Bad Gyal Poochie

Chapter 18: Forgiveness

Feedback feedback I like the feedback. Let's play a game it's called Feedback.

Thanks loves.

___________________________________________________________

"Yah Hallelujah!" Pastor wipe him eyebrows. "Let the church say hallelujah!" 

"Hallelujah!" Di congregation shout." 

"Let the people of God seh Hallelujah!" pastor jump up an down.

"Hallelujah!" Di people shout an wave dem hand in praise. 

"Put yuh hands together for God." Di entire congregation clap loud loud an stand up. "Put yuh hands together for Jesus."

"Amen amen." 

Pastor decide fi preach bout forgiveness today wen mi no feel so forgiving. Of all di Sunday dem wen mi decide fi no come church, him decide fi talk bout forgiveness today. 

"Let go. Let go in the mighty name a God! I know nuff a you down there a look pan mi an a think ina unu head, who him? A who him though God? Dis man a tell mi forgive an let go. Let go? After all him do to me. After all dat woman say bout mi. After all di lies an tormenting dem cause ina mi life. After dem mash up mi marriage an tek weh mi husband. After dem violate mi ina di worst way. After dem betray mi wen mi do di best fi dem. Me? Mi must forgive? Ha haaay *speaks in tongues."

 Pastor come down off di podium an walk through di church. 

"Mathew 6 verse 14-15 says? Sista Patt please read for mi again please." Pastor go back up the d\podium.

"For if ye forgive men their trespasses, your heavenly Father will also forgive you." Sista Pat a read slowly. 

"Amen amen." Di church say.

"Mum mi ago use di bathroom." Mi say an get up fi go out di back door. Wen mi finish mi go ova di mango tree cause nobody no outside. 

Likkle bit afta mi hear somebody heels a click clack fast a run towards mi. Wen mi tun round a Jada mi see in a tight blue dress an black pumps. Mi turn mi back to har an look back out di road. 

"Poochie?" She a call wen she reach up to mi. "Poochie look here please." It sound like she a plead fi mi turn roun so mi slowly spin back to har. 

Mi look pan har annoyed an she just staat cry living yeye wata. Wen mi say cry mi no mean couple drop a tears fall a grung mi mean nose a run already an cow crying. Mi feel a way an mi know seh a only because pastor hit a nerve bout di whole forgiveness ting mek mi feel so sentimental. 

"Poochie really mi sorry. Mi should a believe yuh wen yuh say a never you report him. Instead mi just act like a real tough head an believe everyting weh Ryan tell mi. Di worst part is mi not even did mek yuh get fi prove seh a no you. Now look how we many many years of friendship just mash up so. Mi know you a no di type fi just forgive an forget but mi just wah seh mi need yuh fi pardon mi foolishness. Weh mi do was very selfish an inconsiderate an mi swear if mi could a tek it back mi dah do it." Is like she seh everting ina one breath an mi still can't bring mi self fi say one word. 

Jada sigh. 

"Poochie mi sorry fi post up di picture an di videos dem an now you can't go out a night again because now Tara a watch you 24/7."

"Well dat mi can actually say thanks fah because it actually work out fi di best." In all honesty mi miss di night party dem, but lately mi actually get time fi do mi school work. Now mi spend more time an fix mi weak areas ina di different subjects which is every one a dem. 

"Oh, Good. Ashley admit to mi a di party seh a she report Ryan cause she only want di best fi mi an you. Mi fight har off cause mi neva understand but den she come a mi yaad weh day yah an show mi di pree. Mi tell Ryan seh mi an him lef yesterday an him react ina di worst way. Mi no know weh him dah do if mi neva run go in an lock up di house cause him did a gwan real bad." Afta she seh dat mi try fi keep mi cool but a couldn't help but raise mi eye brow dem.