Bad Gyal Poochie

Chapter 8: Wild Plan

I DECIDED TO MAKE THIS CHAPTER BE A BONUS CHAPTER. WASNT GONNA UPDATE TILL NEXT WEEK OR SO BUT ENJOY. ^^
_________________________________________

"So just wait pan you from a distance?" Ashley ask mi fi di fifth time since mi outline di plan.

Mi drop di bathing towel back pan di bed an wol up mi han dem.

"Ashley a swear if yuh ask mi again mi nah bada go no weh."

Jada laugh out an a chew some Ruffles.

Beeep!

"Hear daddy deh unu memba fi lock di door afta mi gawn an put di key under di rock stone weh mi show you." Although mi invite mi fren dem ova no mean to seh mum did know.

"Alrite." Ashley seh.

"Lata bestfriend." Jada seh

Mi grab di bag an go outside. Mi lock di door an walk go ina daddy car. Mi no seh noting an a look tru di window while we a drive.

"So you cyah seh good night?"

"Night Daddy." Mi sound sulky. Mi force up two big yawn an him stop talk.

"A so you one did a dose off. When you go up you go straight go sleep."

Mi no seh noting.

Wen we drive up ina di yaad mi jump from outta gate before daddy reverse di car. By di time mi fi knock, di door open an Mark stan up deh wid wah ruler.

"Gwan ina di house before mi beat you. Bout you nah come up here."

Mi cut mi yeye an walk in. Daddy walk in same time an lift up Mark pan him back den start tickle him. Bea cackling ina di house fi mek mi mood more sour dan it tan already. Mi go throw dung mi bag pan mi bed an walk go ina kitchen an see mum a cut up melon.

"Oh yuh reach? Good." Weh dat supposed to mean.

"Why you call mi up here all of a sudden?" Mi lean pan di counter.

"Mark?" Mummy seh.

"Yeah?" If yuh wah hear devil ansa like an Angel check Mark.

"Tun dung di T.V it too loud." Mummy shout.

"Mi call you up here cause you fada wah see you." She tek out some cup outta di drainer an staat share out pine an ginger juice.

"Dats it?" Mi ask annoyed now.

"Yes an Mark did well miss you to."

"Miss mi? Di only reason why Mark woulda miss mi a fi gi trouble an faas wid mi tings dem." Mi tek up my juice an drink it.

"A wonder a wah really a di problem." Mummy turn roun an staat gimmie dah look deh.

"Mi no ave a problem." Mi walk go ova to di sink an staat wash out mi cup wid mi back to har.

"Hmmm. A hope a no dah Michael boy deh you ave a go ina mi house a night time wen mi no di deh enuh." A wonder if a know she know bout dah night deh. Dat same Faas Mavis she want a lick ina har mouth fi shut up.

"Eeeh? A dat you wah hear?" Mi wipe off mi han pan di towel an turn roun.

Mummy still stan up a stare pan mi. Lawd have mercy. "Mummy it just annoying fi ave people roun mi 24/7 sometime. When mi do get di likkle peace an quiet a wen mi deh by mi self weekend time." Plz God mek she stop look pan mi so. Mi feel di place start get hot.

"Bwoy mi nah seh a word. Mi know unu likkle teenager want unu space but a long time yuh no come up yah."

"Exactly, now you get it." Mi tek up piece a di melon an daddy an Mark walk in. Mi just step out go ina mi room pan mi phone.