Bad Gyal Poochie

Chapter 4: Mix Up

Update here so this is the next chapter guys. Please share with your friends on wattpad so they can come enjoy and give feedback on this book too. Thnx y'all
______________________________________________

As mi come outta di taxi mi affi limp fi cross go ova mi yaad. Mi foot dem cramp so till all niggy niggy ina mi foot bottom dem. A betta mi cyah do enuh. Mi affi wol dis cow weight pickney just because she ina first form. An look how she look mawga to. Kmt Cho.

"Evenin Mummy."

"Evenin Marva." Marva a mummy fren from long time anytime she deh bout di place a bey laughing. She just know people business so, an anytime she come a we yaad, we learn someting new.

"Wah do you?" Marva bite up di chicken bone an spit it out. Same time wah dog weh love follow up we yaad come deh an a eat.

"No mi wid mi nuff self go wol people pickney tink seh she light cause she look likkle. A did mad fi fling him tru di winda." All mi uniform crush an mi shoes tep up tep up pan. Mi no deal wid dem ting deh enuh cause mi eva look neat.

Mek mi run go change fi come hear mix up. Mi sure Marva ave someting fi chat bout.

As mi go in mi dis kick off mi shoes and tek off mi uniform. Mi no bada put on no clothes mi dis walk roun ina di house ina mi tights an Mirena. Mi hungry like dawg. Mi go ina mummy room an tek out two a Mark snacks dem. Mum stop by chips fi mi from first form. Mi nyam dem up faas n dash di bag ina di bin.

"Yes so mi a seh how him a behave so?"

"Like him frighten." Mi hear mum seh. 

"Yea, so mi seh to him nung, alrite mi ago wait till yuh come dung a May Pen den we go draw di money."

"He heeey." Mum pop two big laugh an clap.

"Dat deh time him no know seh mi deh two minutes drive from yaad a come. So di way mi spirit dis a talk to mi an a seh come off an walk di rest a di way mi all fed up. Mi neva wah walk enuh, but mi spirit dis a seh come outta di car. So when mi reach near nung, mi come off a di taxi an walk di rest a di way."

"Gyal a di same ting mi dah do." Mi tan up a back an listen cause mi no want mum run mi go back ina room.

"Wen mi reach a di grill mi hear ahh ahh yes baby, ketch it baby, stab it baby. Mi affi stan still an ketch bret." Dis yah sound like so mad beat up an someting ago staat a now.

"Gyal yuh tan up bout yah ketch bret? Mi a run go ova Mavis unda di cella an grab couple electric wire." Mummy kiss har teet loud loud. A mad somebody enuh, mi affi try wol di laugh cause wen mi ready fi bus out a laugh. "A dah walk right in deh all wen..."

"Wol on no wol on no, listen man. Same time mi tek off mi shoes an sneak go in mi see seh di bedroom door lock. An all so wen music a play loud mi a hear di gyal voice ova di Dexta Daps song. Mi no know how she a get it so cause dat deh bwoy couldn't deh fi breed mi much more. Two year an mi cyah deven get di bwoy fi gimmie a son. God bless Kelly and Martina pupa all doh him so dyam wutless him go breed di crawny body whorin gyal." Mi couldnt wol it no longer mi run go shub mi face ina wah cushion ah laugh. Mi sneak back go out deh now.

"So mi get di room key an pull di door an same as mi pull it guess wah?" Mum get up nung wid har han dem pan har side.

"Wah? Wah? Talk no!"