Bad Gyal Poochie

Chapter 3: Mad Customer

So. This is the Saturday update. Don't forget I update on Wednesdays and Saturdays. Bonus updates come unexpectedly. Don't forget to comment. I live for comments.

______________________________________________

Mi grab on pan di likkle red an white purse mi aunty buy gimmie an fling it ina mi bag. Mi cyah believe seh mi late so. Mi no wah loose di likkle wok enuh. As mi drag on mi navy blue jeans pants mi staat skin up mi face. Bwooy di waist tight so till but mi wah look like mi ave fine waist. Yuh si like how mi thigh dem thick an mi shapey, mi need a thin waist kinda look. Although a fifth form mi ina, right now mi head no deh a school. Is a work mi deh pan a now fi come gwan mek some money fi di Christmas. Summer weh gone mi mek a money weh suit mi out well. $30,000 mi did a get fi work wid a likkle company mi fada link wid. Sweet mi yah. Every two week mi did a get dat. Now mi affi a settle fi a likkle $4,000 weekend job.

"Hey gyal yuh no hear mi seh fi come out a di house? Much time mi fi tell yuh?" Mummy annoying sometime essi.

Mi work a dis store name Glamour Boutique. Every Saturday mi go deh from 9:00am to 5:00pm. Right now a 8:45 an it tek bout thirty minutes fi reach deh kmt. Mi dis grab a plain white t-shirt an kick mi foot ina di road side black $500 slides mi buy last week.

"Poochie yuh ave yuh phone?" Baxide mi figat it.

"No. Mark run carry it come."

"Go fah yuh sef."

Be beeeep!

"Mark run go fah an come nuh see di bus yah, yow!" Mark sit dung pan mummy phone a play Pub G. Dah likkle boy yah too young fi a gi mi so much talking. A tek a leap go ina house fi di phone.

Beeeeep.

"See mi yah see mi yah!" A pinch off him jaw an run go towards di bus.

Mi go in an sidung a di conducta seat an him stan up. "Mawnin." Wen a tek a stack, nobody ina di bus no ansa. Mi spin roun again an seh loud loud. "Mawnin!"

"Mawnin." Nuff a dem seh

"Morning Dear."

"Mawnin Poochie."

Mi spin back roun an go pan mi phone. Wid dem bright, a come gwan like dem no wah ansa. Mi know nuff people in yah nyam breakfast dis mawnin. Di energy mi tek seh mawnin coulda carry mi from nung till next year, so mi nah ask if dem affi ansa mi. Wrenk.

By mi reach an start work mi see di boss woman dis a gimmie so kinda yeye deh. Mi know seh a bout di third time mi late now but mi nah dweet again.

"Honey no you didn't. Aha ha ha ha. Are you for real?" Mi spin roun an see a fat fat man a walk wid dis sexy body gyal. Di man look nice but him jus ave di size a wah trailer an di girl a di size a wah likkle mini van. Di married ring pan di man finga dis a shimmer ina di place. But mek mi try look...mi cyah see di girl han good. Cho.

"Excuse me." Mi spin roun an dis white woman seh to mi. "Do you have anymore of these in a smaller size?"

"I don't know I'd have to check and get back to you."

"Okay make it quick." She gimmie di dress an mi go roun a di storage room. One mind seh look pan di tag. Mi Jesus! $12,989 fi dis yah simple knee high dress? No wonder a one bag a money people come yah come shop. Mi get the smaller size an she go try it on.