Bad Gyal Poochie

Chapter 26: Gang Fight

This is part 2/3. There are existing errors at present but don't worry I'll read and edit later on. 

______________________________________________________________________________

From mi hear how Jada brandish mi business mi just stop talk to har completely. Mi call har di night afta Michael accuse mi of doing abortion an my girl ago spin di blame pan me. She ago seh mi should a tell har seh mi no pregnant. Mi just help har stop talk to mi in di nicest way. Mi don't go back down a har house mi block har pan Whatsapp an dash weh mi chip an get a new number. Mi did see people a chat bout woman weh do abortion pan dem story an mi know seh a mi dem a drop words for. In all honesty it's nobody's business to judge anyone who do anyting wid dem life. Mi no ina di mix up so mi just ensure seh a few people ave mi number weh mi know nah go give it out. 

Mi just a work hard fi mek it right now. Ashley an Abby a push mi fi go back a school an try catch up but mi just can't. If mi go back a school mi ago lose di work an mi ave bills fi pay. Mi feel seh dat gyal Kelly just a nyam out mi money enuh because she eva a come bout doctor money. Who di hell affi go a doctor regardless a wah happen twice every week? But mi nah wild har man mi just a wol out. She soon ave baby so mi just a wol out. Di only people mi talk to bout how mi feel a Ashley, Abby an Dontae. Dem deh three people actually motivate mi fi do mi best. No matter wah time a night it be as mi call Abby an Ashley dem ready fi talk. Dem know seh mi neva pregnant an mi show dem di test but all now mi period no come. Mi feel like mi need fi go doctor now man. Mi even get scared at one point dats mi buy two more test but dem still seh negative. Mi ago mek it enuh, mi just affi focus an keep on reassure mi self. 

"Ah Poochie lawd God man, it too tight." Mi hear Paulette seh. 

"Hush mi neva realize seh mi a do it tight." Mi pull out di braid an start ova. 

"A so she one gwan Mommy. Dats why mi nah mek she braid my hair again," Abby seh an she come sit dung pan di verandah a eat fries. 

"Abby weh yuh get fries at dis hours?" Mi seh an she glance pan mi. 

"Work." She seh. 

"Yuh nah stop tek out di people dem fries a di workplace gyal," Paulette elbow har an she jump. 

"A dash dem did a dash it weh so mi an di next girl dem scoop out nuff an dash weh di rest." Abby laugh an sit back down. 

"Gimmie some." Paulette grab di paper bag a fries an staat eat. 

"Watch yah." Abby seh den she go fi some juice. 

"Poochie a how much leave?" Paulette ask mi. 

"Dat look like a bout two more don't Poochie?" Abby belch an a laugh. 

"How yuh tan so? Yuh no cova mouth?" Mi scrunch up mi nose. "A bout six leff mi soon done Paulette." 

"A long time mi sit dung enuh. Mek mi go piss." She ease up go ina di bathroom. 

"How yah reach home?" Abby ask mi. 

"Mi ago call Rick cause him seh him will pick mi up." Mi tek out mi phone an call Rick while mi eat some a Jada fries. Dis fast food restaurant weh she work fries dem always nice. 

"Yow yow?" Mi hear Rick seh pan di line. 

"You can come fi me ina di next ten minute hear?" Mi shout in di phone. 

"Wah?" Di loud music ina di car a play so him cya hear mi. 

"Mi seh come fi mi now cause mi done di hair."

"Poochie weh yuh deh?" Rick seh. 

"Rick memba seh a you bring mi dung a Becka Hill fi do Paulette hair." Mi shout again.