ansa back. 

"Wah more furthering yuh want so?" Wen mi look a Kelly we see a walk towards we a eat KFC. 

"Lawd God Kelly no man. Di food weh dem cook neva enough. Weh yuh get KFC?" Mi ask har.

"Dean an Tim did go drive out di road so mi beg dem buy it fi mi." She a ansa we but she just a stuff har face wid di fries like is a competition. 

We swim around an chat fi a next half our den we go inside an get ready fi bed. Mi get a text from Michael say mi must meet him a di pool 10:00pm. 

"Poochie pack Mark bag fi mi den an gwan a yuh bed," Mum say. 

It take me forever fi find di likkle bwoy tings dem. Is like him deliberately fling everyting all ova di room fi mi cya find dem. Mi honestly no ave time fi dis. Mi pack weh mi find den mi go ina di room mi sleep.