Bad Gyal Poochie

Chapter 6: Late Night Caller

HEY SO THIS IS THE OTHER CHAPTER. HOPE YOU HAVE FUN READING IT. 

_____________________________________________

Di TV turn on an a Power a gwan but mi just deh pan mi phone a text some a mi fren dem from school. Mi watch season 3 already so mi no need watch it again a just background noise. Place too quiet man.

Mi mek sure go ina mummy room cause she well ave di queen size bed wid di comforter an di flat screen to har self. When mum deh here mi cyah come in yah so no time.

Knock

Knock

Knock

A who a knock pan mi door dem yah hours a night? Mek mi mek sure grab di heavy metal frying pot.

Knock

Knock

Mi tip toe go look a di window an mi realize seh a Michael. Weh him want now? Mi no ina di mood fi talk to him right now enuh.

"Weh yuh want?" Mi put dung di pot fi no mek him see it an step outside den lock di door.

"Yuh cyah invite mi in?" Him seh.

"No fi wah?" Mi seh back.

"Ntn really. Just a wonder if you memba wah happen di last time wid Mavis." Same time mi look ova Mavis an di house still dark. Only the outside light turn on.

"Nobody no ova deh." Mi seh annoyed now.

"Oh. Yuh Know seh a.."

"Bwoy tun on di light dem ina di house." Mi hear loud mouth Faas Mavis seh. Har son no gawn back weh him a come from yet? Think him dah reach back a Ochi by now. 

"Michael gwan nung lata, one neda time mi an you talk." Mi spin fast fi go ina di house but him wol on pan mi han an drag mi back outta door.

"If a Mavis yuh fraid ago see we den invite mi inside." Him wol on pan mi waist.

"No mom woulda kill me thirty time just gawn nuh." Same time mi see di light tun on ina di window an di curtain start shift. Mi gi Michael a wheel ina di house essi den a chuck in deh to an lock di door. Do God no mek dah woman deh see noting.

"Yuh see weh yuh cause." Mi stan up an look pan him a laugh.

"If you did invite mi in long time we wouldn't waste so much time."

"Come round a back door." Mi drag him tru di house go a we back door." Same as mi creak di door open an peep out a Mavis dat a tek up two draws off a di line a look ova yah. Rahtid man. Mi see seh mi neva tek up two sheet off a di line an walk go fi dem. Mi no want she get suspicious.

"Wol evening an yuh dis a tek up di sheet dem Poochie dem muss cold. It beta yuh lef dem pan di line till sun come up a mawnin." Mi just laugh wid her cause me no know weh she a laugh fa.

"Yuh no different off a mi cause yuh dis a tek up yuh draws dem offa line. Dem muss cold, it betta yuh lef dem. Yuh nah no more? Well if yuh nah no more mi understand cause time hard." Fass Mavis gimmie a yeye deh mi sure mi ago dead wen mum come Sunday mawnin.

Faas Mavis just pin back di red and blue bingo baggie dem pan di line. She tan up wid har han dem pan har hip.

"Likkle gyal yuh nah no mannas enuh. But I going live fi see di day yuh ma gi you one bax ina you mouth." Mummy we dweet enuh, but no infront a people..maybe.

"Weh mi do?" Michael deh a di doorway a hide an a laugh.

"Tan deh ask mi weh you do. Tan deh man tan deh." She go in an lock har door.