Bad Gyal Poochie

Chapter 5: War Wagon

HERE HE HERE HE. NEXT CHAPTER IS HERE. HOW IS YOU SUMMER SO FAR?
___________________________________________

Mi dis drop dung mi self ina di seat a KFC an pat mi likkle round gut. Mi gut full yah, all feel like mi wah faint. Mi greedy don't? Yeah mi know lef mi alone wid yuh hungry belly self.

Mi soon affi gawn back an work till di people dem seh a time fi go a mi yaad. Mi grab di purse and walk out. Di way mi a walk mi look like when one fowl dis done nyam half bag a chicken feeding. People dis a look pan mi like dem neva yet see somebady weh dem belly full. Kmt

By di time mi done mek couple sale mi ready fi go a mi yaad. A slowly tek mi time crawl go up a di bus park. Mi gut still full.

When mi ketch a di railing ina di bus park mi dis sidung an same time a bus roll up. Slowly mi crawl come dung an go ina di vehicle. So dis girl come in deh side a mi now wid a Jansports well stuff up, wah overnight bag, one basket shape bag stuff big to, an a likkle red Matey Bag.

"My girl yuh know seh yuh affi go behind di driver wid all a dat tho?" Mi seh to har an she don't ansa. She force come in a di first middle seat beside mi.

"Mi sidung any weh cuz a mi fare mi a pay." If she tink mi a tek no squeeze today yah. Worse like how mi uneasy.

"Try mek sure seh yuh wol all a dem ina yuh lap an no come squeeze mi up, oh! Cause mi no know a wah do people like you."

"Wah? Wah? Wah do people like mi? Hey gyal yuh see like how mi vex yah!" Mi blouse cup...dah gal a mouth sour. Hmmm.

"Yuh vex, so weh dat affi do wid mi. People like you weh move wid half a dozen big bag love go ina bus an squeeze up people before unu go tek taxi! Mi nah tek no squeeze in yah." Mi start shout now an di Jansports drop ova pan mi. Mi dis tek it up a fling pan di top a di otha bag dem.

"Yeah a tru."

"Go behind the driver girl."

"It betta yuh go behind di driver enuh cuz if yuh mek one a dem bag deh drop pan mi 6 month baby mi nah ramp fi box yuh."

Some passenger ina di bus seh.

She get vex an start cuss bad bad. "Unu tink a fi unu bus? Ee? Ee? As to you." She point pan mi. Har matey bag drop a grung an a cart boy weh did a come full speed just run ova it.

"Mi bl**dcl**t mi bag." She dis a struggle wid di bag dem, a run an a shout afta di cart boy cuz all now di bag a drag pan di chart an him no realize.

"Dat she fi get man wid har renk." Di baby mada seh.

__________
---------------

When mi finally reach a mi yaad mi change an a walk go dung a Jada yaad. Mummy gawn up a daddy wid Mark again so a mi one deh yah dis weekend again. Tank God some time fi mi self.

Di time hot no baxide. Mi feel like mi a blow fire pan mi top lip.

Vroom!

Vrooom!

Same as mi look a white an blue police Pickup Van dis roll cross di road come stop a mi foot. Two red stripe officer in deh an di one a di wheel tek off him shades an gimmie a smile.

"Good morning Poochie." Weh dis a police a know mi from?

"Yes and who are you to be calling me by my nickname?" From wah time yah some police dis a come up yah enuh. Mi no know a weh dem want.

Di police laugh. "Looks like the sun is really getting to you. Can I buy you a drink."

"No. have a good day Sar." Mi walk fast dung di road an him drive up behind mi.