Bad Gyal Poochie

Chapter 31: Pardoned

The last chapter of triple chapter Sunday is up now so enjoy. Hopefully Hurricane Elsa doesn't do too much water damage so I'll be able to post in the week. Bye loves.

3/3

_______________________________________________________________________________

Two weeks past since mi return to di place mi hate so much an mi just go through an keep mi head down. Every time mi walk paas somebody dem affi whisper to a friend or mek yeye contact fi show someting pan mi or wat. Nuff people no hail mi again an dats totally fine mi just ignore dem a go bout mi business. Mi surprise fi see seh all Two Cola a walk an look a bush wen mi a walk pass him. Mi no know why everybody a move so shakey but a one gyal mi know nah go attempt fi beg friend an a mi. Exam start dis week an mi a try fi stay focused but is like everyday some party affi keep or one heap a drama affi a gwan. More while mi just stay a di public library fi di longest an work until mi ready fi go a mi yaad. 

As mi step out a di taxi mi see a girl a run towards mi from down di road. Mi cya see di face good but mi just turn round an walk faas go ina mi house. Mummy deh inside an mi hear a voice weh sound familiar an relief wash ova mi. 

"Aunty Dawn." Mi rush go hug har up.

"Wah happen sweet girl?" She ask mi.

"Noting just a come off a di job," Mi smile. 

"Job an you in school uniform?" 

"Yes Aunty but dis here job a voluntary service fi benefit mi self cause mi nah get no pay." 

Aunty Dawn laugh. "Mi just a tell you mom seh afta exams she must mek you come spend some time wid mi."

"Eee?" Mi sit down. 

"Yea it dah good fi you go an spend some time from yah." Mum smile an she take a sip a di Malta before she chunk dung a piece a chicken." 

We ave a big discussion bout how we feel fi move back ina di community an is like mummy unleash all rage. Mi can see seh she really stress an neva wah come back down here but we just affi work wid it fi now. Mi go ina mi room an prepare fi mi two exam dem tomorrow. Long afta mi eat dinner an binge watch some Youtube mi did a study wen mummy seh somebody a call mi. Wen mi go pan di verandah mi see seh a Jada an Jason. 

"Hello?" Mi seh like she a stranger. 

"Wah gwan Poochie yuh good?" Jada hold up har head an mi observe har fi a good while. A cut deh from unda har left yeye to har nose an mi a wonder if a knife do dat. Har left hand broke too an she a walk wid a limp. Har smile full a pain an Jason help har come up to mi. 

"Mek she come in no Poochie?" Jason seh. 

"Sure ave a seat." Mi seh an pull forward one a di verandah chair dem. 

"How you been a do?" She ask mi an mi tell har seh mi good excluding all details bout weh mi up to since mi staat tek life an mi future serious.

"Poochie gimmie a drink deh fi trace dis." Jason seh. 

"Look pan di table you see a Pepsi," Mi tell him an him get up. 

"So you still a go school or you a work even though you stop pay Kelly medical bills?" Jada ask mi. 

"Why yuh come ova yah Jada?" Mi seh to har quietly.

"So mi cya come look fi mi bestfriend weh move back ina di community?" She ansa back wid attitude. 

"Bestfriend?" Mi laugh wid sarcasm. "We are not bestfriends." 

She hold down har head den she tek a while fi look up wid har yeye dem full a wata. "Poochie mi sorry if all a dis. Mi should a listen to weh you seh. Now mi finally get it Poochie it just a click to mi weh yuh did a try protect mi from." She let out a cry an mi look pan har in pitty. 

"It was your choice to make." Mi seh.

"Mi know but mi feel like yuh should a push mi more fi understand. A swear mi dah affi listen at some point." Jada a cry an it look like she hurt up har hand cause she mek a hiss an suddenly tears done. 

"Sorry seh dis happen to you but I tried, honestly I did." Mi stan up as a gesture seh a time fi she lef mi yaad. 

"Him neva go change an mi a such a ediat fi no realize from early, but mi changed now Poochie. Really, now mi ave a new mindset. Mi just a seh screw him an mek him gwan back to him parents a Merica who care bout him? Mi just want we fi go back to di days before him wen mi an you did a di tightest round here. We used to be di baddest, nobody couldn't talk to we an we used to party hard. Mi just want we fi go back go enjoy life like we used to please Poochie mi a beg you fi forgive mi again fi di last time. Mi done wid di yam head days mi serious dis time."

Mi look pan har an tink back to how mi used to behave. Attitude stink like Bagon, used to seh a book mi a pree an still no tek up none. Fight off people just because mi can, tek weh gyal tings an dem man just because mi feel like. Mi dah just ansa any an anybody how mi feel an party till mi cya bada fi go school. 

"Alright." Mi seh to Jada an she step fi hug mi but mi keep har at arms length. Mi no want no hug. "Mi forgive you Jada an yes mi want di best fi you, but we will neva be bestfriends again. Di person mi used to be den still ina mi, mi always ago have some a di ways dem from way back wen. But di ting is di two a we ave two different mindset now, a bigger an betta tings mi a look pan. Mi nah go be fake an tell yuh seh yes mi want we fi get back close because no I don't. As a matter a fact, mi nah go walk round an keep malice wid yuh but dis friendship just wata dung to a hail mi an mi hail you basis. Dats it.

"A so you seh?" Jada look pan mi like she vex. 

"Yea a so mi seh. You are pardoned fi all di dirt you do mi but mi cya do dis no more." Mi seh. 

"Alright." She ease up. "Jason come on!" She shout real loud an vex an him run come wid a piece a chicken ina him mouth. 

Mi lean up pan di grill fi a good ten minutes a watch di two a dem walk an limp go out di road. Friendships can feel like a breakup too because as mi look pan Jada mi can tell seh she neva mean di apology weh she just give. She ago always relapse an do di same ting an mi just affi suck it up an finally step away from di toxic friendship.