Bad Gyal Poochie

Chapter 32: Bar Brawl

Hey ya'll. Do you know anyone who's great at creating story covers? If so comment their @  here and let me know.

_______________________________________________________________________________

"Hello?" Mi ansa di phone. 

"You a go up a di lounge tomorrow?" Ashley call an a ask mi. 

"Yuh know seh mi no sure though cause mi ave one more hair fi go do." Mi ansa back. 

"My girl exam literally just done an yuh still busy, a wah happen to you? You no know how fi ave fun again? You cya just a ova work you self an nah ave no fun." Ashley seh. 

"Look here mi need money right now fi sort out a business so mi nah go leave it fi party." 

"Girl bye just mek sure seh yuh meet mi up a di Lounge ina di evening mi ave a surprise fi you, an no mek mi affi gi it weh." Ashley hang up ina mi ears. 

"Dis gyal." Mi put back mi phone ina mi bag an continue braid di hair mi did a do. 

"Poochie a one ting, you do hair nice but due to how it tight mi affi go sleep pan cushion tonight cause mi pillow dem new." Mi coworker sista laugh an look pan har hair ina di mirror weh soon done. 

"Bye time mi done yuh nah go care bout di tightness due to how it ago sell off," Mi seh. 

"Mek yuh no open hair shop? Yuh know seh mi ave couple hot gyal fren weh no keep in hairstyle one month?" Sashay seh. 

"Fi real?" Mi ask har. 

"Yeah man yuh just gimmie yuh numba an mi wi ping yuh. Afta dem see dis yah style weh yuh do dem going wah call you trust mi." 

"Alrite." Mi tek har phone an type in mi numba. 

________________________

_________

"Den Poochie weh you a put on di Brazilian wig fah?" Mummy ask mi. 

"Noting mi just a fix up fi go look fi Ashley."

"A no up a di Lounge you a go?" She ask an a eat di ice-cream. 

"Nah sah but you know seh a Sunday evenin so mi cya walk pan road look homeless like ina di week." Mi tek di Moose an rub up mi hair.

"Oh. Yuh ave no $6000 pan you weh you nah use?" She draw likkle closer to di dresser. 

"No sah mi spend it buy two gift fi mi twin friend dem a did dem birthday yesterday." Mi look through di mirror pan mum a stroll ina mi room. She grab up mi  purse off a mi pillow an look in deh. 

"So Poochie yuh spend off all a yuh pay pan gift fi friend? Yuh know seh yah big fool though? Weh yah get money pay fare go a work a mawnin?" She fling it back pan di bed. "$300 can pay yuh fare go a wok? Mi neva see dis yet." 

"Mi ago beg Ashley a ting till mi get pay man." Mi drag on mi likkle navy blue sneakers an whine go up ina di white shorts. 

"No wear dat deh cream blouse, put on dis." Mummy go ina mi closet an tek out a white off di shoulder blouse. 

"Alright." Mi tek it from har an try it on an it look real nice. 

"Tara look yah!" Mi hear daddy a call mummy. 

As soon as she gone mi mek sure run go move mi money from unda di mattress an hide it some weh else. As mi gone she ago search cause a dat she eva do. One ting wid Jamaican parents yuh can neva lend dem money an get it back. Mummy owe mi a tun load a money an every time mi ask bout it is a back hand mi get. Mi can neva lend har a dime an expect it back. Di last time mi lend har four grand from weh day yah an a chop mi get chop cause mi nah see dat back. Right now fee fi pay an a rack mi a rack mi brain but mi soon sort it out man. Mi walk out di back door so daddy cya see mi an run through di gate wen him go inside. Mi feel di cool Sunday breeze pan mi neck an mi go stand up a di corner shop an wait fi Ashley come in.