Bad Gyal Poochie

Chapter 33: A Break

Hey loves here's a chapter, hope you like it. Don't forget to subscibe to my Youtube channel, I could really really use the support. Thank you.

__________________________________________________________________________

"Yes Miss. A so she a say." Mi walk towards Mavis a tell mum someting outside. "She seh she see wen di car zoom pass an reverse an lick har....How yuh mean den nuh tru....A James she seh, an dem go a police station to...Di whole community a seh how Marva wicked, all a long a James a di fada to baxide." 

Mi drag on mi push in toe slippers an go ova to mum wid har back turn. Look like she gone back go chat up chat up to Mavis now. Wat a way she did a move like she ago forever keep malice. 

"Mum?" Mi seh.

"Poochie yuh no hear?" Mummy seh. 

"Wah?"

"DNA show seh a James a di fada." Mummy look cross di road pan Michael an Taty a walk come ina we yaad.

"Aaaye? But wat is dis? At least now dem can hop off a mi fada name cause mi no know weh James mada an him two sista dem did a do." Mi seh an everybody turn fi look pan di most outstanding young couple ina di community. 

"Evenin deh," Michael seh. "Mi hear seh unu sell ice cream ova yah." 

"A Poochie sell it." Mavis jump in. 

Michael look pan mi like him a contemplate if him fi ask mi or not. Him hug on tighter pan Taty an kiss har pan har cheek an a side yeye mi. Taty slap him fi stop it an she just a skin off har teet. Mavis an mummy gawn back to dem conversation an mi affi a look pan di couple a giggle an a behave strong six feet from me.

"Poochie wah flava yuh got cause mi a melt as yuh see mi yah?" Taty finally ask mi. 

"Rum and rasin, coffee rum an chocolate," Mi smile cause even though mi no like har mi need di sale. Mi know how mi college tuition ago pay but mi just need fi get enough money fi cover mi living, traveling an necessities. 

"Alright gimmie two cup chocolate..." Taty start seh.

"A who you a buy chocolate fah? Couldn't be mi." Michael interrupt har. 

"A who a order noting fi you? A mi self mi a buy dem fah. Anyways Poochie yuh ave no ice-cream cake lef?"

"Yeah but dem soon done. Mi ago share out an come." Dem follow mi up to di front door an mi bring di ice-cream dem come wid a ice-cream cake. 

"Yuh ave no more a di cake?" Michael ask mi as him a taste Taty chocolate ice-cream. 

"Yeah." Mi seh as mi a try fi ignore di boogu weh deh pan him nose bridge. Taty no see dat? 

"Carry two more come gimmie right now." Michael demand mi. 

"Alright but wipe di boogu off a yuh nose an mine it drop ina di cream." Him look pan mi an mi keep a straight face but Taty a scrunch up har face wen him use him hand pick it off. Wen mi come back wid di tings di two a dem a bicker. 

"How much dat?" Taty ask an mi tell har di price an dem pay mi mi money. 

"Alright only two more ice-cream cake lef an two box a cream done left one..." Mi chat to mi self an go fi mi book weh mi record mi sales an mi purchases an work out how mi money go. "Yes just $10, 000 more an mi reach mi goal." 

"Which goal?" Mummy walk in an mi lock di book. 

"Fi buy mi self a pair a Bridget." Mi go put up mi tings. 

"Yuh lucky, yuh try save dah money deh fi wen you a go college cause mi no know wah mek you choose fi go a dat deh dere one. Den you couldn't go a one weh cheaper Poochie my God man?" Mi no ansa mum as she ramble on bout price an cost a living. Mi a pree how mi ago collect mi partner draw ina di 1 o' clock an go bank it.